Ndo bebelwa Moundsville, ḓorobo ṱhukhu i re tsini na Mulambo wa Ohio, devhula ha West Virginia, U.S.A. Ndo vha ndi wa vhuvhili kha vhana vhaṋa, nahone vhararu vhe vhaṱhannga, ngauralo ho vha hu tshi takadza vhukuma hayani. Vhabebi vhanga vho vha vhe vhashumi vha biko, vha fulufhedzeaho na vhane vha funa vhathu. Ro vha ri songo pfuma, fhedzi ro vha ri sa shayi tshithu. Samusi vhe Ṱhanzi dza Yehova, vhabebi vhanga vho ita zwoṱhe zwi re maanḓani avho u itela u ombedzela maitele a Bivhili musi ri tshee vhaṱuku.

Naho zwo ralo, musi ndo no vha miṅwahani ya vhufumi, ndo thoma u ṱutshela zwe nda gudiswa zwone vhuṱukuni. Ndo vha ndi tshi timatima uri u tshila u tendelana na maitele a Bivhili zwi nga vhuyedza na u fusha. Ndo vha ndi tshi humbula uri u ḓilanga tshoṱhe ndi yone nḓila ine ya nga ita uri muthu a takale zwa vhukuma. Hu sa athu fhela tshifhinga tshilapfu, ndo litsha u ya miṱanganoni ya Vhukrsite. Mukomana wanga na khaladzi anga na vhone vho edzisa zwiito zwanga zwa vhushandukwa. Vhabebi vhashu vho ita zwoṱhe zwine vha nga kona u itela u ri thusa, fhedzi a ro ngo ṱanganedza thuso yavho.

Ndo vha ndi songo vhuya nda zwi ṱhogomela uri mbofholowo ye nda vha ndi tshi khou i ṱoḓa i ḓo ita uri ndi vhe phuli ya dzema ḽivhi. Nga ḽiṅwe ḓuvha musi ndi tshi khou bva tshikoloni, khonani yanga yo nṋea fola uri ndi dahe. Ndo ḽi ṱanganedza. U bva nga ḽeneḽo ḓuvha, ndo thoma u ṱanganedza mikhuvha minzhi i huvhadzaho. Nga u ya ha tshifhinga, ndo vha ndi tshi vho shumisa zwidzidzivhadzi nahone ndi tshi ḓifara luvhi. Miṅwahani ye ya tevhela, ndo thoma u shumisa zwiṅwe zwidzidzivhadzi zwi re na maanḓa, nahone nda vha phuli yazwo. Ndo mbo ḓi fashwa tshoṱhe nga yeneyi mikhuvha mivhi, nda vho thoma u rengisa zwidzidzivhadzi u itela uri ndi kone u bvela phanḓa ndi tshi tikedza dzema ḽanga.

Ndo lingedza vhukuma u sa thetshelesa luvalo lwanga, lwe lwa vha lu tshi nkhumbudza tshifhinga tshoṱhe uri zwe nda vha ndi tshi khou zwi ita zwo khakhea. Naho zwo ralo, ndo vhona uri maḓi a tevhuwa o tevhuwa, ndi khwine u bvela phanḓa na matshilele o raloho. Naho ndo vha ndi tshi dzula ndi dziphathini na dzikhontsathini, ndo vha ndi tshi ḓipfa ndi na vhuludu, ndo tsikeledzea. Nga zwiṅwe zwifhinga, ndo vha ndi tshi ḓivhudzisa uri zwo ḓa hani uri nṋe ndi ite zwo fhambanaho tshoṱhe na vhabebi vhanga, samusi vhe vhathu vhavhuḓi nga u rali.

Naho ndo vha ndi si tsheena fulufhelo ḽa uri ndi nga shanduka, hu na vhathu vhe vha vhona zwi tshi nga konadzea. Nga ṅwaha wa 2000, vhabebi vhanga vho nkhumbela uri ndi ṱuwe navho buthanoni ḽa tshiṱiriki ḽa Ṱhanzi dza Yehova. Ndo sokou ya, naho ndo vha ndi sa funi. Ndo mangala vhukuma musi ndi tshi vhona mukomana wanga na khaladzi anga vho ṱutshelaho mafhungo-ngoho, vha tshi ṱuwa na riṋe.

