DECEMBER 2, 2020
NKHANI ZA PA CHARU CHOSE
Chimphepo Cha Hurricane Iota Chasakaza Vinthu ku Colombia Ndipo Chasazgiraposo Kusakaza Vinthu Vinyake Ku Central America na Mexico
Malo
Central America, Colombia, Mexico
Soka
Pa November 15 na 16, 2020, chimphepo chankhongono cha Hurricane Iota, chikasakaza vinthu ku vigaŵa vya kumpoto kwa Colombia, chomenechomene pa vilwa vya San Andrés na Providencia ku Caribbean Sea
Chimphepo ichi chikiza na vula iyo yikapangiska kuti maji ghatutuke kweniso kuti charu chambe kulindimuka.
Chimphepo cha Hurricane Iota chikaputa ku Nicaragua pa November 16, 2020, ndipo chikalutilira mu vigaŵa vinyake vya Central America, kusazgiraposo kusakaza vinthu ivyo vikasakazika na chimphepo cha Hurricane Eta kukwambilira kwa mwezi wa November.
Umo ŵabali na ŵadumbu ŵithu ŵakhwaskikira
Central America
Costa Rica
Ŵapharazgi 22 ŵakasamuka dankha mu nyumba zawo
Guatemala
Ŵapharazgi 93 ŵakasamuka dankha mu nyumba zawo
Honduras
Ŵapharazgi 1,531 ŵakasamuka dankha mu nyumba zawo
Ŵapharazgi ŵaŵiri ŵakapwetekeka pachoko waka
Nicaragua
Ŵapharazgi 75 ŵakasamuka dankha mu nyumba zawo
Panama
Ŵapharazgi 16 ŵakasamuka dankha mu nyumba zawo
Colombia
Mupharazgi yumoza ku Providencia wakaphyoka woko
Mupharazgi yumoza ku San Andrés wakapwetekeka pachoko waka
Mexico
Ku vigaŵa vya Tabasco na Veracruz, ŵapharazgi 1,248 ŵakasamuka dankha mu nyumba zawo
Vinthu ivyo vyanangika
Central America
Costa Rica
Nyumba 9 zikanangika
Guatemala
Nyumba 18 zikanangika
Nyumba za Ufumu 7 zikanangika pachoko waka
Nyumba za Ufumu ziŵiri zikanangika chomene
Honduras
Nyumba za Ufumu 7 zikanangika pachoko waka
Nyumba 227 zikanangika
Nicaragua
Nyumba 106 zikanangika
Nyumba za Ufumu zitatu zikanangika pachoko waka
Panama
Nyumba 5 zikanangika
Nyumba za Ufumu ziŵiri zikanangika chomene
Colombia
Malipoti ghakwambilira ghakulongora kuti nyumba zinandi za ŵabali ŵithu ku Providencia zili kunangika chomene ndipo Nyumba ya Ufumu yili kunangikirathu. Pasono kuyowoyeskana pa chilwa ichi nkhwakusuzga chomene, chifukwa chimphepo ichi chili kusakazirathu nthambo za telefoni na za magesi.
Nyumba 20 na Nyumba ya Ufumu yimoza zili kunangika pachoko waka ku San Andrés
Mexico
Nyumba 184 zili kunangika
Ntchito yakupeleka wovwiri
Komiti ya Munthavi ya Colombia yili kwimika Komiti Yakovwira Para Kwachitika Soka kuti yiwovwire ŵapharazgi. Komiti iyi pamoza na ŵalaŵiliri ŵa dera ŵakugwilira lumoza ntchito yakupeleka vyakukhumbikwa ku ŵabali na ŵadumbu na kuŵakhozga mwauzimu.
Ofesi ya Munthavi ya Central America yikimika Makomiti ghanayi Ghakovwira Para Kwachitika Soka kuti ghapeleke wovwiri ku awo ŵakakhwaskika na chimphepo cha Hurricane Eta na Iota ku Central America kweniso Mexico. Ŵalaŵiliri ŵa dera ŵakukhozga na kupeleka wovwiri unyake wakukhumbikwa ku mbumba izo zakhwaskika. Mwakusazgirapo, mipingo ya ku chigaŵa ichi yapeleka tumathumba 400 twa vyakurya ku ŵabali na ŵadumbu ŵawo ku Honduras na Nicaragua. Ŵabali na ŵadumbu ŵanyake awo ŵali kusamuka dankha mu nyumba zawo pasono ŵakukhala mu nyumba za Ŵakaboni ŵanyawo mu vigaŵa ivyo vindakhwaskike na soka ili
Ŵabali na ŵadumbu awo ŵakupeleka wovwiri ŵakuŵikapo mtima chomene kulondezga malango agho ghali kuŵikika chifukwa cha muliri wa COVID-19
Nangauli vingachitika yayi kuti ŵabali na ŵadumbu ŵithu ŵalekerethu kusangana na vinthu vyakofya mu charu ichi, vinthu nga ni masoka gha chilengiwa, kweni ŵali na chigomezgo chose mwa Chiuta withu, Yehova uyo ntchiphokwero chawo.—Salimo 142:5.