Bivhili yo dzula yo amba uri hu ḓo vha na malwadze (o phaḓalalaho na ḽifhasi) maḓuvhani a vhufhelo. (Luka 21:11) Eneo malwadze a si ṱhamu ya Mudzimu kana nḓila ine Mudzimu a ṱarafa ngayo vhathu. Zwavhuḓi-vhuḓi, Mudzimu u ḓo fhelisa thaidzo dzoṱhe dza mutakalo hu si kale, u katela na malwadze a tshi shumisa Muvhuso wawe.

•  Naa Bivhili yo dzula yo amba nga malwadze?

•  Mudzimu o no vhuya a ṱarafa vhathu nga vhulwadze?

•  Naa malwadze a re hone ndi ṱhamu ya Mudzimu?

•  Naa malwadze a ḓo vhuya a fhela?

•  Ndimana dza Bivhili dzi ambaho nga ha malwadze

 Bivhili a yo ngo dzula yo amba nga ha malwadze a ngaho COVID-19, AIDS kana Spanish flu. Fhedzi yo dzula yo amba nga ha “malwadze” na “vhulwadze.” (Luka 21:11; Nzumbululo 6:8) Zwenezwi ndi tshipiḓa tsha tshiga tsha ‘maḓuvha a vhufhelo,’ ane a dovha a vhidzwa “vhufhelo ha shango.”—2 Timotheo 3:1; Mateo 24:3.

 Bivhili i amba nga ha zwiṅwe zwifhinga zwe Mudzimu a ṱarafa vhathu nga vhulwadze. Sa tsumbo, o ita uri vhaṅwe vha vhe na mapele. (Numeri 12:1-16; 2 Dzikhosi 5:20-27; 2 Koronika 26:16-21) Fhedzi kha zwenezwo zwiitea vhathu vha si na mulandu a vho ngo pfiswa vhuṱungu nga vhulwadze. Nṱhani hazwo, kha zwenezwo zwiimo ho vha hu tshi khou haṱulwa vhathu vhe vha shandukela Mudzimu.

 Hai. Vhaṅwe vha amba uri Mudzimu u khou shumisa malwadze o phaḓalalaho na maṅwe malwadze u itela u ṱarafa vhathu nga tshino tshifhinga. Fhedzi Bivhili a i zwi tikedzi. Ndi ngani?

 Tshiṅwe tshiitisi ndi uri vhaṅwe vhashumeli vha Mudzimu vha tshifhingani tsho fhiraho na vha zwino vho tambudzwa nga vhulwadze. Sa tsumbo, Timotheo a fhulufhedzeaho o vha a tshi “dzulela u lwala.” (1 Timotheo 5:23) Fhedzi Bivhili a i ambi uri zwenezwi zwo vha zwi tshi sumbedza uri ha takalelwi nga Mudzimu. Na ṋamusi, vhaṅwe vhashumeli vha Mudzimu vha fhulufhedzeaho vha a lwala kana vha kavhiwa nga malwadze. Kanzhi vha tshi fara nga vhulwadze vha vha vho sokou ṱangana ngazwo.—Muhuweleli 9:11.

 Zwiṅwe hafhu, Bivhili i funza uri tshifhinga tsha uri Mudzimu a pfise vhathu vhavhi vhuṱungu a tshi athu swika. Nṱhani hazwo, ri khou tshila tshifhingani tshine Mudzimu a khou ramba vhathu vhoṱhe uri vha sendele tsini nae uri vha tshidzwe, tshine tsha vha “ḓuvha ḽa u tshidzwa.” (2 Vhakorinta 6:2) Iṅwe nḓila ine a khou ramba ngayo vhathu ndi nga mushumo wa u huwelela une wa khou itwa u mona na ḽifhasi. Hu khou ḓivhadzwa mulaedza wavhuḓi une wa vha “mafhungo maḓifha a Muvhuso.”​—Mateo 24:14.

 Ee. Bivhili i amba nga ha tshifhinga tshine ha sa ḓo vha na ane a lwala. Mudzimu u ḓo fhodza malwadze oṱhe musi hu tshi vhusa Muvhuso wawe. (Yesaya 33:24; 35:5, 6) U ḓo fhelisa u tambula, vhuṱungu na lufu. (Nzumbululo 21:4) Nahone u ḓo vusa vhoṱhe vho lovhaho uri vha kone u ḓiphiṋa nga mutakalo wavhuḓi fhano kha ḽifhasi nga fhasi ha zwiimo zwavhuḓi.—Phisalema 37:29; Mishumo 24:15.

 Nzumbululo 6:8: “Nda vhona bere yo tshenuluwaho, o i ṋamelaho o vha a tshi pfi Lufu. Vhiḓa ḽo vha ḽi tshi khou mu tevhela ḽi tsini-tsini nae. Lufu na Vhiḓa zwa ṋewa maanḓa a u . . . vhulaya . . . nga . . . vhulwadze.”

 Zwine Zwa Amba Zwone: Hovhu vhuporofita ha vhaṋameli vhaṋa vha bere vhu sumbedza uri malwadze a ḓo vha hone tshifhingani tshashu.