• ANO DE NASSIMENTO: 1963

• PAESE: INGLATERA

• CHI ERO: MI GUADAGNEA TANTI SOLDI COL ME LAORO

EL ME PASSÀ:

Mi son nassesta in Croydon, nel sud de Londres. Dopo che la me mama la ga bio sinque fioi, mi son nassesta. Ela la ga bio nove fioi. Me pupà e me mama i era de San Vissente, una ìsola del Caribe. Me mama la ndea nte una ciesa metodista. Ancora che mi volesse imparar sora tante robe, mi no gavea interesse de imparar sora Dio. Darente dela me casa ghen’era un lago e ntele fèrie dela scola me piasea restar lì, drio leder libri che mi ciapea dela biblioteca.

Dopo de finir la scola, go bio la voia de giutar i poareti. Go scominsià a laorar ndove che i giutea le persone che no le gavea un posto de star, le era defissienti e le ghe fea fadiga de imparar. Alora, go studià ntela università sora la Siensa dela Salute. Dopo, sensa spetar, son stata bona de gaver un laoro che guadagnea tanti soldi e vivea come una persona siora. Mi era una peschisadora sossial e giutea le emprese. Mi era la me pròpia parona. Par far el me laoro me ocorea sol del me computador e dela internet. Mi viaiea par altri paesi par tante stimane e restea nei otei che mi gavea scoliesto. Doperea el spa e la academia dei otei e me piasea dela bela vista che gavea lì. Mi gavea la vita che sempre go volesto. Ancora cossita, seitea preocuparme coi poareti.

LA BÌBLIA LA GA CAMBIÀ TANTO LA ME VITA:

Par ani mi me domandea: ‘Parché che semo qua?’ e ‘Qual che l’è el ogetivo dela vita?’. Ancora che me fesse queste domande, mai son ndata in serca dele risposte nela Bìblia. In 1999, go ricevesto la vìsita dela me sorela pi gióvena Margaret. Ela la gavea deventà Testimònia de Geovà e la ga menà insieme una amiga, che anca la era Testimònia de Geovà. La amiga dela me sorela la me ga dato tanta atension. Go acetà studiar la Bìblia. Ma no era bona de far progresso parché mi no gavea tempo par via del me laoro e dela me maniera de viver.

In 2002, son ndata de star nel sudoeste dela Inglatera. Lì, go seità a studiar sora Peschisa Sossial col ogetivo de saver de pi. Anca go scominsià a ndar ntele riunion dele Testimònie de Geovà e menea insieme el me toseto. Ancora che mi gavea fato università, l’è stà nel stùdio dela Bìblia che mi go imparà parché che ghen’è problemi ntela vita e come che podemo risolverli. Quando go ledesto Mateo 6:24, go capio che no se pol laorar par due paroni. O servimo a Dio o le richesse. Mi savea che gavea de dessider quel che l’era pi importante ntela me vita.

Un ano vanti, mi gavea studià cole Testimònie de Geovà el libro Existe um Criador Que Se Importa com Você? (In portoghese). a Son restada sicura che sol Geovà, el nostro Creador, el pol risolver i problemi dele persone. Ma, ntela università lori insegnea che par gaver un ogetivo nela vita no ghe ocorea creder nte un Creador. Son restada tanto cativa de scoltar questo. Dopo de due mesi, me go fermà de studiar ntela università par gaver pi tempo par far pi forte la me amicìssia con Dio.

Un testo dela Bìblia el me ga giutà a cambiar la me maniera de viver. L’è stà Proverbi 3:5, 6: “Fìdate in Geovà de tuto el to cuor, no stà fidarte nel to pròpio saver. Ricòrdate de Dio in tuto quel che te fè e lu el ndarà mostrarte quala che la ze la strada giusta.” Imparar sora el nostro amoroso Dio me dea de pi felicità de che gaver tanti soldi o el sussesso de gaver fato università. Tanto de pi che imparea sora quel che Geovà el vol par la Tera e el sacrifìssio che Gesù el ga fato par noantri, de pi mi volea dedicar la me vita al Creador. Son stata batesada in april de 2003. Dopo, go fato sforso par gaver una vita pi sémplisse.

COME SON STATA GIUTADA:

No ghen’è soldi che pol pagar la me amicìssia con Geovà. Sol quando lo go cognossesto che go catà vera pace e alegria. Anca son contenta parché son sempre insieme de quei che i adora a Dio.

Ancora mi go la voia de imparar sempre de pi. L’è ntele riunion e nel me stùdio dela Bìblia che imparo sora le verità che mi vui. Adesso, el me laoro l’è parlar dela me fede ai altri. L’è questo che me dà felicità. Posso giutar le persone a gaver una vita meio adesso e anca una speransa de viver par sempre nte un novo mondo. De 2008 son pioniera e la me vita la ze pi felice de che mai. Go catà el vero ogetivo dela vita e par quela ringràssio tanto a Geovà.