Musi ndi henefho buthanoni, ndo ṱhogomela uri he buthano ḽa farelwa hone, ndi fhethu he nda vhuya nda ya hone musi hu na khontsathi. Phambano ye nda i vhona henefho, yo kwama vhudziki ha mbilu yanga. Musi ndi khontsathini, henefho fhethu ho vha hu na tshika, hu tshi khou duba mutsi wa fola. Vhathu vhe vha ḓa khontsathini vho vha vhe si na vhukonani, na mulaedza wa muzika u lidzwaho wo vha u tshi tsikeledza. Fhedzi buthanoni, ndo vha ndo tangwa nga vhathu vho takalaho zwa vhukuma—vhathu vhe vha nṱanganedza nga lufuno, naho vho guma u mbona miṅwahani minzhi yo fhiraho. Holo yo vha yo kuna, nahone mulaedza we wa haseledzwa wo vha u tshi ṋea fulufhelo. U vhona nḓila ye mafhungo-ngoho a Bivhili a nkwama ngayo, zwo ita uri ndi ḓivhudzise uri ndi ngani ndo a ṱutshela!—Yesaya 48:17, 18.

Nga u ṱavhanya nga murahu ha buthano, ndo dzhia phetho ya u vhuyelela tshivhidzoni tsha Vhukriste. Mukomana wanga na khaladzi anga vho kwamiwa nga zwe vha zwi tshenzhela buthanoni, na vhone vha dzhia phetho ya u vhuyelela tshivhidzoni. Roṱhe ri vhararu ro ṱanganedza pfunzo dza Bivhili.

Ndimana ya Bivhili ye ya nkwama nga maanḓa ndi Yakobo 4:8, ine ya ri: “Sendelani tsini ha Mudzimu, na ene u ḓo sendela tsini haṋu.” Ndo zwi ṱhogomela uri arali ndi tshi ṱoḓa u sendela tsini ha Mudzimu, ndi fanela u shandula matshilele anga. Dziṅwe tshanduko dze nda vha ndi tshi fanela u dzi ita, ndi u litsha u daha fola, na u litsha u shumisa luvhi zwidzidzivhadzi na zwikambi.—2 Vha-Korinta 7:1.

Ndo litsha u ṱwa na khonani dzanga dza kale, nda thoma u vhumba vhukonani vhuswa na vhagwadameli vha Yehova. Muhulwane wa Mukriste we a guda na nṋe Bivhili ndi ene we a nthusa vhukuma. O vha a tshi nthwela luṱingo tshifhinga tshoṱhe, nahone a tshi ḓa u mmbona uri ndo ṱwa hani. U swika na ṋamusi, u kha ḓi vha khonani yanga ya tsini-tsini.

Nga tshimedzi tsha 2001 ndo sumbedza u ḓiṋekedza hanga kha Mudzimu nga u lovhedzwa maḓini. Mukomana wanga na khaladzi anga na vhone vho lovhedzwa khathihi na nṋe. Vhabebi vhanga na murathu wanga vho vha vho takala vhukuma, ngauri muṱa wa hashu woṱhe wo vha u na vhuthihi kha u gwadamela Yehova.

Ndo vha ndi tshi humbula u nga maitele a Bivhili a a tsikeledza, fhedzi zwino ndi vho a dzhia sa ane a ri vhuyedza na u ri tsireledza. Bivhili yo nthusa uri ndi kone u litsha u shumisa na u rengisa zwidzidzivhadzi, ya ita uri ndi vhe muthu wa khwine.

Ndi na ndugelo ya u vha tshipiḓa tsha vhushaka ha vhurathu na vhukomana ha vhagwadameli vha Yehova vha re shangoni ḽoṱhe. Vhenevha vhathu vha a funana zwa vhukuma, nahone vha na vhuthihi kha u shumela Mudzimu. (Yohane 13:34, 35) Nga nṱhani ha vhushaka ha vhurathu na vhukomana, ndo wana phaṱhutshedzo yo khetheaho, ya u wana mufumakadzi wanga Adrianne, ane nda mu funa nga maanḓa na u mu dzhia e wa ndeme. Zwi a ntakadza u ḓivha uri ri shumela Musiki roṱhe.

Nṱhani ha u tovhola vhutshilo ha tseḓa, zwino ndi mushumi wa u ḓifunela ane a gudisa vhaṅwe Bivhili lwa tshifhinga tsho ḓalaho, ndi tshi vha gudisela uri na vhone vha vhuyelwe nga Ipfi ḽa Mudzimu. Wonoyu mushumo u nnḓisela dakalo ḽa vhukuma. Ndi amba ndi na fulufhelo ḽo khwaṱhaho uri Bivhili yo shandula vhutshilo hanga. Mafheleloni ndo wana mbofholowo ya vhukuma.