Nicole manji umue ukãi ko Kolombia wa popia hati: “Ame ndi sole calua Onjango yetu Yusoma! Oyo ocitumãlo cimue ndi pondola oku lisanga lepata liange konepa yespiritu.” Ove hẽ wa siatavo oku liyeva nda Nikole?

 Voluali luosi Olombangi Via Yehova via siata oku liongoluila mueci ci soka 63.000 Kolonjango Viusoma. Ovitumãlo viaco via tungiwa oco tu fendelelemo Suku. Pole, hacoko lika. Manji David ukundi wotembo yosi ko Kolombia wa popia hati: “Onjango yetu Yusoma yi kuatisa omanu oku tava kovina tu longisa. Valua veya onjanja yatete, va komõha poku mola ndomo tu kasi oku amamako oku yi tata ciwa.” Pole, ci sukila alikolisilo. Tua siata oku likolisilako oco tu yelise kuenda oku semulula Olonjango vietu Viusoma. Tua siata oku linga ndati upange waco?

 Akongelo a liongoluila Vonjango yimue Yusoma, o-o a kuete ocikele coku yi semulula. Oco ci lingiwe, vamanji alume kuenda akãi, va siata oku tambula ocikele coku yelisa Onjango Yusoma. Ovo va semululavo ovitangi vitito.

 Oseketa Yoku Tunga (LDC) oco yi kuatise akongelo oku semulula Olonjango viavo Viusoma, yi nõla vamanji oco va ece epindiso. Manji lamanji ukuakupindisa, o songuila upange woku semulula eci ci soka epandu ale ekũi Kolonjango Viusoma. Eye o vi nyula kuenda o pindisa akundi vakongelo ndomo va tata onjango yavo. Noke yanyamo atatu eye o kũlĩhĩsa onjango lonjango yusoma loku tala nda ya kolapo ale yi sukila oku semuluiwa. Vamanjetu alume lakãi va siata oku sanjukila epindiso lieciwa la vamanji vaco.

 Manji ukãi Indhumathi ko India wa popia hati: “Nda komõha calua omo liepindiso liaco. Olio lia ndi kuatisa oku lilongisa ndomo tu amamako oku tata Onjango yetu Yusoma.” Manji ulume Evans wo ko Kenya wa popia ndoco: “Tua lilongisa ndomo tu yuvula oku pesela olombongo vialua poku semulula ovitangi vitito osimbu ka via livokiyile.”

 Unyamo lunyamo olombongo vi pesiwa poku talavaya kuenda oku semulula Onjango yimue Yusoma, vi upisa kovita toke kolohulukãi violondolale, a pole, ca tamba lika kocitumãlo onjango Yusoma yi sangiwa, anyamo a pitapo tunde eci ya tungiwa kuenda etendelo liakongelo a liongoluila Vonjango yaco. Pi ku tunda olombongo viaco?

 Onjango Yusoma yi semuluiwa lekuatiso liolombanjaile. Manji Alexander ko Kazaquistão, wa lombolola hati: “Onepa yimue yolombongo, yi fetiwa ko Internet kuenda kovopange akuavo ndeci, ovava, lolusu. Onepa yikuavo, yi landa olopapelo viovokalete, ololuva, onjapãu kuenda otinda.” Handi vali, olombanjaile vi eciwa kupange u lingiwa voluali luosi, vi kuatisa koku semulula ovitumãlo vietu viefendelo voluali luosi.

 Nda upange woku semulula Onjango yimue Yusoma wa ambata olosãi vivali ale vitatu kuenda ci sukila olombongo vialua, akulu vekongelo va sapuilako manji ukuakueca epindiso o panga onepa ko LDC. Nda vamanji ko LDC va tava okuti upange waco u lingiwa, citava oku feta lolombanjaile vi eciwa kupange u lingiwa voluali luosi. Vokuenda kunyamo wupange 2023, ci soka 8.793 kovitumãlo via semuluiwa, kua pesiwa eci ci soka 76.6 kolohuluwa violondolale. Kũlĩhĩsa ovopange avali a lingiwa.

 Vongola, Onjango yimue Yusoma okuti tunde eci ya tungiwa pa pita ale 15 kanyamo, ya kuata ovitangi vialua. Olofiyu violusu via sukilile oku piñainyiwa, ovimano via tokele kuenda omanu va kala ocipepi lonjango yaco yusoma va popia okuti ovava a kala oku iñila volonjo viavo. Vamanji vo LDC va linga esokiyo limue lioku potolola ocitangi caco. Upange waco wa pesela eci ci soka 9.285 kolondolale. Omanu va kasi ocipepi Lonjango Yusoma va pandula calua kuenda va komõha ndomo upange waco wa lingiwa.

 Ko Polônia, olusoka Luonjango yimue Yusoma lua tekele kuenda olotapete viaco via nyõlehele kuenda via sukilile oku vi piñainya. Vamanji vo LDC va tava upange woku semulula olusoka luaco loku piñainya olotapete. Upange waco wa pesela eci ci soka 9.757 kolondolale. Omo liaco, pa ka pita anyamo alua oco ku lingiwe upange ukuavo woku semulula Onjango yaco Yusoma.

 Oku semulula ka ku kuatisa lika oku tetẽla olombongo, pole, ku ecavo esivayo ku Yehova. Manji Shaun wo ko Tonga wa popia hati: “Omo liupange wetu woku semulula, tu pondola oku fendelela Yehova pocitumãlo cimue ca yela, congotiyiwa ciwa kuenda Onjango yimue Yusoma yeca esivayo konduko yaye posongo. Tu yeva esanju lialua eci tu laleka omanu oco veye Vonjango yetu Yusoma.”

 Vosi yetu tu pondola oku kuatisa koku yelisa kuenda koku semulula ocitumãlo cetu cefendelo. Manji Marino ukuakueca epindiso ko Australia wa popia hati: “Vosi yetu tu pondola oku kuatisa kupange waco woku semulula Olonjango vietu Viusoma. Nda tua ci linga tu ka kuatisa oku tetẽlela olombongo oco vi ka kuatise kolonepa vikuavo kuli esukila.”

 Manji Joel wo ko India, o sole calua upange woku semulula Onjango yavo Yusoma. Eye hati: “Oku talavaya kumue la vamanji ci ñuatisa oku sokolola ndomo ekalo li ka kala voluali luokaliye.” Manji Nicole wa tukuiwa ale kefetikilo wa popia hati: “Nda kuatisa koku puenya posi osimbu vamanji va kala oku semulula okalete. Ndaño sia potoluile ocitangi caco, pole, nda kuatisa oco lomue ka ka lisielenepo.”

 Nda o yongola oku lieca olumue oco o kuatise koku semulula Ojango yene Yusoma, sapela lakulu vo vekongelo liove. Handi vali, olombanjaile viove ka vi kuatisa lika koku semulula Onjango yene Yusoma, pole, vi kuatisavo Kolonjango Viusoma voluali luosi. Olombanjaile viaco citava okuti vi kapiwa volokasia vonjango yene yusoma ale vi lingiwa pocakati co donate.dan124.com. Tu sole calua ocituwa cove coku eca.