E nehenehe anei te Bibilia e tamahanahana ia ˈu?
Te pahonoraa a te Bibilia
E. (Roma 15:4) E hiˈopoa anaˈe i te tahi mau irava Bibilia tei tamahanahana e rave rahi taata tei faaruru e rave rau tupuraa peapea mau.
I roto i teie tumu parau
Te fifi
Salamo 23:4: “Ia haere au na te peho o te poiri rahi, eita vau e mǎtaˈu i te ino. Tei pihai iho hoi oe ia ˈu.”
Auraa: Ia pure oe i te Atua e ia imi oe i ta ˈna aratairaa i roto i te Bibilia, e nehenehe oe e faaruru i te mau fifi atoa ma te itoito.
Philipi 4:13: “E puai to ˈu ia faaruru i te mau mea atoa maoti tei horoa mai i te puai.”
Auraa: E nehenehe te Atua e horoa i te puai ta oe e hinaaro mau no te faaoromai i te mau fifi atoa.
Ia pohe tei herehia
Koheleta 9:10: “Aita hoi e ohipa, e opuaraa, e ite e e paari i te Apoo.”
Auraa: Aita te feia pohe e mauiui ra e aita ratou e nehenehe e haamauiui ia tatou. Aita ratou i ite i te tahi mea.
Ohipa 24:15: “E tia-faahou-raa to te feia parau-tia e to te feia parau-tia ore.”
Auraa: E nehenehe te Atua e faatia mai te feia herehia e tatou.
Te faahapa-noa-raa ia tatou iho
Salamo 86:5: “Mea maitai hoi oe e Iehova, a e ua ineine i te faaore i te hara. E here taiva ore rahi to oe i te feia e tiaoro ra ia oe.”
Auraa: E nehenehe te Atua e faaore i te hara a te feia o tei tatarahapa mau e o tei faaoti papu i te ore e rave faahou i te reira.
Salamo 103:12: “Mai te atea o te hitiraa mahana i te toparaa mahana, mai te reira atoa oia ia faaatea i ta tatou mau hara ia tatou nei.”
Auraa: Ia faaore te Atua i ta tatou mau hara, e faaatea ê roa oia i te reira ia tatou. Aita o ˈna e haamanaˈo faahou i ta tatou mau hara. Aita atoa o ˈna e faaohipa te reira no te faahapa aore ra no te haava ia tatou.
Te oto
Salamo 31:7: “Ua ite hoi oe i to ˈu ati. Ua ite oe i to ˈu ahoaho rahi.”
Auraa: Te ite maitai ra te Atua eaha ta oe e faaruru ra. Te taa ra ia ˈna eaha to oe mau huru aau, noa ˈtu aita hoê aˈe e nehenehe e taa i te reira.
Salamo 34:18: “Tei pihai iho Iehova i te feia o te mauiui ra, te faaora nei oia i te feia aau oto.”
Auraa: Ia mauiui noa ˈtu oe, te fafau ra te Atua i te tauturu ia oe. E nehenehe oia e horoa ia oe i te puai no te faaruru i te oto.
Te maˈi
Salamo 41:3: “Eita Iehova e faarue ia ˈna i nia i to ˈna roˈi a maˈihia ˈi oia.”
Auraa: E nehenehe te Atua e tauturu ia oe ia faaruru i te maˈi ma te horoa ˈtu i te hau o te feruriraa, te puai, te faaoromai tamau e te paari no te rave i te mau faaotiraa maitai.
Isaia 33:24: “Aita e taata e parau: “E maˈi to ˈu.””
Auraa: Te fafau ra te Atua e fatata roa te huitaata i te fanaˈo i te ea tia roa.
Te ahoaho rahi
Salamo 94:19: “I te rahi-roa-raa to ˈu ahoaho, Ua tamahanahana e ua tamǎrû oe ia ˈu.”
Auraa: Ia turui tatou i nia i te Atua i te taime ahoaho, e nehenehe o ˈna e tauturu mai ia vai hau noa.
Petero 1, 5:7: “A huri ai i to outou mau ahoaho atoa i nia ia ˈna, no te mea te haapeapea mai ra oia no outou.”
Auraa: Te tâuˈa ra te Atua ia faaruru tatou i te fifi. Te titau mai ra oia ia faaite atu eaha ta tatou e faaruru ra na roto i te pure.
Te tamaˈi
Salamo 46:9: “Te faaore nei oia i te mau tamaˈi ati aˈe i te fenua.”
Auraa: Fatata roa te Faatereraa arii a te Atua i te faaore roa i te mau tamaˈi atoa.
Salamo 37:11, 29: “E fatu râ te feia mǎrû i te fenua, e e au roa ratou i te rahi o te hau. . . . E fatu te feia parau-tia i te fenua, e e parahi ratou i nia iho e a muri noa ˈtu.”
Auraa: E fanaˈo te feia maitatai i te hau i nia i te fenua e a muri noa ˈtu.
Te haapeapearaa no a muri aˈe
Ieremia 29:11: “‘Ua ite maitai hoi au i te mau manaˈo ta ˈu e manaˈo ra no outou,’ te parau ra Iehova, ‘e manaˈo hau, e ere i te manaˈo ati, no te horoa ˈtu i te tahi oraraa no a muri aˈe e te tahi tiaturiraa.’”
Auraa: Te haapapu ra te Atua i ta ˈna mau tavini e e nehenehe ratou e tiaturi i te hoê a muri aˈe oaoa mau.
Apokalupo 21:4: “E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”
Auraa: Te fafau ra te Atua i te faaore i te mau mea ino atoa ta oe e ite ra i teie mahana.
a O Iehova te iˈoa o te Atua. (Salamo 83:18) A hiˈo i te tumu parau “O vai o Iehova?”
E au atoa outou . . .
TE PARE TIAIRAA
E nafea oe e faufaahia ˈi a ite ai e te tâuˈa ra te Atua ia oe
Te tauturu mai ra te Bibilia ia faatupu i te faaroo i ta te Atua parau fafau no nia i te tau a muri aˈe oaoa.
TE PAHONO RA TE BIBILIA
Ihea vau e nehenehe ai e ite i te tiaturiraa?
E nehenehe e tiaturi i te Bibilia no te haamaitai i to tatou oraraa i teie nei e e horoa te reira i te hoê tiaturiraa no a muri aˈe.
TUMU PARAU RAU
Tamahanahanaraa no te feia e oto ra
Ia pohe anaˈe tei herehia e tatou, e manaˈo tatou e aita vetahi e taa ra i to tatou mauiui. Area te Atua, oia ïa e e nehenehe oia e tauturu ia tatou.
TE PARE TIAIRAA
Ia ore oe e nehenehe faahou e faaoromai
Mea hoona ia ora noa ˈtu eaha te ati e tupu mai.
HAAPIIRAA TUMU
No te aha te Atua e vaiiho noa ’i te mauiui?
E rave rahi te ui nei no te aha mea rahi te ino e te mauiui na te ao nei. Te horoa ra te Bibilia i te hoê pahonoraa tamahanahana mau.
HAAPIIRAA BIBILIA
Tamata i te haapiiraa Bibilia
A ani te hoê haapiiraa Bibilia e te hoê taata haapii.