Иблис һәм җеннәр кешелеккә көчле йогынты ясый. Изге Язмаларда: «Бөтен дөнья Явызның хакимлеге астында тора»,— дип әйтелә (1 Яхъя 5:19). Изге Язмаларда Иблис кешеләргә нәрсә ярдәмендә йогынты ясый дип әйтелә.

•   Алдау. Изге Язмалар кешеләрне «Иблиснең мәкерле эшләренә каршы торырга» дәртләндерә (Эфеслеләргә 6:11). Иблиснең мәкерле эшләренең берсе — кешеләрне алдау. Ул үзенә иярүче кешеләрне Аллаһыга хезмәт итәләр дип ышандыра (2 Көринтлеләргә 11:13—15).

•   Спиритизм. Иблис кешеләрне медиумнар, күрәзәчеләр һәм астрология белән шөгыльләнүчеләр аша алдый (Канун 18:10—12). Наркотиклар, гипноз, медитация кеше акылын томалый һәм аны җеннәр йогынтысына дучар итә (Лүк 11:24—26).

•   Ялган дин. Ялган тәгълиматларга нигезләнгән диннәр кешеләрне алдап, Аллаһыны тыңламаска этәрә (1 Көринтлеләргә 10:20). Изге Язмалар андый ялганга нигезләнгән дини карашларны җеннәр тәгълиматы дип атый (1 Тимутигә 4:1).

•   Үз колы итү. Изге Язмаларда явыз рухлар кешеләрне үз коллары итеп аларга зыян китергән дип әйтелә. Җенле кешеләр кайчакта сукыр, телсез булган һәм хәтта үз-үзләренә зыян китергән (Маттай 12:22; Марк 5:2—5).

Иблиснең йогынтысына ничек каршы торырга?

 Безгә җеннәр йогынтысыннан куркасы юк, чөнки Изге Язмаларда без Иблискә уңышлы каршы тора алабыз дип әйтелә.

•   Иблиснең «алымнары билгеле» булсын өчен, ул кулланган «коралларны» күрергә тырышыгыз (2 Көринтлеләргә 2:11).

•   Изге Язмалардан белем алыгыз һәм аның буенча яшәгез. Изге Язмаларның принциплары буенча яшәү, сезне Иблис йогынтысыннан яклаячак (Эфеслеләргә 6:11—18).

•   Җеннәр йогынтысы белән бәйле бар нәрсәне чыгарып ташлагыз (Рәсүлләр 19:19). Мәсәлән, спиритизмга этәрүче музыка, китаплар, журналлар, плакатлар һәм фильмнар.