I muri aˈe i to ˈna faahaparaa i te mau Pharisea no te haapaoraa i ta ratou iho mau tutuu, reva ˈtura Iesu e ta ˈna mau pǐpǐ na Turia e Sidona i Phenikia e rave rahi kilometera i te pae apatoerau tooa o te râ.

Itea maira ia Iesu te hoê fare i reira e faaea ˈi, aita râ i hinaaro ia ite te taata e to reira oia. Ua itehia râ oia. Farerei maira te hoê vahine Heleni tei fanauhia i taua fenua ra ia Iesu e taparu maira: “Aroha mai ia ˈu, e te Fatu, Tamaiti a Davida. Ua uruhia ta ˈu tamahine e te demoni o te haamauiui nei ia ˈna.”—Mataio 15:22; Mareko 7:26.

I muri iho, na ô maira te mau pǐpǐ ia Iesu: “A parau ia ˈna ia haere, te pii noa mai ra hoi oia.” Faataa ˈtura Iesu i te tumu i ore ai oia i tâuˈa i teie vahine: “Aita vau i tonohia i te mau taata atoa, i te mau mamoe anaˈe râ tei moˈe o te utuafare o Iseraela.” Aita râ te vahine i tuu. Tapiri maira oia e tahopu ihora ia Iesu a taparu ai: “E te Fatu, a tauturu mai ia ˈu!”—Mataio 15:23-25.

E au ra e no te tamata i to ˈna faaroo, faahiti atura Iesu i te manaˈo tano ore o te ati Iuda i te feia nunaa ê: “E ere mea maitai ia rave i te faraoa a te mau tamarii, a horoa ˈtu ai na te mau fanauˈa urî.” (Mataio 15:26) Ma te parau “fanauˈa urî,” te faaite ra Iesu i to ˈna here i te feia e ere i te ati Iuda. Eita e ore e ua ite-atoa-hia te reira i nia i to ˈna hohoˈa mata e na roto i te mǎrû o to ˈna reo.

Aita te vahine i huru ê. Faahiti faahou atura râ oia i te manaˈo tano ore o te ati Iuda i te feia nunaa ê a parau ai ma te haehaa: “Oia mau e te Fatu, e amu atoa râ te mau fanauˈa urî i te mau huˈahuˈa faraoa e topa mai nia mai i te amuraa maa a to ratou fatu.” Taa ihora ia Iesu te maitai o to ˈna aau e pahono atura: “E faaroo rahi to oe. Ta oe e hinaaro, ia tupu ïa.” (Mataio 15:27, 28) Ua tupu iho â ta ˈna i hinaaro, noa ˈtu aita te tamahine i pihai iho mai. I to te vahine hoˈiraa i ǒ ˈna, ite ihora oia i ta ˈna tamahine e tarava ra i nia i te roˈi, ua ora roa, inaha “ua reva te demoni.”—Mareko 7:30.

Mai Phenikia ˈtu, reva ˈtura Iesu e ta ˈna mau pǐpǐ e tae roa i te anavai Ioridana. E au ra e ua haere ratou i te tahi atu pae o Ioridana i te pae apatoerau roa o te miti o Galilea e tae atura i Dekapoli. Pauma aˈera ratou i nia i te hoê mouˈa, itehia maira râ ratou e te nahoa. Afai maira te taata ia Iesu ra i te pirioi, te huma mero, te matapo e te vava. Tuu maira ratou i teie feia maˈi i te pae avae o Iesu, e faaora ihora oia i to ratou mau maˈi. Maere ihora te taata, e faahanahana aˈera i te Atua o Iseraela.

Ua haapao iho â râ Iesu i te hoê tane tariˈa turi mea fifi atoa no ˈna ia paraparau. Ua taa noa iho â ia oe to ˈna huru i rotopu i te hoê nahoa rahi. No to Iesu paha iteraa i to ˈna taiâ, faaatea ê atura oia ia ˈna. O raua anaˈe, faaite atura Iesu eaha ta ˈna e rave no ˈna. Tuu atura Iesu i to ˈna na manimani rima i roto i na tariˈa o te tane, tutuha ihora e tapea ˈtura i to ˈna arero. A hiˈo ai Iesu i nia i te raˈi, na ô atura oia: “‘Ephata,’ teie te auraa ‘Ia matara oe.’” Faaroo ihora te tariˈa o te tane, e afaro atura ta ˈna paraparau. Aita Iesu i hinaaro ia faaitehia te reira, mea au aˈe hoi na ˈna ia tiaturi te taata ia ˈna no ta ratou iho i ite e i faaroo.—Mareko 7:32-36.

“Maere roa ihora” te taata i to ratou iteraa i te mana o Iesu e faaora i tera mau maˈi. Parau atura ratou: “E ohipa faahiahia anaˈe ta ˈna i rave, ia ˈna hoi e faaroo ai te tariˈa turi e e paraparau ai te vava.”—Mareko 7:37.