E, te hinaaro ra te Atua ia putuputu tatou no te haamori ia ˈna. Te parau ra te Bibilia: “E e manaˈo anaˈe te tahi i te tahi, a turai atu ai te tahi i te tahi ia faaite i te here e ia rave i te mau ohipa maitai roa, eiaha e faarue i ta tatou mau putuputuraa.”—Hebera 10:24, 25.

 Ua faaite Iesu e pǔpǔ faanahohia ta ˈna mau pǐpǐ, te na ô ra hoi oia: “I te mea e mea here outou te tahi i te tahi, e ite ïa te taata atoa e e pǐpǐ outou na ˈu.” (Ioane 13:35) No te mau Kerisetiano, mea faufaa ia putuputu ratou, tera te haapapuraa o to ratou here. Ua faanaho-atoa-hia ratou ei amuiraa i reira ratou e putuputu tamau ai no te haamori i te Atua. (Korinetia 1, 16:19) Ei pǔpǔ, e huitaeae ratou na te ao nei.—Petero 1, 2:17.

Aita e navai ia riro noa ei mero o te hoê haapaoraa

 Te parau ra te Bibilia e e haamori tatou i te Atua. Aita râ te Bibilia e parau ra e mauruuru te Atua no te mea e mero te hoê taata o te hoê haapaoraa. Te mea faufaa roa ˈˈe no ˈna, ia ohipa te reira i nia i to tatou oraraa. Te haapapu ra te Bibilia: “Te huru haamoriraa mâ e te viivii ore i te aro o to tatou Atua e Metua, teie ïa: ia aupuru i te mau otare e te mau vahine ivi i roto i to ratou ati, e ia ore ia viivii i teie nei ao.”—Iakobo 1:27, nota.