1. Ocina cipi ci yapuisa vali enene ovituwa vietu?

 CI KALE okuti ndopo tua papatisiwa, ale tua papatisiwa vokuenda kuanyamo alua, vosi tu yongola oku kuata ovituwa vina Yehova a sole. Oco tu ci tẽlise, tu sukila oku lava ovisimĩlo vietu. Momo lie? Momo ovituwa vietu ovio via siata vali oku pongolola ovisimĩlo vietu. Nda okuti olonjanja viosi tu sokolola catiamẽla kovina vi vetiya oloñeyi vietu, tu vangula loku linga ovina vĩvi. (Va Efe. 4:17-19) Pole, nda tua yukisa ovisimĩlo vietu lovina viwa ombangulo yetu kuenda ovilinga vietu vi ka sanjuisa Isietu, Yehova.—Va Gal. 5:16.

2. Nye tu konomuisa vocipama cilo?

² Ndomo tua konomuisa vocipama ca pita, ka tu pondola oku tateka ovisimĩlo viosi vĩvi oku iñila vutima wetu. Pole, tu pondola oku nõla oku yuvula oku kuata ovisimĩlo viaco. Osimbu handi ka tua papatisiwile tu sukila oku liwekapo oku vangula loku lekisa ovilinga vina via suvukiwa la Yehova. Eli enanga liatete hailio lia velapo lioku lula omunu wosimbu. Oco tu sanjuise Yehova tu sukilavo oku pokola kocihandeleko cokuti: “Wali omunu wokaliye.” (Va Kol. 3:10) Vocipama cilo, tu ka tambulula apulilo a kuãimo ndeci: Nye ca kongela voku wala “omunu wokaliye”? Tu wala ndati omunu wokaliye loku amamako lakuo?

3. Ndomo ca lekisiwa ku va Galatia 5:22, 23, Nye ca kongela voku wala “omunu wokaliye” kuenda omunu o lekisa ndati okuti wa wala omunu wokaliye?

³ “Omunu wokaliye” ci lomboloka okuti o setukula Yehova kovisimĩlo kuenda kovilinga. Omunu umue o wala omunu wokaliye,  poku lekisa epako liespiritu, loku ecelela okuti espiritu sandu li songuila ovisimĩlo kuenda ovilinga viaye. (Tanga Va Galatia 5:22, 23.) Ndeci, omunu waco o sole Yehova lafendeli vaye. (Mat. 22:36-39) Eye amamako lesanju ndaño ceci a kasi oku liyaka lovitangi. (Tia. 1:2-4) Eye ukuakusanda ombembua. (Mat. 5:9) Eye ukuepandi kuenda o lekisa ohenda ku va kuavo. (Va Kol. 3:13) Eye o sole eci ciwa kuenda o ci linga. (Luka 6:35) Eye o lekisa kovilinga viaye okuti o kuetele Isiaye wokilu ekolelo liapama. (Tia. 2:18) Eci a sanumuiwa la vakuavo, eye ka yaki kuenje o likandangiwa.—1 Va Kor. 9:25, 27; Tito 3:2.

4. Momo lie tu sukilila oku lekisa ovituwa viosi via tukuiwa ku va Galatia 5:22, 23 kuenda ovinimbu vikuavo Viembimbiliya, oco tu lekise okuti tua wala omunu wokaliye?

⁴ Oco tu wale omunu wokaliye, tu sukila oku lekisa ovituwa viosi via tukuiwa ku va Galatia 5:22, 23 kuenda kovinimbu vikuavo Viembimbiliya. * Ovituwa evi, ka vi kasi nduwalo umue u waliwa lika olonjanja vimue. Pole, olonepa vialua viovituwa evi, via lisoka lovituwa vikuavo. Ndeci, nda o sole ukuene ove o ka lekisa epandi kokuaye kuenda ohenda. Kuenje oco o kale omunu umue uwa, o sukila oku kala ukuacikembe kuenda ukuesunguluko.

