Tu sapuile eci catiamẽla konjila ndomo wa kula.

Nda citiwila ko Itália kunyamo 1943. Ame la vamanjange, tua kulila vimbo limue litito, muna isiange a kala ukuakulima kuenda okalupindelu. Olonjali vietu via tu pindisa oco tu kale Vakatolika vawa.

Momo lie wa yonguilile oku kala opatele?

Eci nda kala omõla, nda solele calua oku yeva eci olopatele vi vangula vonembele. Nda solele oku yeva olondaka viavo kuenda nda enda oku komõha loviholo viaco. Eli olio esunga lieci nda kuatela onjongole yoku kala opatele. Eci nda kuata 13 kanyamo, ina yange wa ndi sonehisa kosikola yi pongiya omãla valume oku kala olopatele kovaso yoloneke.

Voku pongiyiwa kuaco mua kongelele hẽ oku lilongisa Embimbiliya?

Sio. Eci nda kuata 15 kanyamo umue pokati kalongisi vange, wa nyĩha elivulu limue Liavangeliu—muna mu sangiwa ovolandu omuenyo kuenda upange woku kunda wa Yesu. Nda tanga elivulu liaco olonjanja vialua. Eci nda kuata 18 kanyamo, nda enda ko Roma oku ka tangela kolosikola via velapo vina vi songuiwa la papa. Nda lilongisa o Latim, o Helasi, o filosofia, o história, o psicologia kuenda o teologia. Ndaño okuti tua enda oku tukula olondaka viovinimbu Viembimbiliya loku yeva oku tangiwa Kuembimbiliya kolohundo via Calumingu, ocili ceci okuti, ka tua endaile oku lilongisa Embimbiliya.

Vupange wove wusongui mua kongelele oku longisa?

Nda enda oku talavaya vali voseketa. Pole, nda enda oku longisa catiamẽla kovihandeleko Viohongele Yavali ya Velapo Yovatikano.

Momo lie wa fetikila oku kuata atatahãi atiamẽla ketavo?

Kua kala ovina vitatu via enda oku ndi sakalaisa. Etavo lia enda oku litenga vopulitika. Olio lia enda oku ecelela evĩho lia enda oku lingiwa lasongui vaco kuenda vana va kasi volonembele viaco. Amue pokati kalongiso Okatolika, ka a suilepo. Ndeci, Suku umue ukuacisola, momo lie nda a kangisila omanu va fa otembo ka yi pui? Handi vali, anga hẽ Suku o yongola muẽle okuti tu pitolola olonjanja vialua olohutililo tu tanga velivulu limue liolohutililo? *

Nye wa linga?

Lasuẽlẽla kocipala, nda likutilila oku pinga olonumbi. Nda landavo Embimbiliya limue liokatolika lia sandekiwile ndopo kelimi lio Italia li tukuiwa hati, Bíblia de Jerusalém kuenda nda fetika oku li tanga. Kuenje vo Calumingu cimue komẽle, eci nda kala oku pateka ovowalo ange noke lioku tunda Komisa, alume vavali veya kosiminaliu. Ovo va lisitulula okuti Olombangi Via Yehova. Tua sapela eci catiamẽla  Kembimbiliya kuenda ndomo ku limbukiwa etavo liocili vokuenda kueci ci pitahãla owola.

Ovisimĩlo vipi wa kuata ku vana va ku nyula?

Nda komõha ekolelo va lekisa kuenda lonjila ndomo va kala oku talavaya lulelu Lembimbiliya Liokatolika. Noke kueyaya Ombangi yikuavo ya Yehova yi tukuiwa hati Mario. Eye wa kala ukuepandi kuenda wa enda oku tẽlisa olondaka viaye okuti, volo Casapalo viosi nda ku loka ombela, ale kuli utanya, wa enda oku iya kosiminaliu lomẽle, kelivala liecea.

Nye olopatele vikuavo via enda oku sima catiamẽla kapasu aco?

Nda enda oku va laleka oku kuama olombangulo vietu, pole, lomue pokati kavo wa enda oku kapako elilongiso Liembimbiliya. Ame nda solele calua elilongiso liaco, momo nda kala oku lilongisa ovina vi komõhisa. Ndeci, nda lilongisa esunga lieci Suku a ecelela evĩho kuenda ohali okuti, ovina nda enda oku lipula tunde osimbu.

Vana va ku velapo va seteka hẽ oku ku tateka oku lilongisa Embimbiliya?

Kunyamo 1975 nda endaile olonjanja vialua ko Roma oku ka lombolola ocisimĩlo cange. Vana va ndi velapo, va seteka oku pongolola ovisimĩlo viange, pole, lomue wa talavaya Lembimbiliya. Oku sulako, keteke 9 liosãi ya Susu yunyamo 1976, nda sonehela ko Roma loku popia okuti, si li tendi vali okuti ndu Katolika. Noke lioloneke vivali, nda siapo osiminaliu kuenje nda enda lomboyo kohongele yange yatete Yolombangi Via Yehova okuti, ya kala ohongele yimue yimbo lakongelo alua. Ovina viosi via litepele calua lovina nda kile oku mola! Omunu lomunu wa kuatele Embimbiliya kuenda wa enda oku kuama ovinimbu vi tukuiwa volohundo vi lombolola olosapi via litepa.

Ovisimĩlo vipi epata liove lia kuata?

Valua, va ndi ñualelapo. Pole, nda limbuka okuti, umue pokati ka vamanjange wa kala oku lilongisa Embimbiliya Lolombangi Via Yehova ko Lombardia, vimbo limue li kasi konano yo Itália. Nda ko nyulile kuenje Olombangi Via Yehova vio vimbo liaco, via ndi kuatisa oku sanga upange umue locitumãlo cimue coku kala. Noke vunyamo waco, nda papatisiwa Ndombangi ya Yehova.

O livela hẽ omo liovina viosi evi wa linga?

Lalimue eteke! Cilo, ndi li yevite okuti ukamba wange la Suku wa pama, momo ovina nda kũlĩha viatiamẽla kokuaye ka via kunamẽlele kovihilahila vietavo, pole, Vembimbiliya. Ndi pondola oku longisa vakuetu lekolelo kuenda locili.