Noantri Testimònie de Geovà femo sforsi parché la fameia la reste unida, tanto la nostra come quela dei altri. Ghemo rispeto par Dio, el Creador dela fameia. (Génesi 2:21-24; Efesi 3:14, 15) Ntela Bìblia, Lu el insegna prinsipi che ga giutà persone de tuto el mondo a gaver matrimoni pi forti e felici.

 Femo tuto quel che podemo par starghe drio ai consili dela Bìblia e esser meio sposi, spose o pupà e mama. (Proverbi 31:10-31; Efesi 5:22–6:4; 1 Timòteo 5:8) La sapiensa che catemo ntela Bìblia pol giutar fin fameie che no le ze tute dela stessa religion. (1 Piero 3:1, 2) Scolté cossa che ga dito arquanti che i ze maridadi con qualchedun che l’è deventà una Testimònia de Geovà:

•   “I primi sie ani de maridadi l’era tuto una barufa e un restar disgutadi. Dopo che Ivete la ze deventada una Testimònia de Geovà, me ga piasesto che la gavea pi passiensa e pi rispeto par mi. I cambiamenti che la ga fato ga salvà el nostro matrimònio.” — Clauir, del Brasil.

•   “Quando el me sposo Chansa el ga scominsià a studiar cole Testimònie de Geovà mi era contra, parché sempre pensea che i spartia le fameie, ma invesse, adesso vedo che in verità la Bíblia la ga giutà el nostro matrimònio.” — Agness, del Zàmbia.

 Ntel nostro laoro de predicassion, mostremo a tuti che se metemo in pràtica quel che insegna la Bìblia, ne giuta a:

•   Catar la persona giusta par maridarse

•   Ndàrghene fora nel primo ano de maridadi

•   Catarse ben coi sogri

•   Saver come doperar i soldi

•   Molàrghela de barufar

•   Imparar a perdonar

•   Insegnarghe la creansa ai fioi

 Dele volte pol suceder. Par esémpio, ntel 1998, la istitussion Sofres che fà investigassion, la ga esaminà matrimoni che un dei due el ga deventà Testimònia de Geovà. Ga vegnesto fora che, intrà de vinti matrimoni, un ga dato problemi.

 Gesù el gavea dito che quei che i fesse la so volontà i gavaria podesto catarse con problemi ntela fameia. (Mateo 10:32-36) El studioso Will Durant el ga scrito che, ntel Impèrio Romano, “i cristiani i era acusadi de rovinar le fameie” a. Ancoi ghe ze chi che pensa ancora cossita sora arquante Testimònie de Geovà. Ma sarà pròpio colpa de quel che el deventa Testimònia de Geovà?

 El Tribunal Europeo dei Diriti Umani el ga parlà sora la acusassion che se move contra le Testimònie de Geovà de spartir le fameie e el ga dito che quei dela fameia che no i ze Testimònie de Geovà i causa problemi parché no i vol “acetar e rispetar el dirito che i ga quei dela fameia de praticar la so religion”. El Tribunal el ga anca dito: “Queste situassion le sucede tante volte ntele fameie ndove el sposo e la sposa i ga religion difarente, e sucede anca cole Testimònie de Geovà.” b Ma anca in meso de persone che no ghe piase dele Testimònie de Geovà, noantri femo tuto quel che podemo par obedir a questo consìlio dela Bìblia: “No sté mia pagar el mal col mal. . . . Fé el vostro meio, in quel che l’è possìbile, par star in pace con tuti.” — Romani 12:17, 18.

 Le Testimònie de Geovà le stà drio ala orientassion dela Bìblia de maridarse “sol ntel Signor”, in pràtica, maridarse sol con una persona che ga la stessa religion. (1 Corinti 7:39) Questa orientassion la ze bona nò sol parché la vien dela Bìblia, ma anca parché la giuta tanto le fameie. Par esémpio, un artìcolo del Journal of Marriage and Family de 2010 dise che “par quei che i se marida e i ga la stessa religion” l’è pi fàcile che el so matrimònio el dae giusto. c

 Le Testimònie de Geovà mai le dirà a una persona de spartir el so matrimònio sol parché un de lori no’l ga la stessa religion. La Bìblia la dise: “Se qualche fradel el ga la sposa che no la crede, e ela la vol restar con lu, che lu no la asse. E la dona che la ga el sposo che no’l crede, e lu l’è disposto a viver con ela, no la asse el so sposo.” (1 Corinti 7:12, 13) Le Testimònie de Geovà le rispeta questo comandamento.