Muqaddas Kitobga ko‘ra, Alloh odamlar o‘zlarini «zinodan tiyishlarini» xohlaydi. (1 Salonikaliklarga 4:3) Muqaddas Kitobda qo‘llanilgan «zino» so‘zi bevafolik, gomoseksualizm va nikohda bo‘lmagan kishilar orasidagi jinsiy aloqani o‘z ichiga oladi.

•  Nega ishqiy munosabatlarni rivojlantirib, birga yashamoqchi bo‘lgan erkak va ayolning turmush qurishi Xudo uchun muhim?

•  Erkak va ayol bir-biriga mos kelish-kelmasligini tekshirish uchun turmush qurmay birga yashashi oqilonami?

•  Nikohi mustahkam bo‘lishi uchun juftliklar nimalar qilishi mumkin?

•   Nikohning asoschisi — Xudodir. Xudo ilk erkak va ayolni nikoh rishtalari bilan bog‘laganida nikoh tuzumiga asos solgan. (Ibtido 2:22–24) Erkak va ayol turmush qurmasdan birga yashashi Uning niyatiga kirmagan.

•   Xudo odamlar uchun nima yaxshi ekanini biladi. U erkak va ayol o‘rtasidagi nikoh rishtalari bir umrlik bo‘lishini va bundan oilaning barcha a’zolari foyda olib, o‘zini xavfsiz his qilishini istagan. Quyidagi misolga diqqat qarating: mebelni to‘g‘ri yig‘ish uchun uni ishlab chiqargan korxonaning yo‘l-yo‘riqlari zarur bo‘lganidek, baxtli nikoh qurish uchun ham Xudoning yo‘l-yo‘riqlari kerak. Xudoning me’yorlari ularga amal qilganlarga doim foyda keltiradi. (Ishayo 48:17, 18)

•   Turmush qurmasdan jinsiy aloqada bo‘lish ayanchli oqibatlarga olib kelishi hech gap emas. Masalan, bunday oqibatlarga istalmagan homiladorlik, jinsiy aloqa orqali yuqadigan kasalliklar va hissiy jarohat kirishi mumkin.

•   Xudo erkak va ayolga jinsiy aloqa yo‘li bilan farzand ko‘rish qobiliyatini bergan. Xudoning nazarida hayot muqaddas va farzand ko‘rish qobiliyati Uning qimmatbaho hadyasidir. U bizdan bu hadyani qadrlashimizni va nikoh tuzumiga hurmat ko‘rsatishimizni kutadi. (Ibroniylarga 13:4)

 Baxtli nikohning kaliti erkak va ayol mas’uliyatni his etmay, muayyan vaqt davomida birga yashashida emas, aksincha, bir-birining oldidagi burchni his etib, muammolarni bir jamoa bo‘lib hal qilishidadir a. Rasmiy nikoh turmush o‘rtoqlar bir-birining oldidagi burchni his qilishiga yordam beradi. (Matto 19:6)

 Mukammal nikohning o‘zi yo‘q. Lekin shunga qaramay, juftliklar Muqaddas Kitobdagi prinsiplarni qo‘llab, nikohlarini mustahkamlay olishadi. Mana maslahatlardan ba’zilari:

•   Turmush o‘rtog‘ingizning manfaatlarini o‘zingiznikidan ustun qo‘ying. (1 Korinfliklarga 7:3–5; Filippiliklarga 2:3, 4)

•   Bir-biringizga nisbatan sevgini rivojlantiring. Hurmat ko‘rsatishda davom eting. (Efesliklarga 5:25, 33)

•   Tilingizni nazorat qilishni o‘rganing. (Hikmatlar 12:18)

•   Sabrli bo‘ling va kechirishga tayyor turing. (Kolosaliklarga 3:13, 14)