HAAPIIRAA 10
E nafea e itehia ˈi te haamoriraa mau?
1. Hoê anaˈe anei haapaoraa mau?
“A ara i te mau peropheta haavare.”—MATAIO 7:15.
Hoê anaˈe haapaoraa ta Iesu i haapii i ta ˈna mau pǐpǐ, te haapaoraa mau. E au te reira i te hoê eˈa e tae atu ai i te ora mure ore. Ua parau Iesu e “aita i rahi te taata o te ite atu i taua eˈa ra.” (Mataio 7:14) O te haamoriraa noa tei niuhia i nia i ta ˈna Parau te Bibilia ta te Atua e farii. Mea tahoê te feia haamori mau atoa i roto i te hoê â faaroo.—A taio i te Ioane 4:23, 24; 14:6; Ephesia 4:5.
A hiˈo i te video Te farii ra anei te Atua i te mau huru haamoriraa atoa?
2. Eaha ta Iesu i faaara i te mau Kerisetiano?
“Te parau roa ra ratou e ua ite ratou i te Atua, aita nei râ ia au i ta ratou mau ohipa.”—TITO 1:16.
Ua faaara Iesu i te mau Kerisetiano e e tia mai te mau peropheta haavare. Ia hiˈohia ˈtu, e au ratou i te feia haamori mau e parau ra e e Kerisetiano ratou. E nehenehe râ oe e ite e e ere roa ˈtu. E itehia o vai te mau Kerisetiano mau ia au i to ratou mau huru maitatai e ta ratou mau ohipa. O ratou te feia haamori mau.—A taio i te Mataio 7:13-23.
3. E nafea e itehia ˈi te feia haamori mau?
Teie e pae ravea:
-
E faatura te feia haamori mau i te Bibilia ei Parau na te Atua. Te faaitoito nei ratou i te faaohipa i te mau aratairaa Bibilia. Aita ïa te haapaoraa mau i niuhia i nia i te mau manaˈo taata. (Mataio 15:7-9) Te ora nei ratou ia au i ta ratou e haapii ra ia vetahi ê.—A taio i te Ioane 17:17; Timoteo 2, 3:16, 17.
-
E faatura te mau pǐpǐ mau a Iesu i te iˈoa o te Atua, Iehova. Ua faatura Iesu i te iˈoa o te Atua ma te faaite haere i te reira. Ua tauturu oia i te taata ia ite i te Atua e ua haapii atu ia pure ia moˈa te iˈoa o te Atua. (Mataio 6:9) I te vahi ta oe e faaea ra, teihea haapaoraa e faaite haere ra i te iˈoa o te Atua?—A taio i te Ioane 17:26; Roma 10:13, 14.
-
E poro te mau Kerisetiano mau i te Faatereraa arii a te Atua. Ua tono mai te Atua ia Iesu e poro i te parau apî oaoa o te Faatereraa arii. Tera te tiaturiraa hoê roa no te huitaata. Ua poro Iesu i te Faatereraa arii e tae noa ˈtu i to ˈna poheraa. (Luka 4:43; 8:1; 23:42, 43) Ua parau oia e e poro ta ˈna mau pǐpǐ i te reira. Ia paraparau te hoê taata no nia i te Faatereraa arii a te Atua, eaha ïa ta ˈna haapaoraa?—A taio i te Mataio 24:14.
-
E ere te mau pǐpǐ a Iesu no teie nei ao ino. E nehenehe oe e ite o vai ratou no te mea aita ratou e faaô nei i roto i te poritita aore ra te mau aroraa totiare. (Ioane 17:16; 18:36) Aita atoa ratou e rave nei i te mau peu ino a teie nei ao.—A taio i te Iakobo 4:4.
-
Mea here roa na te mau Kerisetiano mau te tahi i te tahi. Ua haapii ratou i roto i te Bibilia ia faatura i to te mau opu atoa. E pinepine te mau haapaoraa hape i te turu roa i te tamaˈi a te mau nunaa. Area te feia haamori mau, aita ïa. (Mika 4:1-3) Te faaohipa noa nei te mau Kerisetiano mau i to ratou taime e ta ratou mau faufaa no te tauturu e te faaitoito ia vetahi ê.—A taio i te Ioane 13:34, 35; Ioane 1, 4:20.
4. Eaha ˈtura te haapaoraa mau?
I to oe manaˈo, teihea haapaoraa e niu ra i ta ˈna mau haapiiraa atoa i nia i te Parau a te Atua, e faatura ra i te iˈoa o te Atua e e poro haere ra i te Faatereraa arii a te Atua ei tiaturiraa hoê roa no te huitaata? O vai ma te faaite ra i te here, a ore atu ai e apiti i te tamaˈi?—A taio i te Ioane 1, 3:10-12.
