Pa January 1, 2020, mbumba ya Beteli ya Britain yikamba kusamukira ku Chelmsford, Essex uko kuli kuzengeka ofesi yiphya. Kuzakafika kukwambilira kwa mwezi wa March 2020, ŵateŵeti ŵanyengozose ŵakujipeleka ŵazamuŵa kuti ŵali ku ofesi ya munthavi yiphya iyi.

Kufuma waka mu 1959, Ofesi ya Beteli ya Britain yikaŵa ku Mill Hill, London. Apo mulimo wakupharazga ukakuranga, ntchito iyo yikachitikanga pa ofesi iyi yikasazgikiranga ndipo pamanyuma nyumba zinyake zinandi zikagulika ku London. Ivi vikapangiska kuti paŵeso ntchito yinandi yakunozga nyumba izi, ndiposo mbumba ya Beteli yikeneranga kwendakwenda mu nyumba zakupambanapambana izi. Kwa vyaka vinandi ofesi ya Britain yikaŵaso na malo ghakupurintirako mabuku. Nyengo yinyake ofesi iyi yikapulintanga 10 peresenti ya mabuku ghithu pa charu chose. Ndipouli mu March 2018, pamanyuma pakuti ofesi ya Britain yapulinta mabuku kwa vyaka 92, malo ghakupulintira mabuku ghakajalika na kuguliskika. *

Ntchito yakuzenga ofesi ya munthavi yiphya ya Britain yikatora vyaka 5. Pasono madipatimenti ya ofesi ya munthavi ya Britain ghali pamoza ndipo ivi viwovwirenge kuti milimo pa ofesi iyi yendenge makora kweniso kuti ndalama zinandi zileke kusakazika. Pa ofesi yiphya iyi pali nyumba ziŵiri zakugwiliramo ntchito zakupambanapambana, maofesi, na nyumba zakukhalamo 6 izo zili na vipinda vyakuti ŵanthu ŵakujumpha 400 ŵangakhala. Paliso nyumba yakuchitiramo vinthu vyakupambanapambana nga nkhuryeramo na kuchitiramo maungano.

Pasono, ofesi ya munthavi ya Britain yikulaŵilira mulimo wakupharazga mu vigaŵa vyakupambanapambana, nga ni Falkland Islands, Guernsey, Ireland, Isle of Man, Jersey, na Malta. Ofesi ya munthavi yiphya sono yipangenge vinthu vyakuchita kutegherezga waka, mavidiyo na vinthu vya pa intaneti. Kweniso Ofesi iyi, yilutilirenge kupeleka wovwiri wauzimu ku ŵapharazgi ŵakujumpha 150,000 awo ŵakuteŵetera mu mipingo yakujumpha 1,800.

Ŵanthu ŵazamwamba kuzomerezgeka kukawona ofesi iyi kwamba pa April 6, 2020. Awo ŵizenge kuzakawona malo ŵazamukondwa kuwona vinthu vyakupambanapambana nga ni mbiri ya Baibolo ku Britain na Ireland kweniso umo Beteli yawovwilira kuti gulu la Yehova lilute panthazi.

Mubali Stephen Hardy, uyo wakuteŵetera mu Komiti ya Munthavi ya Britain, wakachitako mulimo wakuzenga ofesi iyi kufuma waka apo ukambira. Wakulongosora umo ŵabali na ŵadumbu ŵanandi ŵakajipulikiranga apo mulimo uwu ukachitikanga. Iyo wakati: “Yehova wakachiska ŵabali na ŵadumbu ŵanandi kuno ku Britain na mu vyaru vinyake kuti ŵachiteko mulimo wakuzenga. Ndipo ivyo vyachitika ndivyo tikakhazganga yayi, ntheura uchindami wose ukwenera kuluta kwa Yehova.”—Ŵaefeso 3:20.