25 ДУГААР ЭГЕ

Мастурбациялаар чаңчылды канчаар тиилеп алырыл?

Сес харлыг тургаш, мастурбациялап эгелээн мен. Оон Бурганның көрүжүн билип алган мен. Ол күзелимге алзыпкаш-ла бодумну көөр хөңнүм чок апаар турган. «Мен ышкаш кижиге Бурган ынак болур бе?» — деп бо-ла боданыр турган мен. (Луис)

КИЖИ өзүп, четчип эгелээрге, эр-кыс күзелдери күштелир. Ынчан мастурбация кылыр чаңчыл сайзырай берип болур a. Чамдык улус ында багай чүве чок дээр. Ынчалза-даа мастурбациядан ойталаар шыңгыы чылдагаан бар. Павел элчин: «Мага-бодуңарда... бачытты узуткаңар» — дээн (Колосчуларга 3:5, Чаа делегей). Мастурбация шын эвес күзелдерни узуткаар хамаанчок, өөскүдүп турар. Оон аңгыда...

● Мастурбация дээрге бодун бодаар чорук. Кижи минниишкиннеринче долузу-биле киргеш, ынчан чүгле бодунче кичээнгей салыр.

● Мастурбация кылыр кижи эр-даа, кыс-даа улусту чүгле күзелдерин хандырар кылдыр көөр.

● Чүгле бодун бодаар, мастурбация кылыр чаңчыл өг-бүлеге эки, арыг эр-херээжен харылзаага улуг шаптык болур.

Шын эвес күзел күштүг апаарга-ла, мастурбация кылырының орнунга бодун туттунар чаңчылды сайзырадыры дээре (1 Фессалоникчилерге 4:4, 5). Эр-херээжен күзел оттуруп болур бүгү чүүлден ойталаар деп библейжи сүмени ажыгла (Чугаалар 5:8, 9). Ол чаңчылдың кулу апарган болзуңза канчаар? Оон адырлырын шенеп көрген чадавас сен. Сула салдыныпкаш: «Бурганың хоойлуларын күүседип шыдавас мен! Херек чок кижи-дир мен» дээри белен. Педро база шак ындыг бодалдыг турган. Ол мынча дээн: «Сула салдыныпкан санымда-ла, бодумну дыка багай миннип турган мен. Бодумну өршээлге төлеп чок деп бодаар болгаш, мөргүүрү меңээ берге турган».

Сен база ындыг минниишкиннерлиг болзуңза, муңгарава. Сени идегел чок деп болбас. Ол чаңчылды улгады-даа берген, аныяк-даа улус тиилеп алган. Олар шыдаан болганда, сен шыдаар сен!

Буруузунар минниишкинден канчаар адырлып алырыл?

Мастурбация кылып турар улус буруузунары эки. Чүге дизе ол багай чаңчылдан адырлып алырынга, Бурганга таарымчалыг муңгарал дузалап болур (2 Коринфичилерге 7:11). Ынчалза-даа эмин эртир буруузунары айыылдыг. Дыка буруузунуп, муңгараарга кижи сула салдынгаш, чүнү-даа кылып шыдавайн барып болур (Чугаалар 24:10).

Шын көрүштүг болурун кызыт. Мастурбация — арыг эвес чаңчыл. Ол кижини «янзы-бүрү күзээшкиннерниң болгаш таалалдарның кулу» кылгаш, сеңээ шын эвес угаан-бодалды хевирлеп болур (Титке 3:3). Ындыг-даа болза, мастурбация кылыры шын эвес эр-херээжен харылзаа ышкаш улуг бачыт эвес (Иуда 7). Ынчангаш мастурбация кылыр чаңчылдыг болзуңза, өршээттинмес бачыт үүлгедип турар мен деп бодава. Кол-ла чүве — шын эвес күзелдерге удурланып, демисежирин кажан-даа соксатпас болза эки!

Туттунуп шыдавайн баргаш, муңгаралга алзыптары белен. Ынчан Чугаалар 24:16-да сөстерни боданып көрем: «Чөптүг-шынныг кижи чеди-даа катап кээп ушса, дөмей-ле туруп кээр, а бузуттуглар кээп ужар болза, айыыл-халапка таваржыр». Чазыпкан болзуңза, дораан бачыттыг кижи апарбас сен. Ынчангаш черле сула салдынма. Ооң орнунга ону катаптавас дээш, частырыгже сени чүү идипкенин сайгарып көрем.

