O Pondola hẽ Oku Kolela Ketavo li Litenga Vuyaki?

Ulume umue o tukuiwa hati, Alberto okuti tunde eci a iñila vusualali pa pita ale ci soka ekũi lianyamo, wa popia hati: “Poku likutilila tu pinga asumũlũho kocitunda cetu loku popia tuti: ‘Suku o kasi love.’ ‘Pole, atatahãi nda kuata a ndi vetiya oku sima ndoco: ‘Ndi kasi oku enda koku ponda omanu. Pole, Embimbiliya li popia hati: “Ku ka ponde.’”

Ulume umue o tukuiwa hati Ray, wa kala usongui wasualali vokuenda Kuyaki Wavali wa pita voluali. Onjanja yimue wa pulile kusongui wasualali hati: “Poku iñila vocimbaluku o kasi oku likutililako asualali oco va yule. Anga hẽ ovanyãli ka va kasivo oku likutilila oco va yule?” Usongui wocimbaluku wa tambulula hati: Ñala o talavaya lunene u komohĩsa.

Nda kua sanjukilile etambululo eli, ku kasi likaliove.

EMBIMBILIYA LI LONGISA NYE?

Yesu wa popia hati ocihandeleko ca Suku okuti oco cavelapo ca popia hati: “Sola u o lisungue love ndeci o lisole ove muẽle.” (Marko 12:31) Anga hẽ Yesu wa kala oku popia okuti tu sukila lika oku sola omanu vana tu lisungue lavo ale tu sukila oku sola omanu vosi? Sio hacoko. Eye wa sapuila olondonge viaye hati: “Kokulisola kuene pokati oko omanu vosi va limbukila okuti vulondonge viange.” (Yoano 13:34, 35.) Ocisola ci kasi pokati kakristão oyo ondimbukiso yaco. Ovo va ci linga poku eca omuenyo wavo oco va kuatise vakuavo.

Akristão va kala kocita catete va kapeleko olondaka via Yesu. The Encyclopedia of Religion (Elivulu limue mu Sangiwa Ovina Viatiamẽla Ketavo) li popia hati: “Asongui vetavo, oku kongelamo va Tertuliano kuenda va Origene va enda oku tava okuti, Akristão va kisikiwa oku ponda omanu. Ovo va ci lingaile oco va liteyuile kovoyaki a enda oku lingiwa la va Roma.”

OLOMBANGI VIA YEHOVA VIA SIATA OKU LINGA NDATI OVOPANGE AVO?

Omo okuti Olombangi Via Yehova vi sangiwa kolofeka viosi, omanu va kasi lavo va siata oku litenga vovoyaki oluali. Pole, Olombangi Via Yehova via siata oku likolisilako oco ka vi ka li tenge vovoyaki aco.

Vokuenda kunyamo wo 1994 ndaño okuti pokati ka va Hutu la va Tutsi ko Rwanda pa kala esuvu, pole Olombangi Via Yehova ka via litengele vuyaki waco. Epata limue Liolombangi Via Yehova, lia enda oku yekisa vakuavo ndaño okuti poku ci linga, va kapele omuenyo wavo kohele. Eci Olombangi vimue vivali Via Yehova okuti viatiamẽla kepata lio Hutu via yekisa vamanji vakuavo, asualali va popia vati: “Ene vu sesamẽla oku pondiwa omo wa kuatisi epata lia va Tutsi oco ka li ka pondiwe.” Omo liaco, ci kale Olombangi Via Yehova viatiamẽla kepata lia va Hutu la va Tutsi ka va li pondele.—Yoano 15:13.

Cipi ocisimĩlo cove: Anga hẽ ovituwa Olombangi Via Yehova via siata oku lekisa vi li kuata lolondaka via Yesu vioku lekisa ocisola?

[Elitalatu kemẽla 5]

[Ono yelitalatu]

Based on U.S. Army photo

[Etosi lia velapo 5]

Anga hẽ asongui vatavo esanda va siata oku sima okuti va kuete ocisola Cakristão vocili?