“Iwe anyakuhurra okusaba, balikuizira bona abayina omubiri.”​—Zabuli 65:2.

Abantu abamu basaba habwokuba bagamba ngu kibaleetera kwehurra kurungi, n’obubaraaba baikiriza ngu busaho arukuhurra esaara zaabo. Baitu kusaba tikuli kw’okutuleetera kwehurra kurungi kwonka nukwo tusobole kugumira ebizibu byaitu. Baibuli n’etugumya ngu “[Yahwe] * ali haihi na bona abamukunga, bona abanyakumukunga namananu. . . . Alihurra okurra kwabu.”​—Zabuli 145:18, 19.

Nahabweki nitusobora kukigumya ngu Yahwe Ruhanga ahurra esaara ez’abaheereza be. N’okugonza n’agamba ati: “Mulinkunga, kandi muligenda nimunsaba, nanyowe ndibahurra.”​—Yeremiya 29:12.

“Mwekambe omu kusaba.”​—Abarumi 12:12.

Baibuli netutererra ‘kusabaga butoosa’ kandi ‘n’okusabaga bwona.’ Hataroho kugurukyagurukya, Yahwe n’agonza osabe hali uwe.​—1 Abasesalonika 5:17; Abefeso 6:18.

Habwaki Ruhanga n’agonza tumusabe? Kitekerezeeho: Muzaire ki atarukugonza omwana we omuto kumugambira ati: “Dadi nkonyera”? Ky’amananu, omuzaire n’asobora kuba amanyire omwana eky’arukwetaaga rundi nk’oku arukwehurra, baitu obw’ahurra ebigambo ebyo, kimwoleka ngu omwana we n’amwesiga kandi baine enkoragana nungi. Omu mulingo nugwo gumu, obutusaba hali Yahwe twoleka ngu nitumwesiga kandi nitugonza kwirra haihi na uwe.​—Enfumo 15:8; Yakobo 4:8.

“Nimunagira okutuntura kwanyu kwona haluwe, baitu nabitaho omutima ebigambo byanyu.”​—1 Petero 5:7.

Ruhanga n’agonza tumusabe habwokuba n’atugonza kandi n’atufaaho. Amanyire kurungi ebizibu byaitu hamu n’ebitweraliikiriza, kandi n’agonza kutukonyera.

Omukama Daudi yasabaga hali Yahwe bwomeezi bwe bwona, kandi yamugambiraga eby’arukutekereza, hamu n’omulingo arukwehurra. (Zabuli 23:1-6) Ruhanga akehurra ata hali Daudi? Ruhanga yagonzaaga muno Daudi kandi akahuliriza esaara ze n’obuziraaba zikaba nyingi. (Engeso Ezabakwenda 13:22) Omu mulingo nugwo gumu, Ruhanga ahurra esaara zaitu habwokuba n’atufaaho.

Ebi bigambo by’omu h’abahandiiki ba zabuli eziri omu Baibuli. Akaba akimanyire ngu Ruhanga yahurraga esaara ze, kandi eki kikamukwataho muno. Akehurra ali haihi na Ruhanga kandi y’atunga amaani ag’okugumira ebizibu hamu n’obujune bwe.​—Zabuli 116:1-9.

Obuturaaba nitukigumya ngu Ruhanga ahurra esaara zaitu, nitwija kugumizaamu nitumusaba. Tekerezaaho ekyokurorraho kya Pedro, arukwikara omu matemba ga Spain. Mutabani we ow’emyaka 19, akafeera omu butandwa bwa matoka. Pedro akagambira Ruhanga omulingo gwonyini akaba nayehurramu kandi y’amusaba emirundi nyingi amuhuumuze kandi amusagike. Kiki eky’abaireho? Pedro n’agamba ati: “Yahwe akagarukamu esaara zange kurabira omu kuhumuzibwa n’obusagiki obunatungire kuruga hali mukazi wange hamu n’Abakristaayo bagenzi bange.”

N’obukiraaba ngu esaara zitahumbuule mutabani we, zikakonyera muno Pedro n’eka ye omu miringo nyingi. Mukazi we, María Carmen, obwarukwijuka eby’abaireho, nagamba ati: “Esaara zikankonyera kugumira obujune bwange. Nk’akyetegereza ngu Yahwe akaba anyetegeriize habwokuba obunasabire nkahurra n’atunga obusinge kandi n’atekaana.”

Baibuli hamu n’obwakaiso obw’abantu baingi nibyoleka ngu Ruhanga ahurra esaara zaitu. Baitu, ky’amananu ngu Ruhanga tagarukamu esaara zoona. Habwaki Ruhanga agarukamu esaara ezimu kandi ezindi azireka?