Pa December 3, 2023, Mubali Eduardo Martines, uyo wali mu Komiti ya Munthavi ku ofesi ya ku Brazil, wakayowoya nkhani yakujulira malo ghaphya yakusambizgirako Baibolo ku Cabreúva, Brazil. Nkhani iyi yikayowoyekera mu Holo Yakuchitiramo Maungano Ghakurughakuru. Ŵabali na ŵadumbu ŵakujumpha 2,400 ŵakaŵapo pa ungano uwu maso na maso ndipo ŵanthu ŵakujumpha 4,900 ŵakajoyina ku pulogiramu iyi kwizira pa videoconference.

Chomene pa malo agha pachitikirenge Sukulu ya Ŵapharazgi ŵa Ufumu na Sukulu ya Ŵalaŵiliri Ŵadera Pamoza na Ŵawoli Ŵawo. Pa nyengo yimoza pa malo agha pangachitikira makilasi ghatatu ndipo pa chaka ŵabali na ŵadumbu pafupifupi 600 ŵangachita masambiro agha.

Mu 2020, ŵabali ŵithu ŵakagura hotelo na kwamba kuyinozga kuti yiŵe malo ghakusambilirapo sukulu yakusambizga Baibolo. Ŵabali na ŵadumbu awo ŵakagwiranga ntchito iyi ŵakaŵa maso kulondezga vyose ivyo vikukhumbikwa kuti ŵajivikilire ku COVID-19 apo ŵakagwiranga ntchito yakunozga kuti paŵe makilasi ghatatu, vipinda vyakugona 54, chipinda cha kulyeramo, kweniso ofesi. Mulimo uwu wati wamara waka ŵakachita manozgero kuti paŵe chikondwelero. Chilato chake chikaŵa chakuti ŵanthu ku chigaŵa ichi kusazgapo ŵalara ŵaboma ŵaŵamanye makora Ŵakaboni ŵa Yehova kweniso sukulu yakusambizga ŵanthu Baibolo iyi. Mulara munyake wa boma uyo wakendera malo agha wakayowoya kuti: “Mulimo uwo mwachita apa ngwapachanya chomene. Para tikuchitira Chiuta mulimo unyake, ndimo vikwenera kuŵira nadi nthena.”

Mubali Rogério Braganholo, uyo wakagwirako ntchito iyi wakayowoya kuti: “Ntchakuwonekerathu kuti Yehova wakaŵa nase pa mulimo wose uwu. Para tikuwona umo wakatovwilira kuti timalizge mulimo uwu, vikutikumbuska mazgu agho ghali pa Salimo 127:1: ‘Kwambura kuti Yehova wazenga nyumba, awo ŵakuyizenga ŵakuphyokapo waka.’”

Takondwa kujulira malo ghaphya agha ghakusambizgirapo Baibolo agho ghawovwirenge ŵabali na ŵadumbu ŵanandi ku Brazil kuti ŵasazgireko luso pa nkhani ya “kusambizga mwaluso.”—Tito 1:9.