Tshivhi tshi sa hangwelwi tshi ambela kha zwiito na nḓila ine muthu a vha ngayo zwine zwa ita uri muthu o itaho tshivhi a si hangwelwe nga Mudzimu. Zwi ḓa hani uri muthu a si hangwelwe nga Mudzimu?

 Mudzimu u hangwela vhane vha rembuluwa kha zwivhi zwavho, vhane vha tshila nga zwilinganyo zwawe nahone vhane vha vha na lutendo kha Yesu Kristo. (Mishumo 3:19, 20) Naho zwo ralo, muthu a nga ḓowela u ita tshivhi, zwa ita uri zwiito na mavhonele awe zwi si shanduke. Bivhili i ṱalusa onoyo muthu sa a re na “mbilu mmbi” ye ya “rindidzwa nga maanḓa a vhufhura a tshivhi.” (Vhaheberu 3:12, 13) U fana na vumba ḽo fhiswaho ḽi sa vhumbei, mbilu ya muthu i nga rindila a si tsha ita zwi takadzaho Mudzimu. (Yesaya 45:9) Onoyo muthu u na mulandu u sa hangwelwi.​—Vhaheberu 10:26, 27.

 Misini ya Yesu, vhaṅwe vharangaphanḓa vha vhurereli ha Tshiyuda vho ita tshivhi tshi sa hangwelwi. Naho vho vha vha tshi zwi ḓivha uri Yesu o thuswa nga muya mukhethwa wa Mudzimu u ita vhuṱolo, vho hana vha ri ndi maanḓa a bvaho kha Sathane Diabolo.​—Marko 3:22, 28-30.

Tsumbo dza zwivhi zwine ra nga hangwelwa

•  U amba zwithu zwi si zwavhuḓi nga u sa ḓivha. Paulo o vhuya a amba zwithu zwi si zwavhuḓi, fhedzi nga murahu o amba uri: “Ndo khathutshelwa, ngauri ndo zwi ita nga u sa ḓivha na u sa vha na lutendo.”​—1 Timotheo 1:13.

•  Vhuṱonḓolo. Bivhili i amba nga vhaṅwe vhe vha ita vhuṱonḓolo, vha shanduka nahone Mudzimu a vha hangwela.​—1 Vhakorinta 6:9-11.

“Naa ndo ita tshivhi tshi sa hangwelwi?”

 Arali ni tshi ḓisola zwi tshi bva mbiluni kha zwe na zwi ita tshifhingani tsho fhiraho nahone ni tshi ṱoḓa u shanduka, zwi amba uri a no ngo ita tshivhi tshi sa hangwelwi. Mudzimu a nga hangwela zwivhi zwo dovhololwaho lunzhi-lunzhi hu si nga khole, tenda mbilu ya vha i songo rindila.​—Yesaya 1:18.

 Vhaṅwe vha vhona u nga vho ita tshivhi tshi sa hangwelwi ngauri vha rwiwa nga luvalo. Naho zwo ralo, Bivhili i ri funza uri mbilu ndi mudzia-tshimbevha. (Yeremia 17:9) Mudzimu uri ri songo haṱula vhaṅwe​—u katela na riṋe vhaṋe. (Vharoma 14:4, 12) A nga ri hangwela naho ri tshi ḓivhona mulandu.​—1 Yohane 3:19, 20.

Naa Yudasi Iskariote o ita tshivhi tshi sa hangwelwi?

 Ee, o tshi ita. Nga nṱhani ha tseḓa o tswa tshelede ya miṋeelo. O ḓiita u nga u khou pfela vhuṱungu vhashai, fhedzi ene a tshi khou itela u kuvhanganya tshelede ine a ḓo i tswa. (Yohane 12:4-8) Musi mbilu ya Yudasi yo no rindila, o mbo ḓi rengisa Yesu nga maseṱha a 30. Yesu o vha a tshi zwi ḓivha uri Yudasi a nga si rembuluwe ndi ngazwo o mu vhidza “murwa we ha pfi u ḓo lozwiwa.” (Yohane 17:12) Zwenezwi zwi amba uri musi Yudasi a tshi fa o vha a tshi ḓo fheliswa lwa tshoṱhe nahone o vha a sa ḓo vuswa.​—Marko 14:21.

 Yudasi ho ngo rembuluwa kha zwivhi zwawe. Ho ngo ḓibula kha Mudzimu, o ḓibula kha vharangaphanḓa vha vhurereli vhe a langana Yesu navho.​—Mateo 27:3-5; 2 Vhakorinta 7:10.