Epinduko li Lomboloka Nye?
Etambululo Liembimbiliya
Vembimbiliya ondaka ya pongoluiwa okuti “epinduko,” yopiwa kelimi lio Helasi a·naʹsta·sis, yi lomboloka okuti “oku votoka” ale “oku talama vali vilu.” Eci omunu umue a pinduiwa, eye “o votuiwa” pokati ka vana va fa kuenda o kala ndomo a kala ale.—1 Va Korindo 15:12, 13.
Ondaka “epinduko” ka yi sangiwa Vovisonehua vio Heveru, via kũlĩhĩla okuti Otestamento Yale, pole elongiso liaco haimo li sangiwa. Ndeci, Suku pocakati cuprofeto Hosea wa likuminya hati: “Ame ndi ka va yovola kunene Wonjembo; ndi ka va yovola kolofa.”—Hosea 13:14; Yovi 14:13-15; Isaya 26:19; Daniele 12:2, 13.
Pi omanu va ka pinduiwila? Omanu vamue va ka pinduiwa oco va ende kilu oku ka viala la Kristu. (2 Va Korindo 5:1; Esituluilo 5:9, 10) Embimbiliya li lekisa okuti, eli olio “epinduko liatete” okuti olio “li ka liangako.” Olondaka evi vi lekisa okuti kuli vali epinduko likuavo. (Esituluilo 20:6; Va Filipoi 3:11) Epinduko liavali olio li ka pita lomanu valua okuti va ka kala palo posi.—Olosamo 37:29.
Omanu va ka pinduiwa ndati? Suku wa eca unene ku Yesu oco a pindule omanu va fa. (Yoano 11:25) Yesu o ka nena vali komuenyo “vosi va kasi vayambo” okuti omunu lekalo liaye, ovituwa viaye kuenda olonjivaluko viaye. (Yoano 5:28, 29) Vana va pinduiwa oco va enda kilu, va pinduiwa letimba liespiritu osimbu okuti, vana va pinduiwa oco va kale palo posi, va pinduiwa letimba liokaliye kuenda luhayele.—Isaya 33:24; 35:5, 6; 1 Va Korindo 15:42-44, 50.
Helie o ka pinduiwa? Embimbiliya li popia okuti, ku “laika oku kala epinduko lia vakuesunga lava havakuesungako.” (Ovilinga 24:15) “Vakuesunga” omanu vakuekolelo ndeci, Noha, Sara kuenda Avirahama. (Efetikilo 6:9; Va Heveru 11:11; Tiago 2:21) Vomanu “havakuesungako” mua kongela vana ka va pokuile kolonumbi via Suku, momo ka va kuatele epuluvi lioku lilongisa catiamẽla kokuaye kuenda oku u vumba.
Pole, vana va piãlele koku linga ovina vĩvi okuti ka va lingile epongoloko, ka va ka pinduiwa. Eci umue pokati kavo a fa, ka kuata vali elavoko liepinduko.—Mateo 23:33; Va Heveru 10:26, 27.
Epinduko li ka lingiwa otembo yipi? Embimbiliya li tukula okuti epinduko lia vana va enda kilu, li lingiwa vokuenda kuetukuluko lia Kristu lia fetika kunyamo 1914. (1 Va Korindo 15:21-23) Epinduko lia vana va ka kala palo posi li ka lingiwa vokuenda Kuohulukãi Yanyamo Yuviali wa Yesu Kristu, eci Ongongo yi ka linga ocumbo celau.—Luka 23:43; Esituluilo 20:6, 12, 13.
Momo lie ci kuetele esivililo oku kolela kepinduko? Embimbiliya li lombolola ovolandu ecea epinduko, epinduko lepinduko lia kuata olombangi. (1 Olosoma 17:17-24; 2 Olosoma 4:32-37; 13:20, 21; Luka 7:11-17; 8:40-56; Yoano 11:38-44; Ovilinga 9:36-42; 20:7-12; 1 Va Korindo 15:3-6) Epinduko lia Lasaru lia kũlĩhĩwa calua momo tunde eci a fa pa pitile ale oloneke vikuãla kuenda Yesu wa lingila ocikomo caco kovaso yowiñi walua. (Yoano 11:39, 42) Ndaño muẽle ovanyãli va Yesu ka va tẽlele oku likala ovovangi aco; kuenje va sokiya oku ponda Yesu la Lasaru.—Yoano 11:47, 53; 12:9-11.
Embimbiliya li lekisa okuti Suku o kuete unene kuenda onjongole yoku pindula vana va fa. Vovisimĩlo viaye wa selekamo ulandu womunu lomunu o kapinduiwa omo liunene waye walua. (Yovi 37:23; Mateo 10:30; Luka 20:37, 38) Suku o tẽla oku pindula ava va fa kuenda eye o yongola oku ci linga! Poku popia catiamẽla kepinduko li ka lingiwa kovaso yoloneke, Embimbiliya li lekisa okuti Suku ‘o ka kuatela ongeva upange wovaka aye.’—Yovi 14:15.
Ovohembi a tiamẽla kepinduko
Uhembi: Epinduko oku kongela vali omuenyo letimba.
Ocili: Embimbiliya lilongisa okuti omuenyo, omunu waco muẽle ka ci lomboloka onepa yimue yi puluka kolofa. (Efetikilo 2:7, etosi; Esekiele 18:4) Omo liaco, epinduko ka li lomboloka oku kongela vali omuenyo letimba, pole li lomboloka oku tumbulula omunu waco.
Uhembi: Omanu vamue va ka pinduiwa kuenda oku nyõliwa velivala liaco muẽle.
Ocili: Embimbiliya li lekisa okuti, “vana va linga ovina vĩvi, va tundila epinduko liesombiso.” (Yoano 5:29) Esombiso liaco, li ka tamba kovina omanu va ka linga noke liepinduko, ka va ka sombisiwa omo liovina va linga osimbu ka va file. Yesu hati: “Ava va fa va ka yeva ondaka Yomõla a Suku kuenje vana va yi pokola, va ka kala lomuenyo.” (Yoano 5:25) Vana va ka tava kuenda oku pokola kovina va ka lilongisa noke yepinduko, olonduko viavo vi ka sonehiwa “vociña comuenyo.”—Esituluilo 20:12, 13.
Uhembi: Omunu wa pinduiwa o tambula vali etimba a kuatele osimbu ka file.
Ocili: Noke yoku fa, etimba liomunu li tiukila koneketela, ale li nyõleha.—Ukundi 3:19, 20.