1, 2. а) Мар юрттэ милемлы котькуд шуг-секытэз вормыны? Валэктэ. б) Мае ми эскеромы та статьяын?

 ВАЛ-А тӥляд сыӵе шуг-секытты, куке тӥляд верамды потэ вал: «Ачим та шуг-секытэз мон ноку но вормыны уг быгаты!» Оло нош, тӥледлы секыт висёнэн пумиськоно луиз яке матысь адямиды кулӥз. Азьвылзэ тодады вайыса, тӥ валаськоды, Иеговалы луыса гинэ ваньзэ чиданы быгатӥды шуыса, кудӥз святой дух пыр «мертантэм бадӟым кужым» сётэ вал (2 Кор. 4:7—9).

² Со сяна, святой духтэк ми та дуннелы пумит сылыны ӧй быгатысалмы (1 Иоанн 5:19). Нош эшшо милемлы кулэ на нюръяськыны «урод духъёслы пумит» (Еф. 6:12). Ваньзэ тае лыдэ басьтыса, ойдолэ эскеромы кык амалъёсты, кызьы милемлы святой дух юрттэ. Собере ми эскеромы, кызьы ми святой духлэсь юрттэтсэ тросгес басьтыны быгатӥськомы.

3. Вералэ нырысетӥез амал сярысь, кызьы Иегова милемлы шуг-секытъёсмес вормыны юрттэ.

³ Иеговалэн святой духез, кужым сётыса, юрттэ милемлы асьмелэсь ужмес быдэстыны, шуг-секытъёс шоры учкытэк. Апостол Павел вала вал, шуг-секытъёс шоры учкытэк, Иеговалы ужаны-тыршыны быгатэ шуыса, малы ке шуоно «Христослэн кужымезлы» оскиське (2 Кор. 12:9). Кыкетӥзэ пӧртэм шаеръёстӥ тодытыса ветлыкуз, мылысь-кыдысь ӟеч иворез верам сяна, Павел ужаз на, солэн дӥськутэз, сиён-юонэз но улон интыез мед луоз шуыса. Коринфын со улӥз Акила но Прискилла дорын, кудъёсыз палаткаос лэсьто вал. Павел но палаткаос лэсьтыны быгатэ вал бере, со но арняяз кӧня ке нунал соосын ӵош ужаз (Ап. уж. 18:1—4). Святой дух Павеллы кужым сётэ вал, со ужаны но, Иеговалы тыршыны но мед быгатоз шуыса.

4. 2 Коринфъёслы 12:7—9 верамъя, маин пумиськиз Павел?

 ⁴ Лыдӟе 2 Коринфъёслы 12:7—9. Мае верамез потэ вал Павеллэн та кылъёсын: «Мынам мугорам ши бышкалскиз»? Куке мугоре ши бышкалске, со туж вӧсь каре. Соин ик «Мугорам ши бышкалскиз» кылъёсын Павеллэн верамез потэ вал, со кыӵе ке вӧсь карись курадӟонэн пумиськиз шуыса. Со курадӟонзэ Павел «шайтанлэн кылчинэз» шуыса нимаз, кудӥз сое курадӟытӥз. Оло нош, Шайтан но солэн периосыз Павелэз асьсэос ӧз курадӟытэ, но солэн мугорысьтыз «шиез» адӟыса, соос сое эшшо но мургес пыртыны выризы, луоз. Мар кариз Павел?

5. Кызьы Иегова возьматӥз, Павеллэсь вӧсяськемзэ кылӥз шуыса?

⁵ Нырысь Павеллэн потэ вал, Иегова солэсь «шизэ» мед быдтоз шуыса. Со вераз: «Монэ солэсь мед мозмытоз шуыса, куинь пол кутскыса, мон Кузё-Инмарлы [Иеговалы] вӧсяськи». Озьы ке но Павеллэн «шиез» ӧз быры. Вера-а со, Иегова Павеллэсь вӧсяськемзэ ӧз кылы шуыса? Уг, уг вера. Иегова кылӥз солэсь вӧсяськемзэ. Иегова Павеллэсь шуг-секытсэ ӧз быдты ке но, со солы кужым сётӥз сое вормыны. Иегова вераз: «Тон лябӟыса улон дыръя Мынам кужыме юнгес шарае потэ» (2 Кор. 12:8, 9). Инмарлэн юрттэмезлы луыса, Павел шумпотонзэ но сюлмысьтыз каньыллыксэ утьыны быгатӥз (Флп. 4:4—7).

6. а) Кызьы Иегова возьматыны быгатоз, тӥлесьтыд вӧсяськемдэс кылӥз шуыса? б) Абзацын гожтэм кылбуръёс пӧлысь кыӵе кылъёс тӥледыз юнмато?

