DECEMBER 25, 2020
UNITED STATES
Ŵakulutilira Kovwira Ŵakayidi Kusambira Vya Yehova Nangauli Ŵakufumapo Yayi Panyumba Chifukwa cha Muliri
Apo ŵanthu ŵakakanizgika kuti ŵalutenge kukawonana na ŵakayidi ku majele gha United States chifukwa cha muliri wa COVID-19, Ŵakaboni ŵa Yehova ŵanandi nawo ŵakaleka kuluta ku majele kuti ŵakapeleke mabuku na kuchitiska masambiro gha Baibolo. Ivi vikapangiska kuti ŵakayidi masauzandi ghanandi ŵaleke dankha kusambira vya Yehova. Kweni ŵabali ŵithu ŵasintha nthowa zakupharazgira mwakuti ŵalutilire kupharazgira ŵakayidi kweni ŵakuchita nthena mwakulondezga malango agho ghakaŵikika chifukwa cha muliri wa COVID-19.
Mubali Dan Houghton, uyo wakovwirapo pakunozga upharazgi wa ku majele mu chigaŵa cha ofesi ya munthavi ya United States wakati: “Tikaŵafipiranga mtima chomene awo ŵakathembanga maulendo agho tikachitanga kuti ŵapulikiske Baibolo. Pasono ndipo ŵakutikhumba chomene kuluska kumasinda kose.”
Mwachiyelezgero, Mubali Micah Seierstad wakayimbira ŵalaraŵalara ŵa jele ku Vacaville, California, kuti wapemphe usange ŵangamuzomerezga kuŵatumira mavidiyo gha pulogiramu ya JW Broadcasting kuti ŵawonelerenge ku jele lawo. Wakazizwa chomene apo ŵalaraŵalara aŵa ŵakamuphalira kuti waŵatumire mavidiyo ghakuti ghangawoneskeka pa TV mu majele ghose 33 gha mu California. Ivi vikapangiska kuti Ungano Wachigaŵa wa 2020 wakuti ‘Sekelerani Nyengo Zose’! uwoneskeke mu tuvigaŵa twa maminiti 28 ku ŵakayidi pafupifupi 130,000.
Mubali Seierstad wakuti: “Ntchakukondweska chomene kuwona woko la Yehova. Para wakukhumba chinthu chinyake chichitike, palije icho chingamutondeska!”
Ŵabali ŵithu ŵakapulika kuti ŵalaraŵalara ŵa jele ku Sarasota, Florida ŵakukhumba kuti ŵasange mabuku ghakuti ŵapeleke ku ŵakayidi mwakuti ghaŵakhozgenge mu nyengo yakusuzga iyi. Ntheura ŵabali ŵithu ŵakajipeleka kuti ŵangaŵapa Mabaibolo na mabuku ghanandi ghakulongosora Baibolo mu Chingelezi na Chisipanishi. Ŵalaraŵalara aŵa ŵakazomera. Ŵabali ŵakanozgaso ndondomeko yakuti ŵachitiskenge masambiro gha Baibolo kwizira pa pulogiramu yinyake ya pa kompyuta. (videoconference) Mukayidi munyake wakalembera munthu uyo wakasambiranga nayo Baibolo mu nthowa iyi kuti: “Nkhukondwa chomene na ivyo mukuchita. Vikunovwira kuti niŵikepo mtima kuŵazga Baibolo. Pasono maghanoghano ghane pa ivyo vichitikenge munthazi ghasintha.”
Ŵalaraŵalara ŵa jele la ku Sarasota ŵakutora Mabaibolo 70 gha Chingelezi na Chisipanishi na mabuku ghakulongosora Baibolo 30 kunyumba kwa Mubali Manolo Rodriguez, uyo wakuŵawovwira kughapakira mu galimoto yawo
Tikukondwa chomene kuwona kuti kwali ni muliri panji viliŵa vya jele, vindamutondeske Dada withu wachitemwa, Yehova, kovwira ŵanthu kuti ŵamumanye makora.—Salimo 139:7-10.
