Baibuli tekozesa ekigambo “kwihamu enda” obweba nebazaaho ekikorwa eky’okuhambiriza enkerembe etakahikire kuzaarwa kuruga omunda. Baitu, enkarra nyingi omu Baibuli zitukonyera kumanya omulingo Ruhanga arora obwomeezi, otwaliremu n’obw’omwana atakazairwe.

 Obwomeezi kisembo kuruga hali Ruhanga. (Okubanza 9:6; Zabuli 36:9) Ruhanga arora obwomeezi bwona nk’obw’omuhendo, otwaliremu n’obwomeezi bwona atakazaire akyali omunda ya nyina. Nahabweki, kakuba omuntu akigenderra kwita omwana atakazairwe, nikiba nikingana n’okwita omuntu.

 Ekiragiro kya Ruhanga hali Abaisaleri kyali nikigamba kiti: “Abantu obubalirwana hamu nibakora kubi omukazi anyina enda, kandi enda nerugamu, baitu busaho akabi akakuratira: mazimakwo aliriha, nka iba omukazi okwalimucwera; aliriha nkabacwi bemisango okubalimuragira. Baitu akabi obukalikuratira hanyuma, nubwo oliriha obwomezi habwobwomezi.”—Okuruga 21:22, 23. *

•  Obwomeezi bw’omuntu butandika di?

•  Ruhanga n’asobora kuganyira omuntu ayaihiremu enda?

•  Kwihamu enda kibi kakuba obwomeezi bw’omukazi ow’aine enda rundi obw’omwana buba buli mu kabi?

 Ruhanga arora obwomeezi bw’abantu nk’obutandikira ha kutwara enda. Omu Kigambo kye, Baibuli, Ruhanga aikara natwoleka ngu omwana ow’atakazairwe nauwe muntu habwe. Tekerezaaho ebyokurorraho ebirukwoleka ngu Ruhanga tarora mbaganiza hagati y’obwomeezi bw’omwana atakazairwe n’ogwo ow’azairwe.

•   Naterekerezebwa omwoyo ogurukwera, Omukama Daudi akagambira Ruhanga ati: “Amaiso gawe gakarora omubiri gwange gutakahikiriire.” (Zabuli 139:16) Ruhanga akarora Daudi nk’omuntu n’obukiraaba ngu akaba atakazairwe.

•   Ekindi, Ruhanga akaba namanya ngu naija kuha nabbi Yeremiya obujunaanizibwa obw’embaganiza n’obwakaba atakazairwe. Ruhanga akamugambira ati: “Obunkaba ntakakukoliire omu nda nkamanya iwe, nakweza otakarugire omu nda; nkutaireho okuba nabi hali amahanga.”—Yeremiya 1:5.

•   Omuhandiiki wa Baibuli Luka, awakaba ali dakitaali, akakozesa ekigambo kimu eky’Oruyonaani kusoborra omwana ow’atakazairwe n’ogu ow’akaba y’akazaarwa.—Luka 1:41; 2:12, 16.

 Ruhanga n’asobora kuganyira abo abaihiremu enda. Kakuba batandika kurora obwomeezi nk’oku Ruhanga aburora, tibasemeriire kwetuntura habw’ebyo ebibaakozere. “[Yahwe] aijuire okuganyira nembabazi. . . Nkoburugaizoba okubuli hara nobugwaizoba, nukwo okuganyirakwe kuli kwingi kuti.” * (Zabuli 103:8-12) Yahwe naija kuganyira abo boona abegarukamu kuruga ha mutima habw’ebibi byabo ebya kara, otwaliiremu n’okwihamu enda.—Zabuli 86:5.

 Kusigikirrra ha Baibuli eky’egamba ha bwomeezi bw’omwana ow’atakazairwe, omuntu naba atahikire kwihamu enda ngu habwokuba obwomeezi bw’omwana rundi obwa nyina buli mu kabi.

 Kandi kakuba omu kasumi ak’okuzaara habaho enyikara ey’erukwetaagisa kucwamu kujuna obwomeezi bw’omwana rundi obwa nyina? Omu nyikara nk’egi, abarukukwatwaho nubo basemeriire kwekorra encwamu y’obwomeezi bw’oha obubaralengaho kujuna.