Даниял 11:1—45
11 Мән мидиялиқ Дариос һөкүмранлиғиниң дәсләпки жили уни, Микаилни, қоллап-қувәтлидим һәм ярдәм бәрдим.
2 Демәкчи, һазир мән саңа келәчәк тоғрилиқ һәқиқәтни ейтип берәй.
Парста йәнә үч шаһ пәйда болиду, төртинчиси болса, қалғанлиридин қариғанда, әң көп байлиқ жиғиду. У байлиғи түпәйли күчләнгәндә, Грекия шаһлиғиға қарши һәммәйләнни көтириду.
3 Қудрәтлик һәм қәйсәр шаһ қарши чиқип, бәк йоған дөләткә вә һакимийәткә егә болуп, немә халиса, шуни бәҗиридиған болиду.
4 У интайин қудрәтлик болуп йетилгәндә, униң шаһлиғи гумран болуп, аләмниң төрт қисмиға парчилиниду. Бирақ у униң әвлатлириға тәгмәйду вә бу улуқ дөләт униң һөкүмранлиғида қувәтлик болғандәк, һечқачан болмайду. Униң шаһлиғи томури билән жулунуп, ятларға қалиду.
5 Униң сәрдарлиридин бири, йәни җәнуп шаһи, күчлиниду, лекин башқиси, шимал шаһи, қудритидә униңдин ешип чүшүп, униңда егидарчилиқ һәм һакимийәт алдиңқисидин қариғанда, көпирәк болиду.
6 Бирмунчә вақит өткәндин кейин улар өз ара иттипақлишиду вә җәнуп шаһиниң қизи шимал шаһиға турмушқа чиқишқа келиду. Бирақ униң қолиниң күчи йоқайду һәм шаһму күчини йоқитиду. Қизни бериветиду — уни вә уни әкәлгәнләрни, шундақла униң атисини вә у қизни шу дәвирдә қоллиғанни.
7 Униң йилтизидин чиққан бир өсүм атисиниң орнини егиләп, шимал шаһиниң әскиригә вә қорғиниға қарши жүрүп, һуҗум ясап, уларни йеңивалиду.
8 У Мисирға уларниң худалири, йәни һәйкәллири, күмүч һәм алтундин ясалған қиммәт әсәрлири вә әсиргә чүшкәнләр билән келиду. Бирнәччә жил бойи у шимал шаһини хатирҗәмликтә қойиду.
9 Шимал шаһи болса, җәнуп шаһиниң дөлитигә һуҗум қилиду, лекин андин өз йеригә қайтип келиду.
10 Униң оғуллири урушқа тәйярлиқ көрүп, зор бир қошунни жиғиду. У алдиға жүрүп, зимин бойичә кәлкүн кәби өтиду. Бирақ у бурулуп қайтип, өз қорғиниға йәтмигичә урушуп маңиду.
11 Җәнуп шаһи вәһшилишип, униңға қарши, йәни шимал шаһи, билән җәң жүргүзиду. Шимал шаһи болса, чоң әскәр жиғсиму, у җәнуп шаһиниң қолиға чүшиду.
12 Ушбу әскәрму мәғлубийәткә учрайду. У тәкәббурлишип, онлиған миңларни һалакәткә қәлтүриду вә имтиязлиқ һалитидин пайдилиналмайду.
13 Шимал шаһи қайтип келип, авалқидинму көпирәк йеңи қошунни жиғиду. Бәзи вақит, бирнәччә жилдин кейин, у чиң вә яхши қуралланған әскәр билән келиду.
14 Шу заманларда нурғунлири җәнуп шаһиға қарши чиқиду.
Сениң хәлқиндин болған явуз кишиләр башқиларниң кәйнидин меңип, вәһийни орунлашқа тиришиду, амма уларниң һечнәрсиси әмәлгә ашмайду.
15 Шимал шаһи келип, дога қоршавни қуруп, мустәһкәмләнгән шәһәрни бесивалиду. Җәнупниң қошунлири қарши туралмайду, уларниң әң есил ләшкәрлириму пут тирәп туралмайду, чүнки уларда қаршилиқ көрситишкә күч қалмайду.
16 Җәнуп шаһиға қарши чиққан сәрдар халиған барчә нәрсилирини қилиду, униңға һечким тосқунлуқ көрситәлмәйду. У Әҗайип гөзәл зиминға кириду вә униңда дүшмәнлирини уҗуқтуридиған күч болиду.
17 У өз шаһлиғиниң пүткүл қудрити билән чиқишни қарар қилиду. Униң билән шәртнамә түзүлиду вә у муваппәқийәт қазиниду. Униңға аяллар қизиға зиян кәлтүрүш рухсәт қилиниду. У қиз пут тирәп туралмайду вә униңға садиқ болуп қалалмайду.
18 У деңиз бойидики өлкиләргә беришни қарар қилип, нурғунлиған зиминларни ишғал қиливалиду. Бир сәрдар униң мәғрур меңиш-турушиға чәк қойиду вә у пәсийиду.
19 Андин у өз йериниң қәлъәсигә қайтиду, андин путлишип жиқилиду вә ахириға келиду.
20 Униң дәриҗисини гөзәл падишалиқ бойичә селиқларни жиққучини әвәткән киши алиду. Бирақ бирнәччә күн өткәндин кейин у өлиду, гәрчә ғәзәптин әмәс вә урушта әмәс.
21 Униң мәнсивини көзгә илмайдиған бирси алиду вә униңға шаһлиқ шан-шәрәпни көрсәтмәйду. У тинич вақтида келип, шаһлиққа һейлә-мәккарлиғи арқилиқ егә болувалиду.
22 У топан сүйигә охшаш әскәрләрни беқиндуриду. Улар келишимниң Даһисидәк вәйран болиду.
