Pakuwona unandi wa ŵanthu awo ŵakujikoma mu chigaŵa cha Tabasco ku Mexico, mu 2017, Ŵakaboni ŵa Yehova ŵakanozga upharazgi wapadera uwo ukatora myezi yiŵiri. Ŵakachita nthena kuti ŵagaŵireso magazini ya Galamukani! ya April 2014 ya mutu wakuti, “Kodi Kudzipha Ndi Njira Yabwino Yothetsera Mavuto?” Ŵanthu ŵanandi ŵakawonga chomene upharazgi wapadera uwu.

Faustino, yumoza wa Ŵakaboni ŵa Yehova, wakakumana na mwanakazi uyo wakafipiranga mtima mwana wake munyamata wa vyaka 22. Munyamata uyu wakasuzgikanga maghanoghano ndipo wakakhumbanga kujikoma. Mama uyu wakamanyanga yayi umo wangamovwilira. Kweni Faustino wati wamupa magazini iyi, mama uyu wakati, “Magazini iyi ndiyo mwana wane wakukhumbikwira nadi.” Zuŵa lakulondezgapo, Faustino wakaluta kukadumbiskana na mwana wa mama uyu, ndipo ŵakadumbiskana fundo za mu Baibolo izo zikulongosoreka mu magazini iyi. Wati wamwenderapo maulendo ghanandiko, munyamata uyu wakawoneka kuti wakusintha. Faustino wakati, “Sono wakuwoneka wakufwatuka na wakukondwa.” Chinyake ntchakuti, ivyo wakusambira wakuphalirakoso munung’una wake, uyo nayo wakusuzgika maghanoghano.

Karla, uyo wakukhala mu msumba wa Huimanguillo, wakawovwira munyake wa ku sukulu na magazini iyi. Karla wakuti: “Nkhawona kuti msungwana munyake wa vyaka 14 mu kilasi mwithu wakuwoneka wachitima. Nkhayowoya nayo, ndipo wakanilongosolera umo vinthu vikaŵira ku nyumba kwawo. Apo tikachezganga, nkhawona kuti wakaŵa na mabamba mu woko lake lamazere.” Nkhamanya kuti msungwana uyu wakatemwanga kujicheka mu mawoko na mu malundi. Wakajiwonanga kuti ngwambura kutowa ndipo wakagomezganga kuti umoyo wake ulije ntchito. Karla wakamugaŵira magazini ya Galamukani! Msungwana yura wati wayiŵazga, wakaphalira Karla kuti magazini iyi yikuŵa nga ŵakalembera waka iyo. Uku wakumwemwetera, wakayowoya kuti sono wakugomezga kuti umoyo ngwakuzirwa.

Mu msumba wa Villahermosa, mwanalume munyake wakasoŵa kwakunjilira. Ntchito yikamumalira, ndipo muwoli wake wakamuchimbira lumoza na ŵana ŵawo. Wakalomba kwa Chiuta kuti wamovwire kweni nipera vinthu vikaŵa makora yayi. Wakaŵa pafupi kujikoma apo Ŵakaboni ŵa Yehova ŵaŵiri Martín na Miguel, ŵakagogoda pa chijaro chake. Munthu uyu wakajurako ku mulyango, ndipo Ŵakaboni aŵa ŵakamupa magazini ya Galamukani! Mwanalume uyu wati wawona waka mutu wa magazini iyi, wakamanya kuti Chiuta wazgora lurombo lwake. Martín na Miguel ŵakamusanguluska na fundo za mu Baibolo ndipo ŵakalutaso pati pajumpha mazuŵa ghachoko waka, ŵakamusanga kuti mtima uli m’malo. Sono ŵakusambira Baibolo na munthu uyu kaŵiri pa sabata.

Pa upharazgi wapadera uwu, Ŵakaboni ŵakafikaso mu majele ghanandi mu Tabasco kuti ŵaphalireko ŵakayidi fundo za mu Baibolo izo zingawovwira kumanya chilato cha umoyo. Ŵakaboni ŵakanozga pulogiramu iyo mukaŵa mavidiyo, nkhani ya mu Baibolo, kweniso kudumbiskana chigaŵa cha kuzirwa kwa umoyo ichi chili kulongosoreka mu magazini iyi. Ŵakayidi kweniso ŵakulaŵilira ŵakayidi ŵakawonga chomene chifukwa cha kuŵayendera. Mwachiyelezgero, mukayidi munyake wakati: “Nkhayezga kujikoma katatu kose. Ŵanthu ŵanyake ŵakaniphalira kuti Chiuta wakunighanaghanira, kweni ŵakanilongorapo yayi kufuma mu Baibolo kuti nigomezge ivyo ŵakayowoyanga. Mazgu ghinu ghanikhozga chomene.”

Ŵanthu ŵanandi ŵakamanya vya upharazgi wapadera uwu. Mulembi wa vyaumoyo wakalumba Ŵakaboni chifukwa cha kuyezgayezga kovwira ŵanthu, ndipo nyuzipepara yinyake mu chigaŵa ichi yikalemba nkhani yakukhwaskana na upharazgi uwu, ya mutu wakuti “Ŵakunyamuka Kuti Ŵakawovwire Ŵanthu Kuti Ŵaleke Kujikoma.”