Uiraa a te feia taio . . .

Ia apiti anei au i te hoê pǔpǔ haapaoraa?

▪ Te taiâ ra anei oe i te apiti i te hoê pǔpǔ haapaoraa no to oe taahoa i te haavare e te amahamaha o te feia haere pure e te pǔpǔ ekalesiatiko atoa? Mai te peu e e, e farii oe i teie parau paari Farani “Te taata piri i te fare pure, e pinepine i te atea i te Atua.”

Mea faufaa paha te Bibilia no oe e te manaˈo ra oe e ia faatura te mau faatereraa e te taata i to oe tiaraa e apiti i te hoê pǔpǔ haapaoraa. E ui paha oe, ‘Ua parau iho â anei te Atua e ia riro te feia e hinaaro e haamori ia ˈna ma te au ei melo o te hoê haapaoraa faanahohia e tia ˈi?’

Ma te haapoto noa, e. Eaha te haapapuraa? E e fariihia anei te mau haapaoraa faanahohia atoa?

A hiˈo na ia Iesu. E melo anei o ˈna no te hoê haapaoraa faanahohia? I to ˈna apîraa, ua apee Iesu i to ˈna utuafare fetii ati Iuda e te tahi atu tei matau i te haere i te hiero i Ierusalema no te haamori i te Atua mai tei faanahohia. (Luka 2:41-43) Ei taata paari, ua amui oia i te mau ati Iuda no te haamori i te Atua i roto i te sunago. (Luka 4:14-16) Teie ta ˈna i parau i te hoê vahine haapaoraa ê: “Ua ite matou i ta matou e haamori nei.” (Ioane 4:22) Ua faaite maitai Iesu e e melo o ˈna no te tahi huru haapaoraa ati Iuda.

I muri aˈe, ua parau Iesu e no te mea ua faarue te nunaa ati Iuda ia ˈna e faarue ïa te Atua i ta ratou huru haamoriraa viivii. (Mataio 23:33–24:2) Ua faaite râ oia e ia riro te feia e hinaaro e haamori i te Atua ma te au ei melo o te hoê pǔpǔ faanahohia. Ua na ô oia i ta ˈna mau pǐpǐ: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) Ia amui te hoê pǐpǐ a te Mesia i te tahi atu mau pǐpǐ no te here te tahi i te tahi. E piti noa eˈa ta Iesu i faataa papu. Te eˈa ‘atea e te aano e tae atu i te pohe.’ E ‘te apǐapǐ te uputa e te piri hoi te eˈa e tae atu i te ora, e mea iti te feia e ite atu i te reira!’—Mataio 7:13, 14.

Eita iho â e fariihia te mau huru haapaoraa atoa. Te faaara maira te Bibilia eiaha e amui i te feia ‘e hohoˈa paieti to ratou, o te puai râ o te reira, ua hunahia ïa.’ Te na ô atoa ra e e fariu ê ia ratou. (Timoteo 2, 3:5) E faufaa-rahi-hia râ tatou i te iteraa o vai te haere ra na te eˈa e tae atu i te ora e te amuiraa ˈtu. E faaitoitohia e e turuhia tatou i teie nei â. E tiaturiraa oaoa atoa to tatou no a muri aˈe.—Hebera 10:24, 25.

E nafea e papu ai ia oe teihea pǔpǔ e na nia ra i te eˈa pirihao? A hiˈopoa ïa i te mau pahonoraa Bibilia i roto i te pene 15 o te buka Eaha ta te Bibilia e haapii mau ra? * E tauturu te reira ia oe ia faaoti ia au i ta te Bibilia e parau ra teihea haapaoraa faanahohia ta oe e apiti atu.

[Nota i raro i te api]