يەھۋا گۇۋاھچىلىرى ئىرلاندىيە ۋە برىتانىيىدىكى يەرلىك تىللاردا سۆزلەيدىغان ئادەملەرنى تېپىش ئۈچۈن كۆپ كۈچ چىقىرىدۇ.‏ * ئۇلارنىڭ ئىچىگە ئىنگلىز تىلىدىن باشقا ئىرلاند،‏ شوتلاند گائېلىگ ۋە ۋېلىش تىللىرى كىرىدۇ.‏

ئۆزگەرتىلگەن org.‏jw تور بېكىتى 2012-‏يىلنىڭ سېنتەبىر ئېيىدا كۆپ تىللاردا،‏ ئۇنىڭ ئىچىدە ئىرلاند ۋە ۋېلىش تىللىرىدا ئىشلەشكە باشلىدى.‏ شوتلاند گائېلىگ تىلىدا بولسا،‏ 2014-‏يىلنىڭ ئاۋغۇست ئېيىدا ئىشلەشكە باشلىدى.‏ شۇنىڭ بىلەن،‏ بىز بۇ تىللارنىڭ ھەممىسىدە مۇقەددەس كىتابقا ئاساسلانغان ماتېرىياللارنى نەشىر قىلىمىز.‏ ئوقۇرمەنلەر قانداق ئىنكاس قايتۇرغان؟‏

چىركاۋدا خىزمەت قىلىدىغان بىر ئەر كىشى مۇقەددەس كىتابقا ئاساسلانغان شوتلاند گائېلىگ تىلىدىكى ۋاراقچىنى ئېلىپلا،‏ ئۇنى ئۈنلۈك ئوقۇپ،‏ يىغلاشقا باشلىغان.‏ ئۇ نېمە ئۈچۈن شۇنچىلىك تەسىرلەنگەنىدى؟‏ بۇ كىشى تەرجىمىنىڭ قانچىلىك ياخشى ئىكەنلىكىگە ھەيران قالدى ۋە ھاياجانلىنىپ:‏ «بۇنى كىم تەرجىمە قىلدى؟‏ بۇ ئاجايىپ ياخشى!‏»،‏ —‏ دېگەن.‏

org.‏jw تور بېكىتى شوتلاند گائېلىگ تىلىدا ئىشلەشكە باشلىغان ئاينىڭ ئىچىدە ئۇنىڭغا تەخمىنەن 750 ئادەم كىرگەن.‏

گولۇيې شەھىرىدىكى ئىرلاندىيە دۆلەت ئۇنىۋېرسىتېتىنىڭ لېكتورى گۇۋاھچىلارنىڭ بىرىگە ئۆزىنىڭ دىنغا قىزىقمايدىغانلىقىنى ئېيتقان.‏ لېكىن،‏ ئۇ «‏مۇقەددەس كىتابتىكى ئاساسىي ماۋزۇ‏» ناملىق كىتابچىنى ئىرلاند تىلىدا ئالالايدىغانلىقىنى بىلگەندە،‏ بىر كىتابچىنى سورىغان.‏ ئۇنىڭ پىكىرىچە،‏ ھەممە كىشىلەر مۇقەددەس كىتابقا ئاساسلانغان ماتېرىياللارنى ئۆز ئانا تىلىدا ئېلىشى كېرەك ۋە ئۇ يەھۋا گۇۋاھچىلىرىنى ئىرلاند تىلىدا سۆزلەيدىغانلارنى ماتېرىياللار بىلەن تەمىنلەش خىزمىتى ئۈچۈن ماختىغان.‏

بىر ياشانغان ئايال مۇقەددەس كىتابقا ئاساسلانغان كىتابچىنى ئۇيىلس تىلىدا ئالغىنىغا خۇشاللىقىنى بىلدۈرۈپ:‏ «راستىنى ئېيتقاندا،‏ بۇنى ئىنگلىز تىلىدا تەقدىم قىلغان بولساڭلار،‏ ئالماس ئېدىم،‏ لېكىن بۇ مېنىڭ ئانا تىلىمدا بولغانلىقى نېمە دېگەن ياخشى»،‏—‏ دېگەن.‏