⁶ Луылэ вал-а озьы: тӥ, Павел сямен, Иеговаез сюлворыса куриды кыӵе ке шуг-секытлэсь мозмытыны? Нош, ӟырдыт вӧсяськемды шоры учкытэк, шуг-секытты ӧз быры, нош эшшо но бадӟымгес луиз. Малпады-а тӥ со дыре, Иеговалы уд яраське шуыса? Соку малпалэ Павеллэн примерез сярысь. Иегова кылӥз солэсь вӧсяськемзэ, тӥлесьтыд но вӧсяськемдэс со одно ик кылоз! Оло нош, Иегова шуг-секыттэс уз быдты, но святой дух пыр тӥледлы кужым сётоз, тӥ ваньзэ чиданы мед быгатоды шуыса (Пс. 60:4, 5). «Пыд йылысьтыды погыртэмын» ке но луиды, Иегова тӥледыз уз кельты (2 Кор. 4:8, 9; Флп. 4:13).

7, 8. а) Кызьы валано, святой дух тӧл выллем луэ шуыса? б) Кызьы Пётр валэктӥз святой духлэсь ужамзэ?

⁷ Кызьы эшшо святой дух милемлы юрттэ на? Святой духез зарезьысь тӧлэн ӵошатыны луоз, кудзэ корабльлэн тӧлпоез кутэ но кулэ интые капчиен вуыны быгатэ, зарезь туж тулкымъяське ке но. Озьы ик святой дух но юрттэ милемлы Иеговалы ужаны-тыршыны но та тулкымъяськись дуннеетӥ Инмарен сӥзем выль дуннее мыныны.

⁸ Апостол Пётр чорыгась вал но трос тодӥз ву вылтӥ кораблен яке пыжен уян сярысь. Оло, соин ик, куке со вераз, кызьы святой дух ужа, со уже кутӥз кылъёсты, кудъёсыз ву вылтӥ ветлонэн герӟаськемын, вылды. Со гожтӥз: «Ноку но азьпалзэ тодытыса веран адямилэн ас мылкыд каремезъя верамын ӧй вал,— сое Святой Дух пыр вырӟытэм Инмарлэн дун-чылкыт адямиосыз веразы». Грек кыл, кудӥз татын «вырӟытэм» шуыса берыктэмын, возьматэ «нуллыны» шуэмез (2 Пётр 1:21).

9. Инмарлэн адямиосыз святой дух пыр вырӟытэмын вал шуыса веракуз, мар потэ вал Пётрлэн, адямиос син азязы мед пуктозы шуыса?

⁹ Инмарлэн адямиосыз святой дух пыр вырӟытэмын вал шуыса веракуз, мар потэ вал Пётрлэн, адямиос син азязы мед пуктозы шуыса? Грек кыл, кудзэ со кутӥз, тупа грек кыллы, кудзэ кутӥз Лука Апостолъёслэн ужъёссы книгаын, куке вераз корабль сярысь, кудӥз тӧллы пумит сылыны ӧз быгаты но кудзэ «азьлань-берлань нуллыны кутскиз» (Ап. уж. 27:15). Соин ик, куке Пётр вераз, Библиез гожъясьёс святой дух пыр вырӟытэмын вал шуыса, одӥгез Библиез эскерись верамъя, со  кутӥз туж умой ӵошатонэз, кудӥз герӟаськемын ву вылтӥ ветлонэн. Озьыен, Пётр вераз: кызьы корабль, тӧлэз кутыса, кулэ интые вуэ, озьы ик пророкъёс но Библиез гожъясьёс, святой духлэн юрттэменыз, соослы сётэм ужзэс быдэстӥзы. Соиз ик Библиез эскерись вераз: «Образной кылъёсын ке верано, пророкъёс асьсэлэсь тӧлпооссэс ӝутӥзы». Иегова аслэсьтыз ужзэ быдэстӥз: со тӧл сётӥз, яке святой дух. Нош Библиез гожъясьёс асьсэлэсь ужзэс быдэстӥзы: соос святой духлэн кивалтэмезъя лэсьтӥзы.

10, 11. Кыӵе кык вамышъёс милемлы лэсьтоно, святой дух милемын кивалтэ шуыса валан понна? Вералэ пример.

¹⁰ Зэм, Библиез гожъян понна, туннэ Иегова адямиосты святой дух пыр уг вырӟыты ни. Но аслаз калыкезлы кивалтэт со азьвыл сямен ик святой дух пыр сётэ. Азьвыл сямен ик Иегова аслэсьтыз ужзэ быдэстэ. Нош кызьы милемлы валано, святой дух милемын кивалтэ шуыса? Милемлы эскерыны кулэ, быдэстӥськомы-а ми асьмелэсь ужмес. Мар со понна кулэ?