5. Nye ci lomboloka oku kuata “ovisimĩlo via Kristu” kuenda momo lie tu sukilila oku lilongisa catiamẽla komuenyo wa Yesu? (1 Va Korindo 2:16)

⁵ Tanga 1 Va Korindo 2:16. Oco tu wale omunu wokaliye, tu sukila oku kuata “ovisimĩlo via Kristu.” Volondaka vikuavo, tu sukila oku lilongisa ndomo Yesu a sima kuenda oku u setukula. Yesu o lekisa epako liespiritu lonjila yimue ya li pua. Ndolumuilo umue wa lipua, eye o lekisa ciwa ovituwa via Yehova. (Va Hev. 1:3) Osimbu tu kuata ovisimĩlo ndevi via Yesu, loku lekisa ovilinga ndevi viaye, tu ka kuata onima yiwa poku lekisa ovituwa ndevi viaye.—Va Fil. 2:5.

6. Nye tu sukila oku ivaluka eci tu seteka oku wala omunu wokaliye?

⁶ Anga hẽ tu tẽla muẽle oku kuama ongangu ya Yesu? Pamue tu sima ndoco: ‘Yesu wa lipua. Ame lalimue eteke ndi ka lisoka laye!’ Nda o kasi oku sokolola ndoco, ivaluka ovina evi. Tete, ove wa lulikiwa lesetãhalo lia Yehova la Yesu. Kuenje ove o nõla nda o va setukula kuenda oku kala ndeci ovo okuti kolonepa vimue  ño. (Efet. 1:26) Vali, espiritu sandu lia Suku olio ongusu ya velapo voluali luosi. Lekuatiso liongusu yespiritu sandu, o pondola oku linga ovina vina okuti lalimue eteke wa simile oku vilinga. Tatu, Yehova ka lavoka okuti ove o lekisa epako liespiritu lonjila yimue ya li pua cilo. Pole, Isietu ukuacisola, wa eca ku vana va kuete elavoko lioku kala palo posi otembo ka yi pui, ci soka 1.000 yanyamo, oco va kale omanu va li pua. (Esit. 20:1-3) Ocina Yehova a tu yonguila cilo, oku likolisilako kuenda oku kolela kekuatiso liaye.

7. Nye tu konomuisa cilo?

⁷ Tu setukula ndati Yesu? Cilo, tu konomuisa ovituwa vikuãla vi panga onepa kepako liespiritu lia Suku. Vonepa lonepa, tu ka mola eci tu lilongisa konjila ndomo Yesu a lekisa ovituwa viaco. Noke tu konomuisa apulilo amue, a ka tu kuatisa oku mioñolola koku kala omunu wokaliye.

8. Yesu wa lekisa ndati ocisola?

⁸ Omo liocisola calua Yesu a kuatela Yehova, co vetiya oku linga cosi Isiaye o tuma kuenda oku tu kuatisa. (Yoa. 14:31; 15:13) Yesu wa lekisa okuti wa solele calua omanu konjila ndomo ambatele omuenyo waye eci a kala palo posi. Eteke leteke, wa enda oku lekisa ocisola lohenda, ndaño ceci vamue vo suvukile. Onjila yimue ya velapo eye a lekisa ocisola komanu poku va longisa eci catiamẽla Kusoma wa Suku. (Luka 4:43, 44) Yesu wa lekisavo ocisola caye ku Suku kuenda komanu poku tava oku talisiwa ohali loku fila vakuakandu. Poku ci linga, ca eca epuluvi liokuti vosi tu kuata omuenyo ko pui.

9. Tu setukula ndati Yesu poku lekisa ocisola?

⁹ Etu tua litumbika ku Yehova kuenda tua papatisiwa omo okuti tu sole Isietu wokilu. Kuenje ndeci ca linga Yesu, tu sukila oku lekisa ocisola cetu ku Yehova konjila ndomo tu tata omanu. Upostolo Yoano wa soneha hati: “Una ka sole manjaye a lete, ka pondola oku sola Suku una ka lete.” (1 Yoa. 4:20) Tu sukila oku lipula ndoco: ‘Nda siata hẽ oku vokiya ocisola ndi kuetele omanu? Ndi lekisa hẽ ohenda komanu ndaño va ndi suvuka? Ocisola ci ndi vetiya hẽ oku talavaya ciwa lotembo yange kuenda ovina ndi kuete oco ndi kuatise vakuetu oku kũlĩha Yehova? Ndi ci linga hẽ lutima wosi ndaño omanu ka va limbuka alikolisilo ange, ale va ndi lambalala? Ndi sanda hẽ olonjila vikuavo oco ndi li tumbike vali kupange woku linga olondonge?’—Va Efe. 5:15, 16.

