No vetahi, i muri aˈe e rave rahi matahiti to ratou iteraa e ere roa ˈtu to ratou haerea i te mea maitai, tei roto atoa vau. Ua fanauhia vau i Barcelone, te piti o te oire rahi i Paniora, ua paari au i Somorrostro, ua matauhia tera vahi no te ohipa ino e te hooraa i te raau taero.

 E iva matou tamarii, o vau te matahiapo. Mea veve roa matou, no reira i te 10raa o to ˈu matahiti, ua ohipa vau ei taata ohi popo i roto i te hoê pǔpǔ tairi popo. I te mau mahana atoa e ohipa vau ahuru hora, aita ïa vau i nehenehe e haere i te haapiiraa. I te 14raa o to ˈu matahiti, ua rave au i te ohipa i te hoê vahi hamaniraa metara.

 I 1975, ua titauhia ia ˈu ia rave i ta ˈu tau faehau. No to ˈu hinaaro e rave i te hoê mea faahiahia i roto i to ˈu oraraa, faaô atura vau i roto i te nuu Paniora i Melilla i Afirika apatoerau. I ǒ, ua topa roa vau i roto i te raau taero e te ava.

 I to ˈu hoˈiraa i Barcelone, ua haamau vau i te hoê pǔpǔ taparahi taata, e eiâ matou i te mau mea atoa, a hoo faahou atu ai i te reira ia noaa mai te moni no te hoo mai i te raau taero. Haamata ˈtura vau i te rave i te raau taero puai aˈe, i te rave i te peu taiata, i te inu hua i te ava e i te hauti pere. I muri mai ua riro roa vau ei taata ino! E tipi nainai, e toˈi e e tipi rahi ta ˈu, ia titauhia e faaohipa roa vau i te reira.

 I te hoê mahana, ua eiâ matou i te hoê pereoo, tapapa mai nei te mutoi! I muri aˈe fatata 30 kilometera te atea, haamata mai nei ratou i te pupuhi, û ihora to matou pereoo e horo ê atura matou. I to to ˈu papa faarooraa i tera parau, ua tiahi oia ia ˈu i rapae i te fare.

 I te roaraa e pae matahiti, aita faahou to u e fare! I taoto na vau i te mau uputa, i roto i te pereoo, te mau aua e i nia i te mau menema, i ora atoa na vau i roto i te hoê ana. Aita ta ˈu e fa e manaˈo atura mea faufaa ore au! A rave ai i te raau taero, i otioti na vau i to ˈu na rima, tae roa mai i teie mahana te vai noa ra teie mau pêpê.

 I te 28raa o to ˈu matahiti, ua tii mai to ˈu mama ia ˈu no te hoˈi i te fare, ua farii au e ua na ô atu ia ˈna e taui au. Ua titauhia râ te taime no te tapea i ta ˈu parau!

 I te hoê mahana, ua haere mai e piti Ite no Iehova i te fare. A faaroo noa ˈi au ia raua, tuhi mai nei to ˈu papa ia tamau i tera opani, aita roa ˈtu râ vau i faaroo! Ua horoa mai raua e toru buka e ua farii au. Ua ani atoa vau ihea roa ratou e putuputu ai, e tau mahana i muri iho, haere atura vau i te Piha a te Basileia!

 Te mea matamua ta ˈu i tapao a tae ai i ǒ, o te faaahuraa ïa, mea mâ te taatoaraa, area vau e rouru roa e huruhuru taa verevere e e ahu reporepo to ˈu. Haamâ ˈtura vau e faaea ihora i rapae mai! Ua hitimahuta roa vau i to ˈu iteraa i to ˈu hoa tahito, o Juan, matou hoi i roto i te pǔpǔ taparahi taata! Ua taui roa to ˈna faaahuraa, e ahu maitai to ˈna, i muri mai to ˈu iteraa, ua riro mai oia ei Ite no Iehova. A ite ai ia ˈna, aita faahou vau i taiâ, ineine atura vau i te haere i roto e i te apiti i te putuputuraa, e mai reira mai to ˈu oraraa i te tauiraa.

