Ҳазрати Исо вафот этишларидан сал олдин: «Шоҳлик ҳақидаги хушхабар ҳамма халқларга шаҳодат берилиши учун бутун дунё бўйлаб ваъз қилинади. Ана ўшандагина охират бўлади»,— деб айтган эдилар. (Матто 24:14) Қизиқ, бу умумжаҳон ваъзгўйлик фаолияти қандай амалга оширилар экан? Исо пайғамбарга тақлид қилибгина, бу ишни амалга ошириш мумкин. (Луқо 8:1)

Биз уйма-уй юриб, одамлар билан суҳбатлашишга ҳаракат қиламиз. Исо алайҳиссалом шогирдларига хушхабарни уйма-уй юриб ваъз этишни ўргатганлар. (Матто 10:11–13; Ҳаворийлар 5:42; 20:20) Милодий биринчи асрда яшаган ўша хушхабар воизларига ваъзгўйлик учун муайян ҳудудлар ажратиб берилган эди. (Матто 10:5, 6; 2 Коринфликларга 10:13) Шу каби, бизнинг фаолиятимиз ҳам яхши ташкиллаштирилган бўлиб, ҳар бир жамоатга ваъзгўйлик учун ҳудуд ажратиб берилади. Бу туфайли биз Ҳазрати Исонинг «ваъз қилиб, кенг шоҳидлик бериш» амрини бажара оламиз. (Ҳаворийлар 10:42)

Биз одамларни учратса бўладиган жойларга борамиз. Исо пайғамбар одамлар кўп бўлган жойларда, масалан, денгиз бўйида ёки қудуқ олдида ваъз қилиб яхши намуна қолдирганлар. (Марк 4:1; Юҳанно 4:5–15) Биз ҳам одамлар билан Муқаддас Китоб ҳақида суҳбатлашгимиз келади. Масалан кўча-кўйда, ишхоналарда, боғларда ва телефон орқали улар билан гаплашишга ҳаракат қиламиз. Шунингдек, қулай фурсат туғилганда, биз қўни-қўшниларимиз, ишдаги ҳамкорларимиз, синфдошларимиз ва қариндош-уруғларимизга шаҳодат берамиз. Бу умумий ҳаракатларнинг бари, бутун жаҳон бўйлаб миллионлаб инсонларга «нажот ҳақидаги хушхабарни» эшитиш имконини яратади. (Забур 96:2)

Сиз Худонинг Шоҳлиги тўғрисидаги хушхабарни ва одамларни қандай келажак кутаётганини кимларга айтиб беришингиз мумкин? Бу умид бахш этувчи хабар ичингизда қолиб кетмасин. Уни иложи борича тезроқ бошқаларга етказинг!

• Қайси «хушхабар» ваъз қилиниши керак?

• Яҳованинг Шоҳидлари Ҳазрати Исонинг ваъз этиш усулларига қандай тақлид қилишяпти?