TANGA ukanda umue wasapulo. Tala o televisão ale yevelela asapulo vo radio. Oka limbuka okuti mueyuka asapulo vungangala, vuyaki kuenda ovina vikuavo vĩvi. Sokolola ovitangi vi kasi oku pita vomuenyo wove. Oku vela ale oku fa kua umue ngandiove pamue ku nena esumuo lialua kokuove. Noke o liyeva nda Yovi wa popele hati: ‘Ohali yange ya piãla.’​—Yovi 10:15.

Pamue o lipula okuti:

• Anga hẽ eci oco ca kala onjongole ya Suku kokuange lokomanu vosi?

• Pi ndi sanga ekuatiso lioku potolola ovitangi viange?

• Kuli hẽ elavoko liokuti eteke limue voluali mu ka kala ombembua?

Embimbiliya lieca atambululo kapulilo ava.

‘Eye oka puenya asuelela osi vovaso avo. Okufa ka ku ka kalako vali, ndaño oku lila loku liyula lupongo laviovo ka vi ka kalako vali.’​—Esituluilo 21:4.

‘Ocilema cika somboka ndosonge.’​—Isaya 35:6

‘Ovaso olomeke aka patuluka.’​—Isaya 35:5

‘Vosi va kasi vayambo vaka tundamo.’​—Yoano 5:28, 29

‘Layimue onungi yika popia yiti, Ndi vela.’​—Isaya 33:24

‘Vofeka mu ka kala olomema via lua.’​—Osamo 72:16

Kuka sime ño okuti eci ca lomboluiwa ndeti kamẽla atete esanda. Suku wa likuminya muẽle oku nena ekalo liaco. Kuenda Embimbiliya li lombolola ndomo eye aka ci linga.

Pole, Embimbiliya ka li tu likuminya lika ovina vikeya kovaso. Olio li tu kuatisavo oku kuata esanju kuenda omuenyo uwa cilo muẽle. Sokolola vali handi asakalalo ove. Eci ci ku sakalaisa calua pamue ekambo liolombongo, ovitangi vepata, ekambo liuhayele, ale oku fa kua umue ngandiove. Embimbiliya li ku kuatisa oku liyaka lovitangi viaco koloneke vilo. Kuenda lieca elembeleko, poku tambulula apulilo a soka ndava:

• Nye tu talela ohali?

• Tu liyaka ndati lasakalalo omuenyo?

• Tu kuata ndati esanju vepata?

• Nye ci pita letu eci tu fa?

• Anga eteke limue tuka mola vali vangandietu va fa?

• Nye ci tu kuatisa oku kolela okuti Suku oka tẽlisa muẽle olohuminyo viaye?

Omo okuti o kasi oku tanga elivulu lilo, ci lekisa okuti o yongola oku kũlĩha eci Embimbiliya li longisa. Elivulu lilo lika ku kuatisa oku ci linga. Kũlĩhĩsa okuti ocinimbu locinimbu ci kuete epulilo liaco pombuelo yemẽla. Omanu valua va sole oku kuama onjila eyi, yapulilo latambululo poku lilongisa Embimbiliya Lolombangi via Yehova. Tu lavoka okuti ove oka ci solavo. Suku oka ku sumũlũisa ­osimbu wamamako oku kũlĩhĩsa eci Embimbiliya lilongisa.