10. Yesu wa lekisa ndati okuti wa kala ukuambembua?

¹⁰ Yesu wa kala ukuambembua. Eci omanu va enda oku utata lãvi eye ka endaile oku fetuluinya ũvi lũvi. Pole, eye wa linga eci ciwa. Eye wa sanda oku linga ombembua kuenda wa vetiya omanu oku lisunguluisa pokati. Ndeci, eye wa longisa omanu okuti va sukilile oku sanda ombembua la vamanjavo nda va yonguile okuti efendelo liavo li taviwa la Yehova. (Mat. 5:9, 23, 24) Kuenda eye olonjanja viosi wa kuatisa ovapostolo oku tetulula ovitangi via kala pokati kavo nda helie wa velelepo pokati kavo.—Luka 9:46-48; 22:24-27.

11. Tu kala ndati vakuambembua?

¹¹ Oco tu kale vakuambembua, tu sukila oku linga vali cikuavo okuti, oku yuvula lika ovitangi ci sule. Etu tu sukila oku likolisilako oku sanda ombembua la vakuetu kuenda oku vetiya vamanjetu oku lisunguluisa pokati. (Va Fil. 4:2, 3; Tia. 3:17, 18) Tu sukila oku lipula ndoco: ‘Ndi nõlapo hẽ oku likolisilako oku sanda ombembua la vakuetu? Eci manji umue a ndi sumuisa, anga hẽ ndi amamako oku u temela? Anga hẽ ndi lavoka okuti omunu ukuavo eye wiya oku pinga ongecelo,  ale ame ngeca enanga liatete ndaño okuti omunu waco eye wa koka ovitangi? Anga hẽ nda siata oku vetiya vana va likuetele ovitangi oco va lisunguluise?’

12. Yesu wa lekisa ndati ohenda?

¹² Yesu wa kala ukuahenda. (Mat. 11:28-30) Eye wa lekisa ohenda poku kala ukuacikembe kuenda ukuesunguluko ndaño poku liyaka lovitangi. Ndeci, eci ukãi umue wo ko Foinike a pinga ku Yesu oco a sakule omõlaye, Yesu wa vangula laye lohenda. Kefetikilo, ka lingile eci ukãi o pinga, pole, eci ukãi a lekisa ekolelo lialua, eye wa sakula omõlaye. (Mat. 15:22-28) Yesu ndaño wa kala ukuahenda, eye ka yuvuile oku eca elungulo. Olonjanja vimue eye wa enda oku lekisa ohenda poku lungula vana eye a solele. Ndeci, eci Petulu a seteka oku tateka Yesu oku tẽlisa ocipango ca Yehova, Yesu wo lunguila kovaso yolondonge vikuavo. (Mar. 8:32, 33) Eye ka ci lingilile oco a kutise osõi Petulu, pole, wa ci lingila oku u pindisa loku lekisavo kolondonge vikuavo oku yuvula epela. Eci ca kokela esumuo Petulu pole, eye wa kuatisiwa lelungulo liaco.

13. Tu lekisa ndati ohenda?

¹³ Oco o lekise ohenda ku vana o sole, olonjanja vimue o sukila oku eca kokuavo elungulo. Eci o ci linga, setukula Yesu poku tiamisila elungulo liove kolonumbi vi sangiwa Vondaka ya Suku. Kala ukuacikembe. Kolela okuti ovo va yongola oku linga eci ca sunguluka kuenje vana va sole Yehova haivo va ku sole, va ka kapako elungulo liove. Lipula ndoco: ‘Ñuete hẽ utõi woku vangula eci ndi mola okuti omunu umue ndi sole o kasi oku linga cimue cĩvi? Anga hẽ poku eca elungulo, ndi ci linga lohenda, ale ndi ci linga lukãlu? Cipi ocimãho cange coku eca elungulo? Anga hẽ ndi ci linga omo okuti nda tema lomunu waco, ale ndi ci lingila omo okuti ndi yongola oku u kuatisa?’

