Bivhili i sumbedza uri zwo tea nahone zwi a ṱoḓea uri ni ḓifune nga nḓila yo teaho. Honoho u ḓifuna hu katela u ḓiṱhogomela, u ḓiṱhonifha na u ḓidzhia ni wa ndeme. (Mateo 10:31) Bivhili a i ṱuṱuwedzi u humbulela iwe muṋe fhedzi, fhedzi i ṱuṱuwedza u ḓifuna nga nḓila yo teaho.

Ri fanela u funa nnyi u thoma?

1.   U funa Mudzimu zwi fanela u ḓa u thoma. Bivhili i funza uri ndaela khulwane ndi ine ya ri: “U tea u funa Yehova Mudzimu wau nga mbilu yau yoṱhe.”​—Marko 12:28-30; Doiteronomio 6:5.

2.   Ndaela ya vhuvhili khulwane ndi ine ya ri: “U tea u funa wahau vhunga u tshi ḓifuna.”​—Marko 12:31; Levitiko 19:18.

3.   Naho Bivhili i si na ndaela yo livhaho ya uri ri fanela u ḓifuna, ndaela ine ya ri “u tea u funa wahau vhunga u tshi ḓifuna,” i sumbedza uri u ḓifuna nga nḓila yo teaho zwo ḓowelea nahone zwi a vhuyedza.

Yesu o funa nnyi u thoma?

 Yesu o sumbedza uri ri nga linganyisela hani u funa Mudzimu, u funa vhahashu na u ḓifuna nahone o eletshedza vhafunziwa vhawe uri vha edzise tsumbo yawe.​—Yohane 13:34, 35.

1.   O funa Yehova Mudzimu u thoma nahone a ḓiimisela u khunyeledza mushumo wa Khotsi awe. O ri: “Uri shango ḽi zwi ḓivhe uri ndi a funa Khotsi, ndi khou ita zwe Khotsi a nndaedza uri ndi zwi ite.”​—Yohane 14:31.

2.   Yesu o vha a tshi funa vhahawe, o sumbedza zwenezwo nga u vha ṱhogomela kha zwine vha shaya, a vhuya a ṋekedza na vhutshilo hawe.​—Mateo 20:28.

3.   O sumbedza uri u a ḓifuna nga u vha na tshifhinga tsha u awela, u ḽa na u vha na vhukonani na vhatevheli vhawe na vhathu vhe vha vha vha tshi nga vha vhafunziwa vhawe.​—Marko 6:31, 32; Luka 5:29; Yohane 2:1, 2; 12:2.

Naa u funa vhaṅwe u fhira inwi muṋe zwi nga ita uri ni si tsha takala kana u sa ḓiṱhonifha?

 Hai, ngauri ro sikwa nga tshifanyiso tsha Mudzimu, ane pfaneleo yawe khulwane ya vha ya lufuno lu sa ḓiṱoḓeli zwalwo. (Genesi 1:27; 1 Yohane 4:8) Zwenezwi zwi amba uri ro sikelwa uri ri fune vhaṅwe. U ḓifuna zwi na vhuimo hazwo, fhedzi ri a takala vhukuma musi ri tshi funa Yehova u fhira zwoṱhe na u livhisa ṱhogomelo kha u itela vhaṅwe zwithu zwavhuḓi. Bivhili i ri: “U ṋea zwi ḓisa dakalo ḽihulu u fhira u ṋewa.”​—Mishumo 20:35.

 Vhathu vhanzhi ṋamusi vha amba uri dakalo ḽi ḓa nga u ṱoḓa u vha wa u thoma. Kha vhathu vho raloho, “u ḓifuna” zwo dzhiela vhudzulo “u funa wahau.” Naho zwo ralo, zwine zwa khou itea zwino zwi sumbedza uri u vha na mutakalo wavhuḓi na u takala zwi tshenzhelwa nga vhane vha tevhela nyeletshedzo ya Bivhili ine ya ri: “Muṅwe na muṅwe nga a ṱoḓe zwine zwa vhuyedza muṅwe, hu si zwine zwa vhuyedza ene muṋe fhedzi.”​—1 Vhakorinta 10:24.