Pa October 6, 2022, tikwaniskenge vyaka 100 kufuma apo ofesi ya munthavi yakwamba yikajulikira ku Greece.

Mu mazuŵa ghithu ghano, ntchito ya kupharazga ku Greece yikamba mu 1905. Ŵakaboni ŵa Yehova ŵakaŵikapo mtima chomene pa ntchito ya kupharazga mu charu ichi, ndipo mu 1922, Mubali Joseph F. Rutherford wakakhazikiska ofesi ya munthavi yakwamba ku Athens. Mubali Athanassios Karanassios ndiyo wakaŵa wakwamba kwimikika kuŵa wakwimira ofesi. Ofesi iyi yikamba kupulinta mabuku gha Chigiriki mu 1936. Pamanyuma pa vyaka viŵiri, boma likaŵika dango ilo likapangiskanga ŵanthu kuchichizgika kusintha chisopa panji fundo izo ŵakwendera. Ivi vikapangiska kuti Mubali Karanassios wakakike mu 1939. Ofesi yakupulinta mabuku yikajalika, ndipo boma likapoka dankha nyumba izo mukaŵa maofesi kwa myezi yichoko waka. Kufuma apo, charu cha Greece nacho chikanjizgikamo mu Nkhondo Yachiŵiri ya pa Charu Chose, ndipo ŵasilikari ndiwo ŵakamba kuwusa, ivi vikapangiska kuti mabuku ghithu ghakanizgike kweniso kuti maofesi ghajalike.

Pamanyuma pa nkhondo, mu 1945, ŵabali awo ŵakalongozganga ntchito yakupharazga ŵakambiraso mulimo wawo boma lati lazomerezga waka ntchito yithu. Pati pajumpha vyaka viŵiri, Mubali Nathan H. Knorr wakaluta kukendera ŵabali ku Greece ndipo wakanozga ndondomeko yakukhazikiskaso maofesi ghithu ghaphya ku Tenedou Street ku Athens. Yehova wakatumbika kuyezgayezga kwawo. Kufika mu 1951, mu charu ichi mukaŵa ŵapharazgi 3,368, chiŵelengero ichi chikakwera na 26 peresenti kuyaniska na chaka chakumasinda.

Mu October 1954, ŵabali ŵakapatulira ofesi yiphya ku Kartali Street ku Athens. Ntchito yakupharazga yikalutanga panthazi nangauli kukaŵa nthambuzgo. Mu 1967, ŵasilikari ndiwo ŵakamba kuwusa charu cha Greece, ndipo maungano ghithu gha mpingo kweniso ntchito ya kupharazga, vikakanizgikaso.

Mubali Michalis Kaminaris na muwoli wake Eleftheria, ŵakateŵeteranga pa Beteli nyengo iyo ntchito yithu yikaŵa yakukanizgika. Mubali Kaminaris wakuti: “Pa nyengo iyi, tikazomerezgekanga yayi kupulinta mabuku pa Beteli, ntheura nyumba iyo tikakhalanga na muwoli wane ndiyo yikazgoka waka nga ni malo ghakuchitirako ntchito iyi. Eleftheria wakatayipanga magazini gha Gongwe la Mulinda na mashini ghanyake ghakale. Kuti malemba ghapulintike, wakaŵikangamo mapepara 10 ulendo umoza na kudidimizga chomene. Kufuma apo, mbwenu ine nkhatoranga mapepara agha na kughasona pamoza. Tikachitinga ivi mise yiliyose, ndipo tikagwiranga m’paka usiku pakati. Mu chipinda chapasi mukakhalanga mpolisi, kweni tikuzizwa kuti chifukwa wuli wakagonthapo yayi kuti chinyake chikuchitika.”

Chiŵelengero cha ŵapharazgi chikalutilira kukura nangauli milimo yithu yikaŵa yakukanizgika. Mu 1974, milimo yithu yati yazomerezgekaso, pakakhumbikwanga ofesi ya munthavi yikuru kuluska iyo yikaŵapo. Mu vyaka vyakulondezgapo, chiŵelengero cha ŵapharazgi chikalutilira kukura ku Greece ndipo ofesi nayo yikalutilira kusazgikirako. Ofesi ya munthavi yasono yili ku Drapetsona, Piraeus, ndipo ŵakayipatulira pa November 18, 2018. Pasono mu charu ichi muli ŵapharazgi 27,752.

Para tikuwona umo ntchito yikulutira panthazi ku Greece mu vyaka vyose 100 ivi, nangauli milimo yithu yikakanizgika kanandinandi waka, kukaŵa nkhondo, na nthambuzgo, tikusimikizga fundo yakuti palije icho chingatondeska Yehova ‘kufiska mulimo wake mu nyengo yake.’—Yesaya 60:22.