2014-‏يىلنىڭ ئاۋغۇست ئېيىدا بىز org.‏jw تور بېكىتىدىكى ئۇيلس تىلىدا نەشىر قىلىنىدىغان ماتېرىياللارنىڭ سانىنى كۆپەيتتۇق.‏ شۇ ئاينىڭ ئىچىدە ماتېرىياللارنى ئۇيلس تىلىدا ئوقۇش ئۈچۈن تور بېكىتىمىزگە كىرىدىغان ئادەملەرنىڭ سانى ئىككى ھەسسىدىن ئارتۇق كۆپەيدى.‏

ئەيسا مەسىھ ئىككى شاگىرتىغا يازمىلارنى چۈشەندۈرۈپ بەرگەندە،‏ ئۇلار تەشۋىشلىنىپ:‏ «ئۇ يولدا بىز بىلەن پاراڭلىشىپ،‏ مۇقەددەس يازمىلارنى تەپسىلىي چۈشەندۈرگەندە،‏ يۈرەكلىرىمىز كۆيمىدىمۇ؟‏»،‏—‏دېگەن (‏لۇقا 24:‏32‏)‏.‏ ئادەملەر مۇقەددەس كىتابتىكى ھەقىقەتنى ئۆز ئانا تىلىدا ئاڭلىغاندا،‏ ئۇ ئۇلارنىڭ ھاياتىغا كۈچلۈك تەسىر قىلىدۇ.‏

ۋېلىشتا تۇرىدىغان ئىيمىر ئىسىملىك ئەر كىشى،‏ يەھۋا گۇۋاھچىلىرىنىڭ بىرىگە ئۆيلەنگەن،‏ لېكىن ئۇ ئايالىنىڭ دىنىي كۆزقارىشىغا قوشۇلمايتتى.‏ كېيىنرەك ئۇ راسسېل ئىسىملىك گۇۋاھچى بىلەن دوست بولغان.‏ ئىيمىر ئۆزىنىڭ كۆزقارىشىنى نېمە ئۆزگەرتكەنلىكىنى چۈشەندۈرۈپ مۇنداق دېگەن:‏ «راسسېل «‏مۇقەددەس كىتابتا زادى نېمە ھەقىقەت بار؟‏‏»‏ * دېگەن كىتابنى ئېلىپ كەلگەندە،‏ مەن مۇقەددەس كىتابنى جىددىي تەتقىق قىلىشنى قارار قىلدىم.‏ ئۇ ماڭا كىتابنى بېرىپ:‏ «بۇ ۋېلىش تىلىدىكى كىتاب.‏ ھازىردىن باشلاپ بىز ئۇنى بىللە تەتقىق قىلىمىز».‏ راسسېلنىڭ ئۇدۇل تەكلىپى ئىيمىرنى نېمە ئۈچۈن جەلپ قىلغان؟‏ ئىيمىر بۇنى مۇنداق چۈشەندۈرگەن:‏ «بىز بىر تىلدا سۆزلەيمىز،‏ بىزنىڭ مەدەنىيىتىمىز ئوخشاش ھەم بىز بىر-‏بىرىمىزنى ياخشى چۈشىنىمىز».‏ مۇقەددەس كىتابنى ئۇنىڭ ئانا تىلى بولغان ۋېلىش تىلىدا مۇلاھىزە قىلغاندا،‏ بۇ ئۇنىڭ يۈرىكىگە يەتكەچكە،‏ ئىيمىرنىڭ يۈرىكى گويا «كۆيگەندەك» بولغانىدى.‏

يەھۋا گۇۋاھچىلىرى ئادەملەرنىڭ يۈرىكىگە ئەڭ چوڭقۇر تەسىر قىلىدىغان تىلدا،‏ يەنى ئۇلارنىڭ ئانا تىلىدا خۇدا توغرىسىدا بىلىم ئېلىشىغا ياردەم بېرىشنى داۋاملاشتۇرىۋاتىدۇ.‏