VYAKOVWIRA MABANJA
Ivyo Mungachita Kuti Mwana Winu Waleke Kufeluka mu Kilasi
Kasi ntchivichi chingachitika usange mwana winu wakuwoneka kuti sukulu walije nayo ntchito, ndipo wakupanga yayi homuweki kweniso kuŵerenga? Wafelukenge mu kilasi, kweniso nkharo yake yisinthenge. Kasi mungamovwira wuli kuti waleke kufeluka?
Ivyo mukwenera kumanya
Para mungamuchichizga munangirengethu vinthu. Usange mwana winu mukumuchichizga, wasuzgikenge maghanoghano ku sukulu na ku nyumba. Kuti waleke kusuzgika maghanoghano wangamba kuteta, kubisa lipoti para wafeluka, kulembapo siginecha ya utesi pa lipoti, panji kuleka kunjira mu kilasi. M’malo mwa kumazga suzgo, lilutilirenge waka.
Kupeleka chawanangwa kungapangiska suzgo. “Dada munyake, zina lake Andrew, wakati: “Kuti tichiske mwana withu msungwana kuti wakwere makora mayeso tikamba kumupa vyawanangwa. Kweni ivi vikapangiska kuti maghanoghano ghake ghaŵe pa chinthu icho timupenge. Para wafeluka wakakhuŵaranga chomene chifukwa maghanoghano ghake ghakaŵanga pa chawananga m’malo mwa icho chamupangiska kuti wafeluke.”
Ntchiwemi yayi kuyimba mlandu asambizi. Para muyimbenge mulandu asambizi, mwana winu wawonenge kuti palije suzgo nanga wangaleka kulimbikira. Nayo wasambirenge kuyimba mulandu ŵanyake pa vinthu ivyo iyo ndiyo wabudiska kweniso kuti ŵanyake ndiwo ŵamovwire pa suzgo lake m’malo mwakumarana nalo yekha. Watondekenge kusambira vinthu ivyo vingazakamovwira para wakura, wamanyenge yayi kuti ni udindo wake kunozga apo pabudika.
Ivyo mungachita
Mujikorenge. Para mwakwiya chifukwa mwana winu wafeluka ku sukulu, kumufumba nyengo yeneyiyo yayi. Dada munyake zina lake Brett wakati: “Ine na muwoli wane tikuchezga makora na mwana withu para mitima yithu yazika kweniso para tikumulongora lusungu.”
Fundo ya mu Baibolo: “Munthu waliyose wapulikenge luŵiro, wazikirenge pakuyowoya, kukwiya luŵiro yayi.”—Yakobe 1:19.
Manyani apo pagona suzgo. Munthu wangafeluka chifukwa cha ŵanyake awo ŵakumusuzga, kusintha masukulu, kujikayikira para wakulemba mayeso, masuzgo gha kunyumba, kuleka kugona mwakukwana, kuleka kuŵa na ndondomeko yiwemi, kweniso kuleka kulimbikira. Ntchiwemi yayi kughanaghana kuti mwana winu ni mukata waka.
Fundo ya mu Baibolo: “Uyo wakulongora mahara vinthu vimwenderenge makora.”—Zintharika 16:20.
Wovwirani mwana winu kuti wasambire makora. Ŵani na ndondomeko ya homuweki na kuŵerenga. Ŵani na malo uko mwana winu wangalemberako homuweki kwambura kutimbanizgika na chilichose kwali ni TV panji foni. Gaŵani homuweki mu vigaŵa vichokovichoko kuti mumovwire mwana winu kuti waleke kutimbanizgika. Dada munyake wa ku Germany, zina lake Hector wakati: “Usange mwana withu walembenge mayeso, tikumovwira kuweleramo pachokopachoko zuŵa lililose m’malo mwakulindira para nyengo yamara.”
Fundo ya mu Baibolo: “Kanthu kalikose kali na nyengo yake yakutemeka.”—Mupharazgi 3:1.
Muchiskani kusambira. Ntchiwemi kumanya uwemi sukulu apo wachali muchoko, ivi vimovwirenge kuti wayitemwe. Mwachiyelezgero, para wamanya masamu vimovwirenge kupanga makora bajeti ya ndalama yake yakulyera ku sukulu.
Fundo ya mu Baibolo: “Usange vinjeru, upulikiskenge vinthu. . . . Uvizirwiske chomene.”—Zintharika 4:5, 8.
Ivyo mungachita: Wovwirani mwana winu kulemba homuweki, kweni kumulembera yayi. Dada munyake, zina lake Andrew wakati: “Mwana withu wakazgoŵera kuti ise ndise timupenjerenge mazgoro para wali na homuweki, m’malo mwakupenja yekha.” Sambizgani mwana winu kuchita yekha homuweki.