Mu August 2022, vikapharazgika kuti upharazgi wa ku nyumba na nyumba wambirengeso kuchitika ku Ukraine kweni mu vigaŵa vyekha ivyo vinthu viliko makora. Ŵabali na ŵadumbu ŵithu ŵakaŵa ŵakunweka kukapharazga. Ŵakasanga kuti ŵanthu ŵanandi ŵakategherezganga uthenga wa mu Baibolo. Munthu munyake uyo wakazomera kusambira Baibolo wakati: “Nati nawona umo ŵanthu ŵatambuliranga na masuzgo mu nyengo ya nkhondo, mbunenesko kuti Chiuta yekha ndiyo wangamazga masuzgo gha ŵanthu.” Wonani vinyake mwa ivyo vikachitikira ŵanji apo ŵakapharazganga.

Ruslan uyo wakufuma mu Mpingo wa Lanivtsi wakaŵa na wofi kuti wakambeso kupharazga nyumba na nyumba. Iyo na muwoli wake ŵakalomba kwa Yehova kuti waŵape chikanga kweniso kuti waŵalongozgere ku ŵanthu ŵakunweka kuti ŵaŵe na chilindizga chiwemi cha munthazi. Mbumba iyi yikazizwa kuwona kuti kwa maora ghaŵiri pera kufuma apo ŵakambira kupharazga, ŵakayowoya na ŵanthu 8 ndipo wose ŵakazomera kusambira Baibolo.

Apo Olia wakufuma mu Mpingo wa Kremenets wakapharazganga na munyake, mwanalume munyake wakaŵachimbilira na kuŵafumba usange ŵakuyowoya na ŵanthu nkhani zakukhwaskana na Mazgu gha Chiuta. Iyo wakati: “Nkhukhweŵa hona ndipo nkhumwaso chomene moŵa. Nkhumanya kuti sonosono apa nizamuzgora pamaso pa Chiuta. Kweni pa nyengo iyo, nkhukhumba yayi kuti nizakaŵe nga umo niliri pasono.” Ntheura ŵakanozga vyakuti ŵabali ŵa mu chigaŵa ichi ŵasambirenge nayo Baibolo.

Apo wakaŵa mu upharazgi mu muzi unyake pamoza na kagulu kake ka uteŵeti, Vasyl uyo wakufuma mu Mpingo wa Lviv-Riasne-Skhidnyi wakakumbuka nyumba ya mama munyake uyo wakayowoyapo nayo vyaka vyakumasinda. Wakakumbuka kuti mama uyu wakukhumba yayi kuyowoya na Ŵakaboni ŵa Yehova. Kweni wakagogoda pa mulyango na kuyowoya kuti wakusambira na ŵanthu Baibolo. Mwamwaŵi, mama mweneyura wakajura mulyango na kuyowoya kuti wakukhumba kupulikiska ivyo Malemba Ghatuŵa ghakuyowoya. Wakazomera kusambira Baibolo, ndipo ŵakapangana vyakuwelerakoso.

Serhii, uyo wakuwungana na Mpingo wa Illintsi, wakabatizika mu 2021 ndipo wakaŵa kuti wandapharazgepo nyumba na nyumba. Wakachitanga wofi, ntheura wakamaliranga nyengo yinandi kunozgekera. Serhii wakati: “Nkhawoneleranga mavidiyo ya umo tingapharazgira kanandi waka. Pamanyuma, nkhawona kuti icho nkhakhumbikwiranga mbwe ntchikanga.” Chakukondweska ntchakuti wakawona kuti kwenjerwa kura wakaŵa nako kukazgoka chimwemwe chikuru apo wakapharazganga makani ghawemi ku ŵanji.

Mwakuyana waka, Nikol, kufuma mu Mpingo wa Rozdil wakaŵa mupharazgi wambura kubatizika mu August 2022. Iyo wakati: “Nkhenjerwanga chomene kweniso nkhaŵa na wofi kupharazga maso na maso. Kweni nati nayezga, nkhajipulika makora chomene kuti nakwaniska kuyowoya na munthu vya Yehova maso na maso!”

Kufika pa November 11, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 46 ŵali kufwa

• Ŵapharazgi 97 ŵali kupwetekeka

• Ŵapharazgi 12,569 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu ichi

• Nyumba 590 zili kusakazikirathu

• Nyumba 645 zili kunangika chomene

• Nyumba 1,722 zili kunangika pachoko waka

• Nyumba za Ufumu 6 zili kusakazikirathu

• Nyumba za Ufumu 19 zili kunangika chomene

• Nyumba za Ufumu 63 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 53,948 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 25,983 awo ŵali kuchimbilira ku vyaru vinyake ŵakovwirika na Ŵakaboni ŵanyawo