“Kanandi para nkhukhumba kuŵerenga Baibolo nkhuboweka waka, chifukwa nkhuwona kuti ndikuru chomene!”—Briana, wa vyaka 15.

 Para ndimo nawe ukujipulikira, nkhani iyi yingakovwira!

•  Chifukwa wuli ukwenera kuŵerenga Baibolo?

•  Kasi ningaŵerenga wuli Baibolo?

•  Ivyo ŵanyako ŵakuyowoya

 Kasi ukuboweka chomene na kuŵerenga Baibolo? Para ndimo viliri, ndiwe pera yayi. Nyengo zinyake ukuboweka chifukwa chakuti Baibolo lili na mapeji ghanandi chomene kweniso mulije vithuzi, ndipo ukuwona kuti ungakondwa nalo yayi nga umo vikuŵira para ukuwonelera TV panji mavidiyo!

 Tiyelezgere kuti wawona chikwama chakale icho ŵakusungamo usambazi wakuzirwa, kasi ungachijura yayi kuti uwone ivyo vili mukati?

 Baibolo likuyana waka na chikwama ichi. Lili na vinjeru vyapachanya chomene ndipo vingakovwira

•   Kusankha mwamahara

•   Kukolerana na ŵapapi ŵako

•   Kusankha mwamahara ŵabwezi

•   Kuleka kwenjerwa chomene

 Kasi vingachitika wuli kuti buku lakale chomene nga ili, liŵe lakovwira mazuŵa ghano? Chifukwa ntchakuti “Malemba ghose ngakupelekeka na Chiuta.” (2 Timote 3:16). Ichi chikung’anamura kuti ulongozgi uwo uli mu Baibolo ukufuma kwa uyo wali na mahara chomene.

 Nthowa yakwamba: Ŵerenga kufuma pakwamba m’paka paumaliro. Ichi chingakovwira kuti umanye uthenga uwo uli mu Baibolo. Pali nthowa zinandi za umo ungaŵelengera Baibolo. Ghanaghanira fundo ziŵiri izi:

•    Ungaŵerenga mabuku ghose 66 gha mu Baibolo mu ndondomeko yake, kwambira Genizesi m’paka Chivumbuzi.

•    Ungaŵerenga Baibolo kuyana na umo vinthu vikachitikira.

 Ivyo ungachita: Mu Baibolo la Mang’anamuliro gha Charu Chiphya pa chigaŵa cha Vyakusazgirapo A7 pali ndondomeko ya vinthu ivyo Yesu wakachita apo wakaŵa pa charu chapasi.

 Nthowa yachiŵiri: Sankha nkhani iyo yikukolerana na suzgo ilo wakumana nalo. Mwachiyelezgero:

•   Kasi ukukhumba kusankha mubwezi wakugomezgeka? Ŵerenga nkhani ya Yonatani na Davide. (1 Samuyeli, chaputara 18-20) Kufuma apo, uwone nkharo yiwemi iyo Davide wakaŵa nayo iyo yikakondweska Yonatani kuti waŵe nayo paubwezi.

•   Kasi ukukhumba kumanya umo ungazizipizgira masuzgo? Ŵerenga nkhani ya umo Yosefe wakazizipizgira masuzgo. (Genizesi, chaputara 39) Kufuma apo, uwone icho chikawovwira Yosefe kuzizipizga masuzgo.

•   Kasi ukukhumba kumanya umo malurombo ghangakovwilira? Ŵerenga nkhani ya Nehemiya. (Nehemiya, chaputara 2) Kufuma apo wonani nkhani yakuti “Chiuta Wakazgora Lurombo Lwake” kuti umanye umo ungachitira.

 Ivyo ungachita: Para ukuŵerenga Baibolo ukwenera kukhala pa malo gha yii, kuti uleke kutimbanizgika na vinthu vinyake.

 Nthowa yachitatu: Sankha nkhani yinyake na kuyiŵerenga, kufuma apo ghanaghanirapo umo nkhani iyo yikukukhwaskira. Para wamara kuŵerenga, ujifumbe mafumbo agha:

•    Chifukwa wuli Yehova wakakhumba kuti nkhani iyi yilembeke mu Baibolo?

•    Kasi nkhani iyi yikuvumbura vichi vya Yehova kweniso umo wakuchitira vinthu?

•    Kasi ningayilondezga wuli fundo iyi pa umoyo wane?

 Ivyo ungachita: Uŵe na chilato, ndipo ulembe deti ilo ukukhumba kuzakayambira kuŵerenga Baibolo.