Genesi 26:1-35
26 Ha vha na nḓala shangoni nga nnḓa ha iḽa ye ya vha hone misini ya Abrahamu,+ Isaka a ya ha Abimeleke, khosi ya Vhafilisita ngei Gerara.
2 Yehova a ḓa khae a ri: “U songo ya Egipita. Dzula kha shango ḽine nda ḓo u sumbedza ḽone.
3 Ivha mutsinda kha ḽeneḽi shango,+ ndi ḓo bvela phanḓa ndi tshi u fhaṱutshedza ngauri enea mashango oṱhe ndi ḓo a ṋea iwe na vhana* vhau,+ ndi ḓo ita zwe nda anela khotsi au Abrahamu+ nda ri:
4 ‘Ndi ḓo andisa vhana* vhau sa ṋaledzi dza ṱaḓulu,+ vhana* vhau ndi ḓo vha ṋea enea mashango oṱhe;+ tshaka dzoṱhe dza ḽifhasi dzi ḓo ḓiwanela phaṱhutshedzo nga vhana* vhau,’+
5 nga nṱhani ha uri Abrahamu o nthetshelesa, a bvela phanḓa a tshi ita zwine nda zwi ṱoḓa, a tshi tevhedza milayo yanga yoṱhe.”+
6 Isaka a bvela phanḓa a tshi dzula Gerara.+
7 Musi vhanna vha henefho fhethu vha tshi vhudzisa nga ha mufumakadzi wawe, o vha a tshi ri: “Ndi khaladzi anga.”+ O vha a tshi ofha u amba uri, “Ndi mufumakadzi wanga,” ngauri o vha a tshi ri, “Vhanna vha fhano vha nga mmbulaya vha tshi ṱoḓa Rebeka,” ngauri o vha o naka.+
8 Nga murahu ha tshifhinga Abimeleke khosi ya Vhafilisita a ṱodzimela nga fasiṱere a vhona Isaka a tshi khou kuvhatedzana na Rebeka mufumakadzi wawe.+
9 Abimeleke a vhidza Isaka nga u ṱavhanya a ri: “Matsina ndi mufumakadzi wau? Ndi ngani wo ri, ‘Ndi khaladzi anga’?” Isaka a amba nae a ri: “Ndo zwi amba ngauri ndo vha ndi tshi ofha u vhulawa nga nṱhani hawe.”+
10 Fhedzi Abimeleke a dovha a ri: “Ndi zwithu-ḓe zwe wa ri ita?+ Muṅwe wa vhathu vhanga o vha a tshi ḓo vha o lala na mufumakadzi wau, wo vha u tshi ḓo ita uri ri vhe na mulandu!”+
11 Nga zwenezwo, Abimeleke a laya vhathu vhoṱhe, a ri: “Ane a kwama uyu munna na mufumakadzi wawe u ḓo vhulawa!”
12 Nga murahu ha zwenezwo, Isaka a thoma u zwala mbeu shangoni ḽeneḽo, nga wonoyo ṅwaha a kaṋa zwe a zwi zwala kaḓana ngauri Yehova o vha a tshi khou mu fhaṱutshedza.+