14. Yesu wa lekisa ndati uwa?

¹⁴ Yesu ka kũlĩhĩle lika eci ciwa, pole, wa ci lekisavo. Eye o sole Isiaye kuenje olonjanja viosi o linga eci ciwa locimãho ca sunguluka. Ocituwa caye coku lekisa uwa ceya oku limbukiwa ndomo a tata vakuavo. Omunu uwa, olonjanja viosi o sanda olonjila vioku kuatisa vakuavo kuenda oku va lingila eci ciwa. Oku kũlĩha oku linga eci ciwa ka ci tẽla; tu sukila oku linga eci ciwa locimãho ca sunguluka. Tu sukila oku lipula ndoco: ‘Citava hẽ oku linga eci ciwa locimãho ka ca sungulukile?’ Oco ci tava. Ndeci, Yesu wa tukula vana va endaile oku eca olombanjaile kolohukũi locimãho coku muiwa lomanu loku va pandiya. Ndaño okuti elinga liaco lia kala liwa, Yehova ka va sanjukilile.—Mat. 6:1-4.

15. Tu lekisa ndati uwa?

¹⁵ Tu linga lika uwa nda tu ci linga locimãho coku kuatisa. Tu sukila oku lipula ndoco: ‘Anga hẽ sia kũlĩhĩle lika oku linga eci ciwa, pole, ndamamako oku ci linga? Cipi ocimãho cange poku linga uwa?’

16. Eteke leteke nye tu sukila oku linga kuenda momo lie?

¹⁶ Ka tu ka simi okuti eci tu papatisiwa tua pitĩla kesulilo lioku wala omunu wokaliye. Oku wala omunu wokaliye ku sokisiwa ‘luwalo’ umue wokaliye okuti tu sukila oku u tata ciwa. Onjila yimue yoku ci linga, poku sanda eteke leteke oku lekisa epako liespiritu lia Suku. Momo lie? Momo Yehova o Suku yimue yovilinga kuenda espiritu liaye ongusu yimue ya pama. (Efet. 1:2) Kuenje olonepa vialua viepako liespiritu vi sukila oku tu vetiya oku lekisa ovilinga. Ndeci, ndonge Tiago wa soneha hati: “Ekolelo ka li kuete ovilinga lia fa.” (Tia. 2:26) Cimuamue haico ci popiwa kolonepa viosi vikuavo viepako liespiritu lia Suku. Onjanja lonjanja tu lekisa epako liespiritu, tu eca uvangi wokuti espiritu lia Suku li kasi letu.

17. Nye tu sukila oku linga eci tu lueya koku lekisa epako liespiritu?

¹⁷ Ndaño okuti Ukristão umue wa papatisiwa vokuenda kuanyamo alua, olonjanja vimue o lueya koku lekisa epako liespiritu. Pole, ocina ca velapo, oku likolisilako oco o lekise ovituwa viaco. Kũlĩhĩsa ocindekaise eci. Nda uwalo wove una o sole calua wa toka, anga hẽ lonjanga yalua inasi uwalo waco? Sio. Citava okuti onepa yaco ya toka o yi tonga. Noke lioku ci linga, o ka kuata vali utate luwalo waco. Cimuamue haico okuti, nda wa lueya koku lekisa ohenda, epandi, ale oku tata umue locisola, ku ka sumue. Oku pinga ongecelo lutima wosi, loku sapela lomunu waco, ci pondola oku tumbulula ukamba wa kuateli. Nõlapo oku amamako oku lekisa ocituwa caco otembo yosi.

18. Nye tu sukila oku ivaluka?

¹⁸ Tu kuete esumũlũho lialua omo lioku kuata Yesu ndongangu yetu! Osimbu tu likolisilako oku setukula ovisimĩlo kuenda ovituwa viaye, ci ka leluka kokuetu oku lekisa ovilinga ndevi viaye. Nda tua likolisilako oku lekisa ovilinga ndevi via Yesu, tu ka tẽla oku wala omunu wokaliye. Vocipama cilo, tua kũlĩhĩsa lika olonepa vikuãla viepako liespiritu lia Suku. Momo lie ku sandela otembo yoku konomuisa olonepa vikuavo viepako liespiritu loku sokolola ndomo o pondola oku lekisa ovituwa viaco? Ove o ka sanga ulala waco Velivulu Lioku Konomuisa Liolombangi Via Yehova, vemẽhi liosapi hati “Vida Cristã” kuenda “Fruto do Espírito.” Kolela okuti, nda wa linga onepa yove, Yehova o ka ku kuatisa oku wala omunu wokaliye kuenda oku amamako oku ci linga.