E, e tauturu te Atua i te taata aau haavare ore mai te peu e ani ratou i te mau mea ia au i to ˈna hinaaro. Te faahiti ra te Bibilia i te taata o tei pure i te Atua ma te parau: “E tauturu mai oe ia ˈu.” Noa ˈtu aita oe i pure aˈenei i te Atua, e nehenehe te reira e faaitoito ia oe. Ei hiˈoraa:

•   “E tauturu mai oe ia ˈu e tau Atua . . . e faaora oe ia ˈu i to ihora aroha.”—Salamo 109:26, Te Bibilia Moˈa ra.

•   “Mea paruparu râ vau e mea veve. E te Atua e . . . O oe ta ˈu tauturu.”—Salamo 70:5.

 Oia mau, e faaroo puai to teie taata papai Salamo. Tera râ, te faaroo atoa ra te Atua i te mau taata tei pure ia ˈna ma te aau tae mai “te feia o te mauiui ra” aore ra “te feia aau oto.”—Salamo 34:18.

 Eiaha oe e manaˈo e aita te Atua e tâuˈa ra ia oe aore ra aita oia e ite ra i to oe mau fifi. Te na ô ra te Bibilia: “Teitei noa ˈtu Iehova, te ite nei râ oia i te feia haehaa, area te feia teoteo, ei te atea ê noa oia ia ratou.” (Salamo 138:6) Inaha, ua parau Iesu i ta ˈna mau pǐpǐ: “Ua taio-pauroa-hia te rouru o to outou upoo.” (Mataio 10:30) E ite maitai ra te Atua i te mau mea atoa no nia ia oe, noa ˈtu aita oe e ite ra. Hau atu â, te faaroo ra o ˈna ia pure oe no ta oe mau haapeapearaa.—Petero 1, 5:7.