Kasi muli kusuzgikapo cifukwa ca sankho? Kasi ŵanthu ŵali kumukaniranipo kupulika pempho linu, nchito panji kumucitiranipo nkhaza cifukwa ca mtundu, panji masambiro ghinu? Usange ni nthena, manyani kuti ndimwe pera yayi. Kweni nkhani yakukondweska njakuti, nangauli vinthu ivi ni vyakuzara pa caru, kweni kucanya kulije. Mpositole Petrosi wakayowoya mwakukhuka kuti “Ciuta wakutemwera cara.”—Ŵazgani Milimo 10:34, 35.

Petrosi wakayowoya mazgu agha ku nyumba kwa Koroneliyo uyo wakaŵa Wamtundu. Kwa Petrosi malo agha ghakaŵa ghambura kwenelera. Cifukwa wakaŵa Muyuda, ndipo wakaŵako pa nyengo iyo Ŵayuda ŵakawonanga Ŵamitundu kuŵa ŵakufipirwa ndipo ŵakenderananga yayi. Kweni kasi vikenda wuli kuti Petrosi wasangike mu nyumba ya Koroneliyo? Cifukwa cakuti Yehova Ciuta ndiyo wakanozga kuti ŵakumane. Petrosi wakawona mboniwoni ndipo wakaphalirika kuti: “Uleke kuvicema vyakufipirwa vinthu ivyo Ciuta watozga.” Petrosi wakamanya yayi kuti mayiro ghake Koroneliyo nayo wakawona mboniwoni, ndipo mungelo wakamuphalira kuti waceme Petrosi. (Milimo 10:1-15) Petrosi wati wamanya kuti Yehova wanjilirapo pa nkhani iyi wakawona kuti wakenera kuyowoya mazgu agha.

Petrosi wakati: “Nadi, nkhuwona kuti Ciuta wakutemwera cara.” (Milimo 10:34) Lizgu la Cigiriki ilo likung’anamulika kuti “kutemwera” likung’anamura ‘kulumba cisko.’ Nkhwantha yinyake yikayowoyapo pa mazgu agha kuti: “Mazgu agha ghakuyowoya za mweruzgi uyo wakweruzga mwakuyana na kawonekero ka munthu kwambura kuwona nkhani yose.” Kweni Ciuta ndimo wakucitira yayi.

M’malo mwake, Yehova wakulaŵiska ivyo vili mu mtima withu. (1 Samuel 16:7; Zintharika 21:2) Pamasinda Petrosi wakati: “Mu mtundu uliwose munthu uyo wakumopa na kucita urunji ngwakuzomerezgeka kwa iyo.” (Milimo 10:35) Kopa Ciuta kukung’anamura, kumucindika, na kumugomezga, kweniso kugega kucita cilicose ico cingamukwiyiska. Kupenja urunji kukung’anamura kukhumbisiska kucita vinthu ivyo ni vyakwenelera mu maso gha Ciuta. Yehova wakukondwa na munthu uyo mtima wake ukumukhuŵirizga kucita ico nchiwemi.—Duteronome 10:12, 13.

Usange muli kusuzgikapo na sankho, mungakhozgeka na mazgu agho Petrosi wakayowoya ghakukhwaskana na Ciuta. Yehova wakuguzira ŵanthu ŵa mitundu yose ku cisopa caunenesko. (Yohane 6:44; Milimo 17:26, 27) Wakutegherezga na kuzgora malurombo gha ŵanthu wose awo ŵakumusopa kwambura kuwona mtundu, caru ico ŵakufumira, kwali mbakusambira panji yayi. (1 Mathemba 8:41-43) Tingaŵa na cigomezgo cose kuti para Yehova wakulaŵiska pa caru, wakuwona ŵanthu kuŵa mtundu umoza. Kasi mungatemwa kumanya vinandi vyakukhwaskana na Ciuta wambura kutemwera uyu?