¹¹ Эскеромы одӥг примерез. Тӧл морякъёслы юрттӥсь мед луоз шуыса, соослы тани мар кароно: нырысетӥез, тӧлэз кутон понна, зарезе потыны кулэ. Малы ке шуоно корабль ярдурын сылӥз ке, кытын тӧлъёс ӧвӧл, со интыысьтыз уз вырӟы. Кыкетӥез, тӧлпоез сокем паськыт вӧлъяно, макем луэ. Малы ке шуоно зарезьын тӧл луиз ке но, корабль азьлань мыноз соку гинэ, куке тӧлпоос быдэсак тӧлэн тырмозы. Озьы ик ми но, Иеговалы ужаны-тыршыны быгатомы соку гинэ, куке милемын святой дух кивалтоз. Святой дух милемын мед кивалтоз шуыса, милемлы кык вамыш лэсьтоно. Нырысетӥез, милемлы кулэ зарезе потыны, кытын тӧл вань, яке, мукет кылъёсын вераса, милемлы кулэ пыриськыны уже, кудӥныз Инмарлэн духез кивалтэ. Кыкетӥез, «тӧлпоосмес быдэсак вӧлъяно», яке ужан-тыршонын кароно ваньзэ, мае быгатӥськомы (Пс. 118:32). Соку святой дух милемын кивалтоз, ми пумитъяськонъёслэн но шуг-секытъёслэн тулкымъёссы пыр азьлань мыныны но, сюрес вылысьтымы кожытэк, Инмарлэн  выль дуннеяз вуыны мед быгатомы шуыса.

12. Мае ми али эскеромы?

¹² Ми эскеримы кык амалъёсты, кызьы милемлы святой дух юрттэ. Со милемлы кужым сётэ, шуг-секытъёс дыръя ми Иеговалы оскымон кыльыны мед быгатомы шуыса. Озьы ик со юрттэ милемлы, пырак улонэ нуись сюрес вылысь кожытэк, азьлань мыныны. Табере ойдолэ эскеромы ньыль визь-кенешъёсты, кудъёсыз юрттозы милемлы святой духлэсь юрттэтсэ тросгес басьтыны.

13. 2 Тимофейлы 3:16, 17 верамъя, мар карыны быгатэ Библия? Нош мар кароно милемлы?

¹³ Нырысетӥез, Инмарлэсь Кылзэ дышетэ. (Лыдӟе 2 Тимофейлы 3:16, 17.) Ми тодӥськомы, Библия Инмарлэсь книга шуыса. Иегова аслаз святой духез пыр Библиез гожъясьёсын кивалтӥз, соос солэсь малпанъёссэ мед гожтозы шуыса. Куке ми Библиез лыдӟиськомы но со вылын малпаськиськомы, Инмарлэн визь-кенешъёсыз асьмелэн йырвизьмамы но сюлэмамы пыӵало. Иеговалэн духеныз вордскытэм кылъёс милесьтым мылкыдмес ӝуто улонмес воштыны но солэн эрикезъя тупатыны (Евр. 4:12). Нош святой духлэсь юрттэтсэ тросгес басьтон понна, милемлы кулэ дырмес висъяны ялан Библиез дышетонлы но со вылын мур малпаськонлы. Соку Инмарлэн Кылыз шӧдӥськоз ваньмыз вылын, мар ми вераськомы но мар кариськомы.

14. а) Малы ми вераны быгатӥськомы, христиан пумиськонъёсын святой дух вань шуыса? б) Мар юрттоз милемлы, «быдэсак вӧлъям тӧлпоосын» выллем, азьлань мыныны?

¹⁴ Кыкетӥез, Инмарлы мукет вын-агайёсын но сузэр-апайёсын ӵош йыбыртъялэ (Пс. 21:23). Образной кылъёсын вераса, христиан пумиськонъёсын ми «тӧлэз кутыны» быгатӥськомы. Отын Иеговалэн духез вань (Усьт. 2:29). Малы ми озьы вераны быгатӥськомы? Малы ке шуоно, Инмарлы мукет вын-агайёсын но сузэр-апайёсын ӵош йыбыртъяку, ми Инмарлэсь святой духсэ куриськомы, Библия вылэ пыкиськем Эксэйлык кырӟанъёсты кырӟаськомы но Библия вылэ пыкиськыса дасям речьёсты кылзӥськомы, кудъёссэ верало святой духен пуктэм вын-агайёс. Со ик дух юрттэ сузэр-апайёслы асьсэлэсь дышетскон ужъёссэс дасяны но соосты кенешлэн пумиськонъёсаз возьматыны. Святой духлэсь юрттэтсэ тросгес басьтон понна, милемлы кулэ пумиськонъёслы дасяськыны но эскеронэ пыриськыны. Соку ми, «быдэсак вӧлъям тӧлпоосын» выллем, азьлань мыномы.

