Ndi Ngani Ṱhanzi dza Yehova vha sa Pembeleli Khirisimusi?
Mavhonele o ḓoweleaho o khakheaho
Mazwifhi: Ṱhanzi dza Yehova a vha pembeleli Khirisimusi nga nṱhani ha uri a vha tendi kha Yesu.
Ngoho: Ri Vhakriste. Ri tenda uri vhathu vha nga tshidzwa nga Yesu Kristo fhedzi.—Mishumo 4:12.
Mazwifhi: Ni fhandekanya miṱa nga u funza miraḓo yayo uri i songo pembelela Khirisimusi.
Ngoho: Ri a kwamea vhukuma nga miṱa nahone ri shumisa Bivhili u itela u fhaṱa miṱa yo khwaṱhaho.
Mazwifhi: Ni pfukwa nga “muya wa Khirisimusi” wa mafunda, mulalo kha ḽifhasi na u tamela vhathu zwivhuya.
Ngoho: Ri lwela u vha na mafunda na mulalo ḓuvha ḽiṅwe na ḽiṅwe. (Mirero 11:25; Vharoma 12:18) Sa tsumbo, nḓila ine ra fara ngayo miṱangano yashu na u funza i tendelana na ndaela ya Yesu ine ya ri: “No ṋewa nga mahala, ṋeani nga mahala.” (Mateo 10:8) Zwiṅwe hafhu, ri vhudza vhathu uri vha fulufhele Muvhuso wa Mudzimu samusi u wone une wa ḓo ḓisa mulalo kha ḽifhasi.—Mateo 10:7.
Ndi ngani Ṱhanzi dza Yehova vha sa pembeleli Khirisimusi?
Yesu o laedza uri ri humbule lufu lwawe, hu si u bebwa hawe.—Luka 22:19, 20.
Vhaapostola vha Yesu na vhafunziwa vha u thoma a vho ngo pembelela Khirisimusi. New Catholic Encyclopedia i amba uri “
vhathu vho thoma u pembelela u Bebwa ha Yesu nga 243 [C.E.],
” miṅwaha i fhiraho ḓana nga murahu ha lufu lwa muapostola wa u fhedza.A hu na vhuṱanzi vhune ha sumbedza uri Yesu o bebwa nga ḽa 25 December; ḓuvha ḽe a bebwa ngaḽo a ḽo ṅwalwa Bivhilini.
Ri tenda uri Mudzimu ha ṱanganedzi Khirisimusi nga ṅwambo wa uri i bva kha mikhuvha na maitele zwa vhuhedeni.—2 Vhakorinta 6:17.
Ndi ngani ni tshi ḓiimisela u nyaliwa nga vhathu nṱhani ha uri ni pembelele Khirisimusi?
Vhathu vhanzhi vha kha ḓi pembelela Khirisimusi naho vha tshi zwi ḓivha uri i bva kha vhuhedeni nahone a i tikedzwi nga Bivhili. Vhathu vho raloho vha nga vhudzisa uri: Ndi ngani Vhakriste vha tshi fanela u ita zwithu zwine zwa ḓo ita uri vha nyaliwe? Ndi ngani u sa i pembelela zwi zwa ndeme?
Bivhili i ri ṱuṱuwedza uri ri shumise ‘maanḓa a u ṱalukanya.’ (Vharoma 12:1, 2) I ri funza uri ri dzhiele nṱha ngoho. (Yohane 4:23, 24) Nga zwenzwo, naho ri tshi kwamea nga nḓila ine vhathu vha ri dzhia ngayo, ri tevhela maitele a Bivhili naho zwi tshi ḓo ita uri vhathu vha ri nyale.
Naho ri sa pembeleli Khirisimuni, ri ṱhonifha phetho ine muthu a i ita kha ḽeneḽi sia. A ri thithisi vhaṅwe vhathu musi vha tshi khou pembelela Khirisimusi.