4-ТӤ ЛЮКЕТ
Кызьы коньдонэз шонер кутоно
«Малпам ужрадъёс юнмало, соосты кенешыса лэсьтӥськод ке» (Мадёнъёс 20:18).
Семьяын ваньмыз кулэез мед луоз шуыса, коньдон кулэ (Мадёнъёс 30:8). Библиын со «утись шобретэн» ӵошатӥське (Екклесиаст 7:12). Коньдонэн герӟаськем юанъёс сярысь вераськыны капчи ӧвӧл ке но, тыршоно, коньдон сэрен керетонъёс медаз потэ шуыса (Ефесъёслы 4:32). Кузпалъёслы кулэ ог-огзылы оскыны но ӵош малпаськыны, кызьы соос коньдонзэс кутозы.
1 АЗЬЛО ИК МАЛПАСЬКЕ, КЫЗЬЫ КОНЬДОНДЭС КУТОДЫ
МАР ВЕРА БИБЛИЯ. «Уго, кин тӥ пӧлысь каланча пуктыны малпаз ке, нырысь ик уз пуксьы но уз лыдъя, кӧня луоз кутон-тыриськонэз, сое йылпумъяны вань-а солэн моӵез» (Лука 14:28). Туж кулэ ӵош малпаськыны, кызьы тӥ коньдондэс кутоды (Амос 3:3). Ог-огеныды вераське, мар тӥледлы зэмзэ ик басьтыны кулэ но кӧня коньдон солы висъяны быгатӥськоды (Мадёнъёс 31:16). Эн басьтэ мае ке соин гинэ, тӥляд солы коньдонды вань шуыса. Тырше пунэмаськытэк улыны. Коньдондыя улэ (Мадёнъёс 21:5; 22:7).
ПАЙДАЁ ВИЗЬ-КЕНЕШЪЁС
-
Толэзь пумын коньдонды кылиз ке, ӵош малпаське, кызьы тӥ сое кутоды
-
Коньдонды малпамдылэсь тросгес кошкиз ке, соку кенеше, кызьы азьланяз сое ӧжытгес быдтыны луоз. Кылсярысь, дунтэмгес луысал асьтэлы сиён дасяны, дась сиён басьтон интые
2 ПӦЯСЬКЫТЭК ВЕРАСЬКЕ НО КОНЬДОН ШОРЫ ШОНЕР УЧКЕ
МАР ВЕРА БИБЛИЯ. «Ог-огеныды ӧрекчаськытэк вераське» (Захария 8:16). Кузпалдылэсь эн ватэ, кӧня тӥ уждун басьтӥськоды но кӧня коньдон быдтӥськоды.
Коньдонэн герӟаськем ужпумъёсты кутыкуды, одно ик кузпалэныды кенеше (Мадёнъёс 13:10). Коньдон ласянь номыре но ватытэк вераськон картлы но кышнолы тупаса улыны юрттоз. Уждундэс асьтэлэн гинэ шуыса, эн лыдъялэ, нош семьядылэн шуыса (1 Тимофейлы 5:8).
ПАЙДАЁ ВИЗЬ-КЕНЕШЪЁС
-
Вераське, кӧня коньдон котькудды быдтыны быгатоды, ог-огеныды кенешытэк
-
Коньдонэн герӟаськем шуг-секытъёслэсь кылдэмзэс эн возьмалэ, азьло ик ваче кенеше