Ove hẽ wa Kolela Suku?

SOKOLOLA okuti o kuete ekamba limue wa kolela calua, pole ekamba liaco lilinga ocina cimue okuti, ka cu ku lomboloka ciwa. Kuenje, omanu vamue vo popia lãvi, vakuavo va pisa ovisimĩlo viaye poku u lundila okuti ongangala. Ove hẽ o tava lonjanga kolondaka viavo, ale o talamẽla oco o yeve eci ekamba liove li ku sapuila? Nda okuti ekamba liaco ka li kasi ocipepi love, anga hẽ o talamẽla okuti ku pisa ovisimĩlo viaye?

Osimbu handi kua tambuluile, o sukila oku kũlĩha ovina vialua. Citava okuti o lipula ndoco: ‘Anga hẽ nda kũlĩha ciwa ekamba liange kuenda ovina via ndi vetiya oku kolela kokuaye?’ Oku ci linga, ca sunguluka. Pole, sokolola ndoco: Ka tu sukilavo oku linga epulilo liaco, poku konomuisa eci omanu va siata oku popia okuti Suku ongangala?

Citava okuti ku kuete elomboloko liovina vimue Suku a siata oku linga, ale o komõha esunga lieci a ecelela ovina vimue. Kuli omanu valua va siata oku ku sapuila okuti, Suku ongangala kuenda va siata oku ku vetiya oku pisa ovisimĩlo viaye. Ove hẽ o ka lekisa ekolelo kokuaye loku talamẽla toke eci o kũlĩha ovina vialua? Etambululo liove, olio li ka lekisa nda wa kũlĩha ciwa Suku. Omo liaco, lipula ndoco: ‘Suku o kasi hẽ ndekamba lipi kokuange?’

Nda o kasi oku liyaka lovitangi, pamue o vetiyiwa oku sima okuti, Suku hekamba lioveko. Pole, sokolola ciwa. Anga hẽ Suku eye wa koka ovitangi o liyaka lavio? Ndomo tua ci konomuisa, Satana eye “ombiali yoluali lulo,” Yehova hayeko. (Yoano 12:31) Omo liaco, Satana eye wa siata oku koka ohali, kuenda evĩho li kasi mulo voluali. Ku tava hẽ okuti valua pokati ketu va siata oku liyaka lovitangi omo liekambo lioku li pua kuenda ovina viya ño haivio vi veta ño?

Anga hẽ Suku eye o kuete eko liovitangi vietu? Kũlĩhĩsa eci Embimbiliya li popia catiamẽla ku Suku ndoco: ‘Ululiki wilu longongo’ okuti, ‘vovopange aye a komõhisa,’ mua kongela atimba etu, kuenda Yehova eye ‘Suku, una o kuete peka liaye omuenyo.’ (Osamo 124:8; 139:14; Daniele 5:23) Eci hẽ ci lomboloka nye?

Ci lomboloka okuti omuenyo wetu, ale ekalo lietu liosi, wa tiamẽla Kululiki wetu. (Ovilinga 17:28) Ci lombolokavo okuti, ovina via posoka via tu ñuala, oku kala lakamba va tu sole, oku yeva oku pepa kuovikulia, oku papata ovina, oku yeva ovileñi, lelemba liovina viwa, ovina viaco viosi ombanjaile ya tunda ku Suku. (Tiago 1:17) Ku tava hẽ okuti olombanjaile viaco, vi eca kokuaye omoko yoku kala Ekamba limue li sesamẽla oku soliwa loku koleliwa calua?

Citava okuti ka ca lelukile kokuove oku kolela ku Suku. Pamue, ove kua kũlĩhĩle ciwa Suku okuti u kolela. Kuenda ku kuete elomboloko liaco. Vovipama evi ka tua konomuisile asunga osi omanu va siata oku popela okuti Suku ongangala. Pole, ovina viaco, ka vi ku vetiya hẽ oku likolisilako oco o kũlĩhe ciwa Suku? a Tua kolela okuti osimbu o ci linga, o ka kũlĩha ciwa Suku loku u kolela. Anga hẽ Suku ongangala? Sio, Embimbiliya li popia hati: “Suku eye ocisola.”—1 Yoano 4: 8.

[Etosi pombuelo]

[Elitalatu kemẽla 7]

Anga hẽ Suku eye wa koka ovitangi viove, ale wa siata oku ku sumũlũisa?