13 Nga zwenezwo, Isaka a pfuma, lupfumo lwawe lwa ḓi anda lu tshi ya, a vha mupfumi muhulu.
14 A vha na masambi a nngu na a kholomo na vhashumeli vhanzhi,+ lwe Vhafilisita vha thoma u mu itela vivho.
15 Ngauralo, Vhafilisita vha fukedza zwisima nga mavu zwe vhashumeli vha khotsi awe vha zwi bwa misini ya Abrahamu.+
16 Mafheleloni Abimeleke a amba na Isaka a ri: “Pfuluwa shangoni ḽa hashu ngauri wo no pfumesa u ri fhira.”
17 Isaka a pfuluwa henefho a ya a atha madennde govhani* ḽa Gerara,+ a dzula henefho.
18 Isaka a dovha a bwa zwisima zwa maḓi zwe zwa vha zwo bwiwa misini ya khotsi awe Abrahamu, zwe Vhafilisita vha zwi fukedza musi Abrahamu o no fa;+ a zwi vhidza nga madzina e khotsi awe a vha a tshi zwi vhidza ngao.+
19 Musi vhashumeli vha Isaka vha tshi khou bwa govhani* vha wana tshisima tsha maḓi a si na muṋo.
20 Vhalisa vha Gerara vha thoma u lwa na vhalisa vha Isaka, vha ri: “Maḓi ndi ashu!” A ri tshenetsho tshisima tshi pfi Eseke,* ngauri vho lwa nae.
21 Vhashumeli vha Isaka vha dovha vha bwa tshiṅwe tshisima na tshone vhalisa vha Gerara vha thoma u tshi lwela. A ri tshenetsho tshisima tshi pfi Sitina.*
22 Nga murahu a pfuluwa henefho, a bwa tshiṅwe tshisima, fhedzi vha si tsha tshi lwela. A tshi ira dzina ḽa Rehobothe,* a ri: “Ndi ngauri zwino Yehova o ri ṋea fhethu huhulu, a ita uri ri vhe vhanzhi shangoni.”+
23 A bva henefho a ya Beresaba,+
24 Yehova a ḓa khae vhusiku a ri: “Ndi nṋe Mudzimu wa Abrahamu khotsi au.+ U songo ofha,+ ngauri ndi na iwe, ndi ḓo u fhaṱutshedza, ndi ḓo andisa vhana* vhau ndi tshi itela Abrahamu mushumeli wanga.”+
25 Isaka a fhaṱa aḽeṱare henefho, a renda dzina ḽa Yehova,+ a atha dennde henefho,+ vhashumeli vha Isaka vha bwa tshisima henefho.
26 Nga murahu Abimeleke a ḓa khae a tshi bva Gerara e na mueletshedzi wawe Ahusati na Phikolo mulangammbi wawe muhulwane.+
27 Isaka a amba navho a ri: “Ndi ngani no ḓa kha nṋe, ngauri no vha ni tshi mmbenga, na mpandela shangoni ḽaṋu?”
28 Vhone vha ri: “Zwi tou vha khagala uri Yehova u na iwe.+ Riṋe ra ri: ‘Ri humbela uri ri ite muano, ri vhofhe mulanga na iwe,+
29 uri a u nga lwi na riṋe, vhunga na riṋe ri songo lwa na iwe, samusi ro u itela zwivhuya nga u u pfulusa nga mulalo. Zwino ndi iwe wo fhaṱutshedzwaho nga Yehova.’”
30 Ngauralo, a vha itela tshimima vha ḽa, vha nwa.
31 Vha vuwa nga matsheloni-tsheloni vha anelana.+ Nga murahu ha zwenezwo, Isaka a onesana navho, vha ṱuwa ḽo lala.
32 Nga ḽeneḽo ḓuvha vhashumeli vha Isaka vha ḓa vha mu vhudza uri vho bwa tshisima,+ vha ri: “Ro wana maḓi!”
33 A ri tshenetsho tshisima tshi pfi Shiba. Ndi ngazwo dzina ḽa wonoyo muḓi ḽi tshi pfi Beresaba+ u swika na ṋamusi.
34 Musi Esau e na miṅwaha ya 40, a vhinga Yuditha ṅwananyana wa Beeri wa Muhethe,+ a dovha a vhinga na Basimatha ṅwananyana wa Eloni wa Muhethe.
35 Vho vha vha tshi vhaisa* Isaka na Rebeka.+
Ṱhaluso dzi re magumoni a siaṱari
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
^ Kana “muedzini.”
^ Kana “muedzini.”
^ Zwine zwa amba uri “Khani.”
^ Zwine zwa amba uri “U Pomoka.”
^ Zwine zwa amba uri “Fhethu Huhulu.”
^ Thevhedz., “mbeu.”
^ Thevhedz., “pfisa vhuṱungu.”
