Tiyelezgere kuti muli na nthenda yakofya ndipo mukukhumbikwira opareshoni. Mukwenera kumugomezga comene uyo wamucitaninge opareshoni, pakuti umoyo winu uŵenge mu mawoko ghake. Ipo cingaŵa camahara kuti musande usange wakuyimanya nadi nchito iyi.

Mwakuyana waka, mukwenera kucisanda makora cisopa cinu. Usange muli mu cisopa, ndikuti mwaŵika umoyo winu wauzimu mu mawoko gha cisopa ico. Ici cikusazgapo cigomezgo cinu cakuti muzakapone.

Yesu wakatipa fundo izo zingatovwira kumanya usange cisopa ico tilimo nchaunenesko panji yayi. Iyo wakati: “Khuni lililose likumanyikwa na cipambi cake.” (Luka 6:44) Mwaciyelezgero, para mungasanda cisopa cinyake cilicose, kasi mukuwonamo vipambi wuli? Kasi ŵalongozgi ŵa cisopa ico ŵakuŵika comene mtima pa ndalama? Kasi ŵanthu ŵa mu cisopa ico ŵakulondezga fundo za mu Baibolo pa nkhani ya nkhondo ndiposo kuŵa na nkharo yiwemi? Fumbo laumaliro, kasi cilipo cisopa ico mungacigomezga? Tikumupemphani kuti musande mwakupwelelera nkhani zakulondezgapo.