15. Мар кароно, тодытон ужын святой дух милемлы мед юрттоз шуыса?

¹⁵ Куинетӥез, тодытон уже пыриське. Ужан-тыршонын Библиез усьяськомы ке, святой дух юрттэ милемлы тодытыны но мукетъёссэ дышетыны (Рим. 15:18, 19). Святой духлэсь юрттэтсэ тросгес басьтон понна, милемлы кулэ ялан тодытон уже пыриськыны но котькуд тупась учыре Библиез уже кутыны. Адямиосын умойгес вераськонъёс нуон понна, милемлы уже кутоно «Улон но ужан-тыршон» тетрадьысь вераськон амалъёсты.

16. Кыӵе эшшо одӥгез амал, кызьы ми святой дух басьтыны быгатӥськомы?

¹⁶ Ньылетӥез, вӧсяське (Матф. 7:7—11; Лука 11:13). Эшшо одӥгез амал, кызьы ми святой дух басьтыны быгатӥськомы,— сое шонерак Иеговалэсь курыны. Номыр но нокин люкетыны уг быгаты Иеговалы милесьтым вӧсяськонъёсмес кылзыны но милемлы «ӟеч кузьым», святой дух, сётыны: тюрьма но, ачиз Шайтан но (Иак. 1:17). Кызьы милемлы вӧсяськоно, святой духлэсь юрттэтсэ тросгес басьтон понна? Та юанлы валэктон шедьтон понна, ойдолэ эскеромы мадёнэз, кудӥз Лукалэсь ӟеч иворын гинэ гожтэмын b.

17. Малы дышетэ милемыз Иисуслэн мадёнэз, кудӥз гожтэмын Лукалэсь 11:5—9, 13?

¹⁷ Лыдӟе Лукалэсь 11:5—9, 13. Иисуслэн мадёнэз возьматэ, кызьы милемлы вӧсяськоно, святой дух курыса. Со мадёнын адямилы сёто сое, мар солы кулэ вал, малы ке шуоно со куремысь ӧз дугды. Уйшор уйин но со ӧз кышка эшезлэсь юрттэт курыны c. Кызьы Иисус та мадёнэз вӧсяськонэн герӟаз? Со вераз: «Курелэ, тӥледлы сётэмын луоз; утчалэ — шедьтоды; йыгаське — тӥледлы усьтозы». Малы со милемыз дышетэ? Святой дух милемлы мед юрттоз шуыса, милемлы со сярысь вӧсяськемысь дугдоно ӧвӧл.

18. Кызьы адӟиське Иисуслэн мадёнысьтыз, малы ми оскыны быгатӥськомы, Иегова милемлы святой духсэ одно ик сётоз шуыса?

¹⁸ Иисуслэн мадёнэз милемлы озьы ик валаны юрттэ, малы Иегова милемлы святой духсэ одно ик сётоз. Адямилэн, кудӥз сярысь со мадёнын верамын, бер вуэм кунозэ утялтэмез потэ вал. Со вала вал, кунозэ маин ке но сюдоно шуыса, но солэн сиёнэз ӧй вал, соин ик со бускелез доры мынӥз. Иисус верамъя, бускелез солы нянь сётӥз, малы ке шуоно со куремысь ӧз дугды. Малы Иисуслэн милемыз дышетэмез потэ вал? Тырбыдэстэм адями бускелезлы, кудӥз куремысь ӧз дугды, юрттыны соглаш луиз бере, милям инмысь Атаймы одно ик юрттоз соослы, кинъёс солэсь святой духсэ куремысь уг дугдо! Кызьы адӟиське та мадёнысь, ми оскыны быгатӥськомы, Иеговалы святой дух курыса вӧсяськимы ке, со милемыз одно ик кылоз шуыса (Пс. 9:38, 39; 65:19).

19. Малы ми оскиськомы, Инмарлы оскымон кыльыны быгатомы шуыса?

¹⁹ Ми оскиськомы, Шайтанлэн милемыз зӥбыны тыршемез шоры учкытэк, ми ваньзэ чиданы быгатомы шуыса. Малы? Малы ке шуоно святой дух милемлы кык амалэн юрттэ. Нырысетӥез, со милемлы кужым сётэ, ми шуг-секытъёс пыр потыны мед быгатомы шуыса. Кыкетӥез, со духовной тӧлпоосмылы тӧлэз кутыны юрттэ но, азьпалась Инмарлэсь выль дуннезэ адӟыса, азьланяз но Иеговалы ужаны-тыршыны юрттэ. Мед котькудӥз ми пӧлысь святой духлэсь юрттэтсэ тросгес басьтоз!