23 Мәзкүр шаһ билән иттипақ түзүлгәнликтин, у кув-алдамчилиқ ишлитип, кичик хәлиқниң ярдими билән қудрәтлик болиду.
24 Агаһландурмай, у өлкиниң бай диярлириға кирип, униңдин бурун әҗдатлиридин һечким қилмиған нәрсиләрни қилидиған болиду. У кишиләргә булаңчилиқ арқилиқ елинған олҗини һәм байлиқларни тарқитип бериду. У мустәһкәм җайларға қарши нийәтләрни көзләйду, лекин пәқәт бәзибир вақит арилиғидила.
25 У бар күчини топлап, җәнуп шаһиға зор әскәр билән меңиш җүръитигә толиду. Җәнуп шаһи урушқа тәйярлиниду вә зор һәм күчлүк әскәр жиғиду. Шимал шаһи қарши туралмайду, чүнки униңға нисбәтән яман иш-ойларни қуриду.
26 Уни униң дәстихинида олтирип, биллә тамақланғанлар һалакәткә учритиду.
Униң әскири гоя кәлкүн суда әкәтилгәндәк, әкетилиду вә көп өлгәнләр болиду.
27 Ушбу икки шаһ өз қәлбидә яманлиқни ойлайду вә бир үстәлдә олтирип, бир-биригә ялғанчилиқ ейтиду. Бирақ уларниң һечнемиси орунланмайду, сәвәви, ахир пәқәт бәлгүләнгән вақитта келиду.
28 Шимал шаһи өз зиминиға мол байлиқ билән қайтиду вә униң жүриги муқәддәс келишимгә қарши туриду. У утуқлуқ иш қилип, өз йеригә қайтип келиду.
29 Бәлгүләнгән вақитта у яңливаштин җәнупқа қарши чиқиду. Лекин бу қетимда авалқидәк иш йүз бәрмәйду,
30 сәвәви, униңға қарши Киттим кемилири чиқиду вә у пәсийип төвәнләйду.
Қайтип келип, у барлиқ қәһрини муқәддәс келишимгә қаритип, буниңда муваппәқийәтлик болиду. У қайтқанда өз диққитини муқәддәс келишимдин чекингәнләргә ағдуриду.
31 У өз қошунлирини әвәтиду, улар муқәддәс җайни, йәни қорғанни булғап, дайимий қурбанлиқ әкелишни тохтитиду.
Шуниң билән чөлдәритишни әкелидиған жиркиничлик нәрсә турғузулиду.
32 Иккийүзлүк гәплири билән у явузлуқ ясаватқанларни һәм келишимни бузуватқанларни асийлиққа җәлип қилиду. Лекин өз Худайини билгән хәлиқ күчлүк болуп, утуқ қазиниду.
33 Дана һәм өткүрләр нурғунлирини үгитиду. Бирмунчә күн улар қиличтин һәм оттин, тутқундин һәм булаңчилиқтин азап чекиду.
34 Бирақ улар җапа тартқанда, уларға бираз ярдәм берилиду. Нурғунлири лола гәпләрни қилишип, уларға қошулиду.
35 Даналарниң бәзилири ахир вақитқичә хәлиқ мәзкүр синақлардин өтүп, тазилинип, ақириши үчүн азаплиниду, чүнки бәлгүләнгән вақит техи кәлмиди.
36 Ушбу шаһ халиғинини қилип, барғансири техиму көтирилип, һәммә илаһлар үстидин чоңчилиқ қилиду вә худаларниң Худасиға қарши күпүрлүк сөзләрни қилиду. У ғәзәп вақти түгимигичә буниңда муваппәқийәт қазиниду, чүнки қарарланған барлиқ нәрсә әмәлгә ешиши лазим.
37 У йә атилириниң худаси билән, йә аялларниң хаһиши билән, йә қандақту-бир башқа илаһ билән һесаплашмай, уларниң үстидин мәғрурлиниду.
38 У қорғанларниң худасини мәдһийиләйду, атилириға мәлум әмәс худани махтап, униңға алтун, күмүч, есил ташлар һәм башқа байлиқларни тәғдим қилиду.
39 Ят худаға тайинип, у әң чиңайтилған қорғанларға утуқлуқ һуҗум ясайду. У уни етирап қилғанларни йүксәлдүриду вә уларни нурғунлири үстидин һөкүмранлиқ қилишқа қойиду. У шундақла йәрни пулға сатиду.
40 Ахир вақтида җәнуп шаһи униң билән җәңгә чүшиду вә шимал шаһи униңға җәң һарвулири, чавандазлири вә нурғунлиған кемилири билән етилиду. У ят зиминларға бесип кирип, кәлкүндәк улардин өтиду.
41 У шундақла Әҗайип гөзәл зиминғиму бесип кириду вә көп йәрләр мәғлубийәткә дучар болиду. Лекин униң қолидин Едум, Моаб вә аммонлуқларниң асасийлири қутулиду.
42 У кейинму һәртүрлүк йәрләргә һуҗум қилиду. Мисирму қутқузулмайду.
43 У мәхпий ғәзниләр — алтун һәм күмүчтин вә Мисирниң барчә байлиқлиридин пайдилиниду. Униң кәйнидин ливиялиқлар вә ефиоплар жүриду.
44 Амма уни күн чиқиштин вә шималдин болған хәвәрләр әндишигә салиду вә у нурғунлирини һалак қилиш һәм қириш үчүн өрттәк қәһридә йолға чиқиду.
45 У өзиниң шаһлиқ чедирлирини бүйүк деңиз һәм Әҗайип гөзәл зиминниң муқәддәс теғи арилиғида тикиду. Шуниң билән ахириға келиду вә һечким униңға ярдәм берәлмәйду.