 Ua farii au i te haapii i te Bibilia e ua taa oioi ia ˈu, ia hinaaro vau ia farii maitai te Atua ia ˈu, e titauhia ia taui to ˈu haerea ino e te tia ore. E titauhia ïa ia taui a faaapî ai i to ˈu feruriraa, e ere roa ˈtu râ i te mea ohie! (Roma 12:2) Ua putapû roa vau i te aroha hamani maitai o te Atua. Noa ˈtu ta ˈu mau hape atoa, ua horoa mai Iehova i te ravea ia nehenehe au e taui roa i to ˈu oraraa! Te mau mea atoa ta ˈu i haapii no nia ia Iehova, tei roto ïa i te hohonuraa o to ˈu aau. E ua itehia ia ˈu te vai ra te hoê Atua poiete o te tâuˈa mau ra ia ˈu.—Petero 1, 5:6, 7.

 Na te reira i tauturu ia ˈu ia rave i te mau tauiraa i roto i to ˈu oraraa. Teie te tahi hiˈoraa, a hiˈopoa ˈi au i te parau no te avaava i roto i ta ˈu haapiiraa Bibilia, ua na ô vau ia ˈu iho: “Te hinaaro ra Iehova ia vai mâ e ia vai viivii ore noa vau i roto i te mau mea atoa, e titauhia ïa ia haavaravara i tera avaava!” Hue atura vau i te reira i roto i te farii pehu!—Korinetia 2, 7:1.

 Ua titau-atoa-hia ia ˈu ia faaea i te rave e i te hoo i te raau taero, no te rave râ i teie mau tauiraa ua titauhia te taime e te tutavaraa. Ua taa atoa ia ˈu ia hinaaro vau e haere mua i te pae varua, e titauhia ia ore e amuimui faahou e to ˈu mau hoa tahito. I muri mai, ua tiaturi atu â vau i te Atua e i to ˈu mau hoa apî i roto i te amuiraa. Ua putapû roa vau i to ratou here e to ratou tâuˈa-mau-raa ia ˈu, aita roa hoi au i matau i te reira! I muri mai e rave rahi avaˈe, ua faaea roa vau i te rave i te raau taero e ua ahu mai i te huru taata apî a fanaˈo atoa ˈi i te farii maitai a te Atua. (Ephesia 4:24) I Atete 1985, ua bapetizohia vau ei Ite no Iehova!

 Maoti te Bibilia, ua tiamâ mai au i te hoê huru oraraa viivii e i te mau faahopearaa ino mau no to ˈu tino e to ˈu feruriraa! I roto i to ˈu mau hoa tahito, ua hau atu 30 o ratou tei pohe no te maˈi heˈa mate aore ra te raau taero. Auê au i te mauruuru i te mea maoti to ˈu faaohiparaa i te mau faaueraa Bibilia, ua ora mai au i tera mau faahopearaa ino mau!

 Ua vaiiho vau i ta ˈu tipi e ta ˈu toˈi ta ˈu i faaohipa na ei taparahi taata. Aita roa ˈtu vau i manaˈo e, i te hoê mahana e taui au i te reira e te hoê Bibilia no te tauturu i te taata. I teie mahana, te tavini nei mâua ta ˈu vahine ei tavini taime taatoa no Iehova!

 Aita to ˈu na metua i riro mai ei Ite no Iehova, ua oaoa roa râ raua i te iteraa i te mau maitai ta ˈu i fanaˈo na roto i te haapiiraa i te Bibilia! Ua paturu noa papa i te mau Ite no Iehova i mua i to ˈna mau hoa ohipa, ua ite mata roa hoi oia i te mau tauiraa ta ˈu i rave no te hoê oraraa maitai aˈe. I parau atoa hoi to ˈu mama no te aha vau i ore ai i haapii oioi i te Bibilia! E, parau mau roa tera mama!

 A hiˈo ai to ˈu huru oraraa i tahito, Ua haapii au e mea maamaa roa ia imi i te oaoa i roto i te mau raau taero e te tahi atu mau peu. I teie nei te oaoa mau nei au i te tauturu i te taata ia ite atoa i te parau a te Atua, tei faaora mai ia ˈu!