• ANO DE NASSIMENTO: 1973

• PAESE: ÀUSTRIA

• CHI ERO: VISSIÀ IN GIUGHI

EL ME PASSÀ:

Son stà slevà ntela pìcola cità de Braunau, Àustria. In quel posto quasi no gavea violensa e le persone le era siore. La me fameia la era catòlica e i me ga insegnà questa religion.

Ancora quando ero gióveno, me ga sucedesto una desgràssia che me ga fato sofrir tanto. In 1984, quando mi gavea 11 ani, me ricordo de un giorno che mi gavea giugà la bola con un dei me meio amighi. In quel medèsimo giorno lu l’è morto nte un assidente de auto. La morte del me amigo me ga fato sofrir tanto. Ani dopo del assidente, ancora mi me domandea cossa che sucede dopo dela morte.

Quando go finio la scola go scominsià a laorar come eletrissista. Mi ero vissià in giughi. No me manchea soldi, ancora che mi magnea fora tanti soldi nei giughi. Guastea tanto del me tempo coi sporti e drio scoltar heavy metal e punk rock. Mi ndea tanto in feste e in posti ndove che i balea. Mi gavea una vita imoral e vivea par divertirme, ma rento de mi l’era vodo.

LA BÌBLIA LA GA CAMBIÀ TANTO LA ME VITA:

In 1995, un omo de pi età, che l’era Testimònia de Geovà, l’è vegnesto casa mia. Lu el me ga mostrà un libro che gavea la risposta dela Bìblia sora la domanda: “Cossa che sucede quando morimo?” Go acetà el libro parché la morte del me amigo ancora la me fea sofrir. Invesse de leder sol la parte che parlea dela morte, mi lo go ledesto tuto!

Quel che go ledesto me ga dato le risposte ale me domande sora la morte. Ma mi go imparà tanto de pi. Mi gavea fede sol in Gesù, parché l’è stà questo che go imparà nela religion catòlica. Ma col stùdio dela Bìblia, go imparà a gaver una forte amicìssia col pare de Gesù, Geovà Dio. Son restà maraveià de saver che Geovà el se preocupa con noantri e el vol che lo cognossemo. (Mateo 7:7-11) Go imparà che Geovà el ga sentimenti e che el fà quel che el dise. Questo me ga fato gaver interesse par le professie dela Bìblia e la maniera che lore le se realisa. Alora, la me fede in Dio la ze restada pi forte.

Dele religion che mi cognossea, suito go visto che sol le Testimònie de Geovà le volea pròpio giutar le persone a capir la Bìblia. Tuti i versìcoli che mi ledea ntele publicassion dele Testimònie de Geovà, mi ledea ntela me Bìblia catòlica. Tanto de pi che mi fea peschise, pi sicuro mi ero che gavea catà la verità.

Go imparà nel me stùdio dela Bìblia che Geovà el vol che la me maniera de viver la sia de acordo coi so comandamenti. Quando go ledesto Efesi 4:22-24, go visto che gavea de cambiar tanto. Mi gavea de cavar via la “vècia personalità”, o sia, la me “maniera de viver del passà”. E mi gavaria de “meter su la nova personalità che la ze stata creada de acordo cola volontà de Dio”. Par quela, go assà de gaver una vita imoral. Go visto che gavea de fermarme de giugar, parché el giugo el me fea voler ancora de pi soldi e me fea esser ganansioso. (1 Corinti 6:9, 10) Par esser bon de cambiar, mi savea che no podea pi gaver i amighi che gavea vanti, ma si gaver amighi coi stessi ogetivi che mi.

No l’è stà fàcile cambiar. Go scominsià a ndar nele riunion dele Testimònie de Geovà e go fato tante amicìssie lì. Anca, go seità a far peschise dela Bìblia. Far queste robe me ga giutà a fermarme de scoltar le brute mùsiche che me piasea vanti, cambiar i me ogetivi ntela vita e quel che me ocorea nela me aparensa. In 1995, son stà batesà come Testimònia de Geovà.

COME SON STÀ GIUTÀ:

Ancoi, mi no penso pi tanto nei soldi e nele robe materiai. Vanti mi restea suito cativo, adesso son pi tranquilo. Anca, go assà de preocuparme massa col futuro, come par esémpio, cossa che sucede dopo dela morte.

Son contento de far parte de una fameia che la serve a Geovà in tuto el mondo. Ancora che i ga problemi, lori i serve a Dio de maniera fedele. Adesso, go el privilègio de doperar tuto el me tempo e forsa par adorar a Geovà e far el ben ai altri, invesse de ndar drio ale voie sbaliade.

• ANO DE NASSIMENTO: 1963

• PAESE: INGLATERA

• CHI ERO: GAVEA UNA VITA SENSA SPERANSA

EL ME PASSÀ:

Son nassesto nela Inglatera. Ma quando mi gavea 7 ani, mi e la me fameia semo ndati de star nela Austràlia, nela cità de Gold Coast, nel Stado de Queensland. La ze una cità ndove tante persone le va là par cognosserla. No èrino mia siori, ma mai ne ga mancà quel che gaveino de bisogno par viver.

