U BVUMBA NGA DZIṊALEDZI: Vhaṅwe vhathu vha tenda uri vhumatshelo ha muthu vhu ya nga uri ṋaledzi dzo vha dzo dzula hani musi a tshi bebwa. Vha sedza zwa u bvumba nga dziṋaledzi kana vha vhala dzi-horoscope uri zwi vha vhudze vhumatshelo na u vha thusa u dzhia dziphetho.

U YA HA VHONDIAḒIVHA: Vhaṅwe vhathu vha tenda uri arali vha ya kha vhondiaḓivha, vha ḓo kona u wana uri ndi ngani hu tshi khou itea zwithu zwivhi khavho na uri vha tea u ita mini. Musi vho no zwi ḓivha, vha nga kona u iledza zwithu zwivhi zwine zwa nga itea khavho, u tandulula thaidzo na u ita uri zwithu zwi vha tshimbilele zwavhuḓi.

U GWADAMELA VHAFHASI: Vhaṅwe vha tenda uri vha tea u gwadamela vhafhasi kana midzimu yo vhalaho uri zwi vha tsireledze na u vha ṋea mashudu. Van, * ane a dzula Vietnam u ri: “Ndo vha ndi tshi tenda uri arali nda shumela vhafhasi, nṋe na vhananga ri ḓo vha na vhutshilo ha khwine na u vha na vhumatshelo havhuḓi.”

U BEBWA HAFHU: Vhathu vhanzhi vha tenda uri musi muthu a tshi lovha, u a dovha a bebwa. Vha ri enea maitele a itea lu sa gumi. Vha tenda uri zwivhi na zwivhuya zwine vha ṱangana nazwo zwino, zwi ya nga uri vho tshila hani kha vhutshilo havho ha tshifhingani tsho fhelaho.

Naho vhathu vhanzhi vha tshi amba uri a vha tendi zwithu zwo raloho, vha kha ḓi ya kha vhane vha vhala mitalo ya zwanḓa, vha kha ḓi sedza dzi-horoscope, vha kha ḓi tungula na u ita zwiṅwe zwi ngaho zwenezwo. Vha vhona u nga zwithu zwo raloho zwi nga vha thusa u ḓivha vhumatshelo havho.

Naa vhathu vhane vha tenda zwithu zwo raloho na u ḓitika ngazwo vha na vhutshilo havhuḓi na vhumatshelo havhuḓi?

Kha ri ambe nga tsumbo ya Hào ane a dzula Vietnam. O vha a tshi bvumba nga dziṋaledzi, e kha zwa feng shui nahone a tshi gwadamela vhafhasi. Naa zwo mu shumela? Hào u ri: “Bindu ḽanga a ḽo ngo tsha tshimbila zwavhuḓi, nda dzhena zwikolodoni, ndi sa ḽi lu ḓifhaho muṱani nahone ndi tshi dzula ndo tsikeledzea.”

Qiuming wa Taiwan na ene o vha a tshi tenda kha zwa u bvumba nga dziṋaledzi, kha zwa u bebwa hafhu, kha uri zwithu zwo dzula zwo dzudzanywa, kha zwa feng shui na u gwadamela vhafhasi. Musi o no ṱolisisa enea mafhungo, o ri: “Ndo zwi vhona uri dzenedzo pfunzo na mikhuvha a zwi tendelani nahone zwi a ḓaḓisa. Ndo zwi vhona uri u bvumba nga dziṋaledzi zwi anzela u amba mazwifhi. Musi zwi tshi ḓa kha u bebwa hafhu, ni nga kona hani u shandula vhutshilo haṋu vhu ḓaho kana u vhu khwinisa arali ni si tsha humbula zwa vhutshilo haṋu ho fhiraho?”

Samusi Hào, Qiuming na vhaṅwe vho zwi vhona, vhumatshelo hashu a ho ngo dzula ho dzudzanywa, a ho ngo ḓitika nga dziṋaledzi, nga vhafhasi kana nga u bebwa hafhu. Naa zwi amba uri a ri koni u langa vhumatshelo hashu?

Vhathu vhanzhi vha vhona u nga nḓila ya u ḓiitela vhumatshelo havhuḓi ndi u futelela pfunzo ya nṱha na u ṱoḓa lupfumo. Ho bvelela mini kha vhaṅwe vhe vha khetha u ita zwenezwo?