I te roaraa o na 28 matahiti i mairi, ua hau atu 11 000 Ite no Iehova tei faarue i to ratou fare, oia atoa fenua no te apiti i te ohipa paturaa i roto tau 120 fenua. Ua oaoa te taatoaraa i te faaohipa i to ratou aravihi e taime taatoa ma te tamoni ore.

Mea rahi, na ratou iho i aufau i to ratou tere. Ua faataa vetahi i ta ratou tau faafaaearaa e ua ani te tahi atu i te taime faaearaa ohipa a haapae atu ai i te fanaˈo i te moni rahi.

Aita ratou i faahepohia ia rave i tera mau haapaeraa. Na ratou iho â i faaoti e paturu i te ohipa pororaa i te parau apî oaoa o te Basileia na te ao. (Mataio 24:14) Ua hamani ratou i te mau piha ohipa, fare nohoraa e vahi neneiraa i te mau Bibilia e papai Kerisetiano. Ua patu atoa te mau Ite no Iehova i te mau Piha tairururaa e nehenehe e ô 10 000 parahiraa e te mau Piha a te Basileia, hau atu 300 parahiraa.

Te tamau noa ra ratou i te rave i tera ohipa. Ua tae anaˈe tera mau Kerisetiano i te vahi paturaa, na te amaa o tera fenua e haapao i te nohoraa, te maa, te puˈaraa ahu e te tahi atu mau hinaaro o te mau mahana atoa. E apiti atoa te mau Ite o tera fenua ma te oaoa i te ohipa paturaa.

No te faanaho e no te tiaau i tera ohipa rahi, ua haamauhia te tahi faanahoraa na te ao atoa nei i 1985. O te mau Ite no Iehova, mai 19 e tae atu 55 matahiti e tei haa ê na no te tahi ohipa paturaa te fariihia ei rima tauturu. E pinepine, no te hoê maororaa e piti hebedoma e tae atu toru avaˈe ta ratou ohipa. I te tahi râ taime, e nehenehe te reira e maoro atu â, hoê matahiti aore ra hau atu.

Ua faaineinehia te mau vahine a te mau rima tauturu no te rave i te mau ohipa mai te taamuraa i te mau auri, te tapiriraa i te mau faaneheneheraa no te tahua aore ra no te haamoremore e no te peni i te mau papai. E tauturu te tahi atu ia faaineine i te maa no te feia rave ohipa aore ra no te tamâ i to ratou nohoraa.

Hou a hoˈi ai i to ratou fenua, ua papai vetahi no te faaite i to ratou mauruuru i te apitiraa i te ohipa paturaa. Ua faataa na hoa faaipoipo i to raua mauruuru rahi no te fanaˈoraa taa ê e rave i te ohipa i te amaa i Budapest. Ua putapû mau raua i te here e te mauruuru ta te mau Ite no Honegeria i faaite! E ere roa ˈtu i te mea ohie ia vaiiho ia ratou i muri aˈe hoê avaˈe e ua opua ïa e hoˈi i ǒ tau avaˈe i muri aˈe. Ua na ô raua: “I te mau taime atoa e fariihia mâua no te tahi ohipa, ua riro te reira ei avaˈe maitai roa ˈˈe o to mâua oraraa!”