Vha Ukraine vho tshinyadza buroho ya ndeme i ṱumaho Crimea na Russia. Nga murahu ha maḓuvha mavhili nga matsheloni a Musumbuluwo wa dzi 10 October 2022 Vha Russia vha thuthubisa bomo ḓoroboni dza Ukraine hu u itela u ḓilifhedzela. Zwenezwo zwo itea nga murahu ha musi vhorapolitiki vha tshi ḓivhadza uri Haramagedo i ḓo ḓa hu si kale.

•   Nga dzi 6 dza October 2022, Muphuresidennde wa Amerika Vho Joe Biden vho ri: “A ri athu vhuya ra pfa ri tsini na Haramagedo u bva tshifhingani tsha musi hu na khuḓano vhukati ha Muphuresidennde Vho John F. Kennedy vha Amerika na ḽa Cuba. Arali ra vhuya ra shumisa bomo dza nuclear, zwi ḓo ita uri hu vhe na Haramagedo.”

•   Nga dzi 8 dza October 2022 musi vha BBC News vha tshi vhudzisa Muphuresidennde wa Ukraine Vho Volodymyr Zelensky nga ha masiandoitwa a u shumisa bomo dza nuclear, Muphuresidennde vho ri: “Ndi a tenda uri Haramagedo i nga ḓa hu si kale, zwenezwi zwi nga vhea ḽifhasi ḽoṱhe khomboni.”

 Naa u shumiswa ha bomo dza nuclear zwi nga ita uri hu vhe na Haramagedo? Bivhili i ri mini nga hazwo?

 Hai. Ipfi “Haramagedo” ḽi wanala Bivhilini luthihi fhedzi kha Nzumbululo 16:16. Ḽeneḽi ipfi a ḽi ambeli kha nndwa ine ya ḓo vha hone vhukati ha dzitshaka, fhedzi ḽi ambela kha nndwa ine ya ḓo vha hone vhukati ha Mudzimu na “mahosi a ḽifhasi ḽoṱhe.” (Nzumbululo 16:14) Mudzimu u ḓo shumisa nndwa ya Haramagedo u itela u fhelisa mivhuso ya vhathu.—Daniele 2:44.

 U itela u guda zwo engedzeaho nga ha uri hu ḓo itea mini kha ḽifhasi nga tshifhinga tsha Haramagedo, vhalani thero ine ya ri Nndwa Ya Haramagedo Ndi Mini?

 Hai. Naho vhavhusi vha tshi nga shumisa bomo dza nuclear tshifhingani tshi ḓaho, Mudzimu a nga si tendele uri ḽifhasi ḽi fheliswe. Bivhili i ri:

•   “Ḽifhasi ḽi ḓi dzula ḽi hone lini na lini.”—Muhuweleli 1:4.

•   ““Vho lugaho vha ḓo vha vhaṋe vha ḽifhasi, vha ḓo dzula khaḽo lini na lini.”—Phisalema 37:29.

 Naho zwo ralo, zwe Bivhili ya dzula yo zwi amba na zwine zwa khou itea zwino, zwi sumbedza uri hu si kale hu ḓo vha na tshanduko khulu kha ḽifhasi. (Mateo 24:3-7; 2 Timotheo 3:1-5) Wanani zwine Bivhili ya zwi amba nga ha vhumatshelo nga u guda Bivhili nga mahala.