Иегованың ынакшылын, энерелин боданыр үени аңгылап ап тур. Кошкак талалары-биле демисежип чораан Давид мынча дээн: «Ачазының оолдарынга энерелдии дег, Бургандан коргуштуг улуска Иегова энерелдиг. Ол бисти чүден чаяаттынганывысты эки билир, бисти анаа-ла доозун деп сактып чоруур» (Ырлар 103:13, 14, Чаа делегей). Иегова бачыттыывысты билир, өршээринге белен (Ырлар 85:5). Ынчалза-даа Ол бисти багай чаңчылдардан кызып, адырлып алырывысты күзеп турар. Аңаа биске чүү дузалаар?

Дыштанып, хөглээр үеде оваарымчалыг бол. Шын эвес күзелдер оттуруп болур фильмнер азы передачалар көрүп турар сен бе? Азы куду мөзүлүг сайтыларже кирер-дир сен бе? Өргээниң ыраажызы Бурганга: «Бүгү-ле бужар чүүлдерден карактарымны өскээр көрүндүрүп көр» деп мөргүп турган (Ырлар 119:37, Чаа делегей) b.

Чардыгып өөрен. Уильям мындыг сүме кадып турар: «Бурган-биле найыралыңны быжыглаар чүүлдерни удуур бетинде номчуп көр. Эң чугула чүүл, сөөлгү бодалың ажыктыг болур болза эки» (Филипчилерге 4:8).

Бергедежип турар чүүлүңнү бир кижи-биле чугаалаш. Ооң дугайында чугаалаары сеңээ дыка эпчок чадавас. Ынчалза-даа чугаалаары чугула, ол чугаа багай чаңчылдан адырлырынга дузалаар. Давид деп акывыс мынча дээн: «Мен ооң дугайында ачам-биле чугаалашкан мен. Ол менче хорадаваска, дыка амыраан мен. Дыка чымчак кылдыр: „Мен сен дээш чоргаарланыр мен, оглум“ — дээн. Ону чугаалаары меңээ кайы хире бергезин ол билир. Ачамның сөстеринден өске мени сорук киирип, дузалаан чүү-даа чок боор.

Ачам Бижилгениң дузазы-биле дыка ханылай бербээнимни көргүскен. Шын эвес чүве кылып турарымны угаап-билип турар бе дээш, немей шүлүктерни кады сайгарган. Ачам: „Чүү-даа болбаан ышкаш кылдыр эгелеп көрем“ — дээш, катап чугаалажырын аазааш немеп каан: „Чазыпсыңза, муңгарава. Ооң соонда үр туттунуптарын кызыт“». Давид кандыг түңнелге келген? Ол мынча дээн: «Бергелеримни билир база дузалажып турган кижи бар болганы меңээ эң-не улуг дуза болган» c.

ДАРААЗЫНДА ЭГЕДЕ

Таварылга болган эр-херээжен харылзаа — анаа таварылга эвес. Чүге?

[Немелде тайылбыр]

БИБЛЕЙЖИ ШҮЛҮК

“Чалыы үениң күзээшкиннеринден дезип, арыг сеткилинден Бурганны кыйгырган улус-биле деңге чөптүг-шынныг чурттаарынче, бүзүрелче, ынакшылче, тайбыңче чүткү”. (2 Тимофейге 2:22, Чаа делегей)

СҮМЕ

Күзел эмин эрттир күштүг апаарының бетинде-ле мөргү. Шын эвес күзелдерден адырлып алыр дээш, Иеговадан «дээди күштү» диле (2 Коринфичилерге 4:7).

БИЛИР СЕН БЕ...?

Кошкак кижи бодунуң эр-херээжен күзелдериниң аайындан эртпес, а күштүг кижи кым-даа көрбейн турар үеде безин бодун туттунуп билир.

ШИМЧЕНИРИНИҢ ПЛАНЫ!

Угааным арыг болзун дээш ...

Күзелим аайынче кирбес дээш ...

Ада-иемге салыр дээн айтырыгларым: ...

КАНЧААР ХАРЫЫЛААР СЕН?

● Иегова өршээринге белен деп сактыры чүге чугула? (Ыд. ыр. 85:5).

● Бурган кижилерни эр-херээжен күзелдерлиг кылдыр чаяаган-даа болза, бодун туттунуп билири чугула. Ынчангаш Ол сенден чүнү манаар эргелигил?

[Киирилде немелде]

“Ол берге айтырыымны шиитпирлеп алган мен, ам арын-нүүрүм арыг. Ону чүү-даа чүвеге орнавас мен!” (Сара)

[Чурук]

Чарыш үезинде кээп дүшкеш, эгезинден катап маңнавас. Мастурбация кылыр чаңчыл-биле демисежип тургаш, туттунуп шыдавайн барган болзуңза, сени тиилеттирип алган деп болбас