TUMU PARAU MATAMUA
No te aha e faaoromai ai?
AHIRI oe i farerei ia Diana, a e parau oe e e vahine maramarama, maitai e paraparau i te taata atoa. Te huna ra râ te huru rapaeau o Diana i te tahi hepohepo rahi. Tau mahana, hebedoma e i te tahi taime tau avaˈe, e manaˈo noa oia e mea faufaa ore o ˈna. Te na ô ra Diana, “aita e mahana e ore ai au e feruri i te pohe. No ˈu, mea maitai aˈe ia pohe au.”
“Ua faaite te tahi hiˈopoaraa no te feia atoa i haapohe ia ratou e e 200 taata tei tamata e e 400 [atu â] tei manaˈo ê na e na reira.”—THE GAZETTE, MONTRÉAL, KANADA.
Te parau ra Diana e eita roa ta ˈna e nehenehe e haapohe ia ˈna. I te tahi râ taime, e manaˈo oia e aita e faufaa ia ora. Te na ô ra o ˈna, “e hinaaro rahi to ˈu e pohe i roto i te hoê ati. Te manaˈo nei au e mea maitai te pohe, e ere te reira i te enemi.”
E rave rahi tei feruri mai ia Diana e te vai ra vetahi tei manaˈo aore ra tei tamata roa i te haapohe ia ratou. Ua faaite te feia hiˈopoa e aita te rahiraa o ratou i hinaaro mau e pohe, ua opua râ e faaore i to ratou mau mauiui. Ma te ite ïa i te tumu ratou i hinaaro ai e pohe, e nehenehe ratou e tauturuhia ia haafaufaa i te ora.
Te hinaaro ra anei oe e haapohe ia oe? A hiˈopoa na e toru tumu no te haafaufaa i te ora.
a Ua tauihia te iˈoa.