Ancora cossita, mai son stà felice de verità. Son restà tanto disgustà cola me vita. Me pupà l’era un ciucheton. Mai ghemo bio una amicìssia parché el bevea massa e el tratea mal me mama. Pi tardi, go savesto cossa che lu el ga passà quando l’era un soldà nela Malàsia. Alora, go scominsià a capir parché el fea le robe de quela maniera.

Ancora quando ero gióveno, go scominsià a bever. Con 16 ani, no son pi ndato nela scola e son ndato servir ntela marina. Go doperà droghe e son restà vissià nel sigro. El me vìssio nel àlcol l’è restà cada volta pi forte. Prima, mi restea ciuco sol ntei finai de stimana, dopo tuti i giorni.

Dopo dei me 20 ani, go scominsià a gaver dubi se ghen’era un Dio. Mi pensea: ‘Se ghen’è un Dio, parché che lu el assa le persone sofrir e morir?’ Go scrito fin poemi che i parlea che l’era Dio che el gavea la colpa dele robe rugne.

Con 23 ani son ndato via dela marina. Dopo, go laorà con arquante robe e, par un ano, go viaià par arquanti paesi. Ma gnente me assea contento. Mi no gavea ogetivi ntela me vita. Mi no gavea interesse par gnente, gnanca in gaver una casa e un laoro che se guadagna ben. La ùnica roba che la me dea consolo l’era bever e scoltar mùsiche.

Me ricordo ben del giorno che go dessidio catar un ogetivo ntela vita. Son ndato visitar el campo de consentrassion de Auschwitz. Mi gavea belche ledesto sora le brute robe che gavea sucedesto in quel posto. Ma esser lì e veder come quel campo de consentrassion l’era tanto grando el ga tocà el me cuor. Mi no ero bon de capir come le persone le podea esser tanto crudele una col altra. Me ricordo de caminar in quel posto coi oci pieni de làgrime, drio domandarme: ‘Parché?’.

LA BÌBLIA LA GA CAMBIÀ TANTO LA ME VITA:

In 1993, go ritornà del me viaio de un ano, e go scominsià a leder la Bìblia par catar risposte. Un tempo dopo, due Testimònie de Geovà le ze vegneste casa mia e le me ga convidà par ndar al congresso nte un stàdio lì darente. Go dessidio ndar.

Arquanti mesi vanti son ndato in quel stàdio par veder un giugo. El posto parea nantro. Le Testimònie de Geovà le gavea rispeto, le se vestia ben e i so fioi i gavea bona creansa. Anca son restà maraveià ntela ora del magnar. Una mùcia de Testimònie de Geovà le ze ndate magnar ntela grama del stàdio e quando le ze tornade par i so posti, l’era tuto neto. E el pi importante, lore le gavea tanta pace. E mi volea gaver quela pace. No me ricordo de gnente de quel che i ga parlà nel congresso, ma me ricordo de come che lore le se ga comportà.

In quela note, me go ricordà del me primo cusin. Lu el ledea tanto la Bìblia e el studiea le religion. Ani indrio, lu el me gavea parlà che Gesù el ga insegnà che podemo saver quala zela la vera religion par via de quel che le persone dela religion le fà. (Mateo 7:15-20) Mi catea che mi podea proar saver parché che le Testimònie de Geovà le era difarente. Par la prima volta, go sentio un pochetin de speransa e alegria.

Le Testimònie de Geovà che le ze vegneste casa mia, le me ga visità nantra volta. Lore le me ga domandà se mi volea studiar la Bìblia e mi go acetà. Anca, go scominsià a ndar ntele riunion.

El stùdio dela Bìblia me ga fato cambiar quel che mi pensea sora Dio. Go imparà che no l’è lu che el ga la colpa dele robe rugne e del sofrimento. E che in verità, lu el se sente disgustà quando el vede le robe rugne che le persone le fà. (Génesi 6:6; Salmo 78:40, 41) Go dessidio mai pi assar Geovà disgustà. Mi volea contentar el so cuor. (Proverbi 27:11) Go fermà de bever e fumar, anca go molà la me vita imoral. In marso de 1994, son stà batesà come Testimònia de Geovà.

COME SON STÀ GIUTÀ:

Ancoi, go un ogetivo e son felice. No me ocore pi bever par darghene fora coi me problemi. Go imparà a ‘butar la me carga sora Geovà’. — Salmo 55:22.

Fà diese ani che son maridà con Karen, una bela Testimònia de Geovà. Ela la ga una brava fiola che la ga nome Nella. Noantri tre insieme doperemo tanto del nostro tempo par giutar le persone a imparar la verità sora Dio. Adesso, la me vita la ga un ogetivo.