Ri thea mavhonele na maitele a tshimbidzanaho na mbulungo kha pfunzo dza Bivhili, dzine dza katela zwi tevhelaho:

•   Ndi zwa nzulele u lila musi wo felwa. Vhafunziwa vha Yesu vho lila musi vho felwa. (Yohane 11:33-​35, 38; Mishumo 8:2; 9:​39) Nga zwenezwo, a ri dzhii mbulungo sa tshifhinga tsha u nwesa. (Muhuweleli 3:​1, 4; 7:​1-4) Nṱhani hazwo, ri i dzhia i tshifhinga tsha u sumbedza u pfela vhuṱungu.​—Vharoma 12:15.

•   Vhafu a vha ḓivhi tshithu. Hu sa londwi lushaka kana mvelelo yashu, ri iledza mikhuvha kana maitele o thewaho kha u tenda zwithu zwi sa bvi maṅwaloni zwa uri hu na zwine vhafu vha zwi pfa na uri vha nga thusa vhathu vha tshilaho. (Muhuweleli 9:​5, 6, 10) Ri iledza zwithu zwi katelaho mulindelo, mbulungo dza maṱeleṱele na vhuṱambo ha ṅwaha muṅwe na muṅwe ha u humbula lufu, u ṱhavhela vhadzimu, u amba na vhafu kana u vha humbela tshiṅwe tshithu na mikhuvha ine ya itelwa tshilikadzi. Ri iledza yeneyi mikhuvha yoṱhe na maitele ayo, ri thetshelesa ndaela ya Bivhili ine ya ri: “Ni sendele kule, . . . ni songo kwama dzitshikha.”​—2 Vhakorinta 6:​17.

•   Hu na fulufhelo nga vho faho. Bivhili i funza uri hu ḓo vha na mvuwo na uri tshi ḓo ḓa tshifhinga tshine ha si tsha ḓo vha na lufu. (Mishumo 24:15; Nzumbululo 21:4) Ḽeneḽi fulufhelo ḽi ri thusa uri ri iledze mikhuvha yo kalulaho ya u lila, samusi ḽo thusa na Vhakriste vha u thoma.​—1 Vhathesalonika 4:​13.

•   Bivhili i eletshedza uri ri ḓiṱukufhadze. (Mirero 11:2) A ri tikedzi mahumbulele a uri mbulungo i tea u vha tshibuli tsha u “ṱongisa zwine muthu a vha nazwo” zwine zwa katela matshilele kana vhuimo ha zwa masheleni. (1 Yohane 2:​16) A ri iti mbulungo dza maṱeleṱele dze zwihuluhulu dza itelwa u mvumvusa kana dzine ha rengwa mabogisi a ḓuraho vhukuma nahone ha ambarwa zwiambaro zwo kalulaho u itela u ṱongisela vhavhoni.

•   A ri lingedzi u kombetshedza vhaṅwe vhathu uri vha ṱanganedze zwine ra zwi tenda malugana na mbulungo. Kha ḽeneḽi sia ri tevhela maitele ane a ri: “Muṅwe na muṅwe washu u ḓo ḓifhindulela ha Mudzimu.” (Vharoma 14:12) Naho zwo ralo, arali ra ṋewa tshibuli, ri a lingedza u ṱalutshedza zwine ra zwi tenda ri “na muya wa u vuḓa na ṱhonifho yo dzikaho.”​—1 Petro 3:​15.

 Fhethu: Arali muṱa u tshi ṱoḓa u ita mbulungo u dzhia tsheo malugana na hune ya ḓo farelwa hone, i nga kha ḓi farelwa Holoni ya Muvhuso, motsharani, muḓini, fhethu hune ha fhiswa zwitumbu kana mavhiḓani.

 Nyambo: Hu ṋekedzwa nyambo u itela u khuthadza vho felwaho nga u ṱalutshedza zwine Bivhili ya zwi amba nga ha lufu na fulufhelo ḽa mvuwo. (Yohane 11:25; Vharoma 5:​12; 2 Petro 3:​13) Nyambo ya mbulungo i nga kha ḓi amba nga ha pfaneleo dzavhuḓi dza mufu, khamusi ya ombedzela ngudo dzi ṱuṱuwedzaho dzo vhewaho nga tsumbo ya u fulufhedzea ya onoyo muthu.—2 Samuele 1:​17-​27.

 Hu nga kha ḓi imbiwa luimbo lwo thewaho Maṅwaloni. (Vhakolosa 3:​16) Musi nyambo i tshi fhela hu valwa nga thabelo i khuthadzaho.​—Vhafilipi 4:​6, 7.

 Mbadelo kana kose-kose: A ri badelisi miraḓo yashu musi ri tshi ita tshumelo dza vhurereli naho dzi dzifhio, u katela na mbulungo kana u ita kosi-kose miṱanganoni yashu.​—Mateo 10:8.

 Vhane Vha Ḓa Mbulungoni: Na vhathu vha si Dziṱhanzi vha nga ḓa mbulungoni ine ya farwa Holoni ya Muvhuso. U fana na miṅwe miṱangano yashu, tshumelo dzo raloho dza mbulungo dzo vuletshelwa vhomuthumunzhi.

 Ṱhanzi iṅwe na iṅwe i ḓidzhiela tsheo, zwo thewa kha luvalo lwawe lwo gudiswaho nga Bivhili. (1 Timotheo 1:​19) Naho zwo ralo, a ri sheli mulenzhe kha vhuṱambo ha vhurereli vhune ra zwi vhona uri a vhu tendelani na Bivhili.​—2 Vhakorinta 6:​14-​17.