Le Testimònie de Geovà le giuta persone in de pi de 200 paesi, ma sol le filiai de 35 de questi paesi le ze bone de pagar le so spese coi donativi che le riceve. Alora, come che i altri paesi i ze boni de pagar le so spese?

El Corpo Governante el vede quel che le Testimònie de Geovà in tuto el mondo le ghe ocore par adorar a Dio e predicar. Dopo, i pensa nela meio maniera de doperar i donativi par giutarle. Cossita, se una filial la riceve de pi donativi de quel che la ga de bisogno, altre filiai che ghe ocore de aiuto le riceve questi donativi. Questo l’è compagno al esémpio dei primi cristiani che i se giutea un al altro, cossita no ghe manchea gnente a nissuni. (2 Corinti 8:14) Quei che i gavea de pi giutea quei che i gavea manco.

Come che i fradei che i riceve aiuto de altre filiai i se sente? Varda el esémpio dela Tanzania. De pi dela metà dele persone che le ze de star lì le ze tanto poarete, le vive con manco de 10 reai par giorno. Questi donativi che i ze vansadi de altre filiai i ze stati doperadi par rangiar su el Salon del Regno dela congregassion Mafinga. Fradei de questa congregassion i ga scrito: “Semo tanto contenti parché adesso ghemo un bel posto par adorar a Geovà. Dopo che ghemo rangià su el Salon del Regno, de pi persone le ze drio vegner ale riunion. Ringrassiemo tanto che la organisassion de Geovà e i fradei in tuto el mondo i ze stati tanto generosi con noantri.”

Par causa dela pandemia del coronavìrus, arquanti dei nostri fradei nel Sri Lanka i ze restadi sensa magnar. Questo ga sucedesto cola sorela Imara Fernando e so picinin, Enosh. Ma gràssie ai donativi de altri paesi, lori i ga ricevesto quel che i gavea de bisogno. Lori i ga fato un carton par ringrassiar. I ga scrito: “Gràssie a tuti i fradei che i ne ga giutà in questa època tanto difìcile. Semo tanto contenti de far parte de questa fameia e preghemo che Geovà el seite giutar tuti i nostri fradei in questi ùltimi giorni.”

Fradei e sorele de tuto el mondo i ze sempre pronti par giutar i altri con quel che i ga. Par esémpio, Enosh el ga fato una casseta par sparagnar soldi e dopo dar donativi par giutar i fradei che no i ga tuto quel che ghe ocore. Anca la sorela Guadalupe Álvarez la ze generosa. Ela la ze de star nel Mèssico nte un posto tanto poareto. Lì, tante persone le ga pochi soldi e altre no le ga un salàrio giusto tuti i mesi. Ma ela la dopera quel che la ga par far donativi. Ela la ga scrito: “Ringràssio tanto a Geovà par el so amor leal e la so bontà. Mi sò che i me donativi, insieme coi donativi dei altri, i ndarà giutar i fradei che i ga de bisogno.”

Le filiai che le manda soldi par paesi che ghe ocore de aiuto anca le ze contente de far questo. Par esémpio, el fradel Anthony Carvalho, dela Comission de Filial del Brasil, el ga dito: “Par tanti ani altre filiai le ne ga mandà soldi par giutar nel laoro che femo qua nel nostro paese. Gràssie a questo aiuto, ancoi femo un laoro ancora pi grando qua. E adesso che la situassion la ze meio, semo contenti de giutar anca altri paesi. I nostri fradei i sà che el laoro de predicassion l’è fato in tuto el mondo e, come seghidori de Gesù, lori i ze contenti de giutar con quel che i ga.”

Quala che la ze la meio maniera de giutar i nostri fradei e sorele che i ga de bisogno? Invesse de far donativi par una filial de altro paese, fà donativi par la òpera mondial. Te pol far questo donativo nela casseta de donativi par la òpera mondial che ghen’è nel Salon del Regno o par meso del site donate.dan124.com. Gràssie tanto par tuti i vostri donativi.