1-2. (a) Exeeni ennikhaliherya ovilela mixankiho sahu? Mutthokiherye. (b) Mwaha ola, ninrowa woona exeeni?

“KUUPUWELAKA mixankiho kaarina aka, kinoona wira nkaarowa owerya oxintta mekhaka”. Niireke mootoko olavula moolumo ntoko awo? Anamunceene a hiyo nootoko olavula. Woonasa wene, nyuwo mwaahilavula moolumo awo nuumala wuupuwela enamuna mwaaphwannye anyu ikuru wira nvilele eretta anyu wala okhweliwa ni mutthu mwamphenta anyu. Vaavo munuupuwela anyu itthu sookhumelenleni, munnoona wira moowerya ovilela mwaha woowi, munepa wootteela wa Yehova ohoovahani “owerya . . . wulupalexa”.​—2 aKor. 4:7-9.

² Nave otheene ahu ninniphavela okhaliheriwa ni munepa wootteela wira nihihapuxiwe ni olumwenku ola wootakhala. (1 Yoh. 5:19) Ohiya-vo, hiyo ninniwana ni “malaikha òtakhala a musulu”. (aÉf. 6:12) Nuupuwelaka sooweha iyo sotheene, mwaha ola ninrowa othokorerya inamuna piili munepa wootteela onnikhaliherya awe ovilela soweeha iyo. Nuumala-vo, ninrowa woona etthu nikhanle ahu oopaka wira nittottele mureerelo nikhaliheryo na munepa wootteela.

3. Enamuna xeeni munepa wootteela onnikhaliherya awe okathi wa mixankiho?

³ Enamuna emosa munepa wootteela wa Yehova onnikhaliherya awe, ori onivaha ikuru aahiiso owerya wira nimalelihe miritti sahu hata nikhalanaka mixankiho. Murummwa Paulo aahoona wira aaniwerya omurumeela Yehova mwaha woowi aanikupali okhaliheriwa ni “owerya wa Kristu” wira ovilele mixankiho sawe. (2 aKor. 12:9) Okathi wa nenli wa mukwaha awe wa omisionaario, murummwa Paulo aahivara muteko munceene ohiya paahi olaleeryaka masi ovaraka muteko wira ophwanye yoowiikhuuriha. Owo aahikhala oKorinto, etthoko ya Akila ni Prisila. Muteko aya waari opaka iheema. Okhala wira aanisuwela opaka iheema, okathi mukina Paulo aanivara muteko owo ni  anamathelana ale. (Mit. 18:1-4) Munepa wootteela waahinvaha ikuru Paulo owerya woophwanya yoolya okathi omosaru ovaraka muteko woolaleerya.

4. Moovarihana ni 2 aKorinto 12:7b-9, muxankiho xeeni Paulo aarina awe?

⁴ Mmusome 2 aKorinto 12:7b-9. Iveersu iya, Paulo onnihimya wira aaniwanana “ohawa mwerutthuni”. Exeeni murummwa Paulo aaphavela awe ohimya? Akhala wira mwaamuhommwa ni mwiiwa, moohaanyiherya mwaamoona owereya. Eyo ennooniherya wira, murummwa Paulo aaphavela ohimya wira aahikhalana muxankiho awe woowereya vanceene. Tivonto aahimmye awe wira weehereriwa wawe waakhala ntoko ‘ahaxiwa’ ni “nlaikha na Satana”. Woonasa wene, khahiyo wira Satana ni minepa sawe sootakhala ti saamukumiherya mixankiho murummwa Paulo. Masi pooti wira okathi minepa sootakhala soonale aya wira Paulo aahikhalana “ohawa mwerutthuni”, saaniphavela wuncererya ohaawa wawe wira otepeke woona owereya. Nto, murummwa Paulo aapanke exeeni?

5. Yehova aakhunle sai mavekelo a Paulo?

⁵ Paulo aaphavela wira Yehova okumihe “ohawa [wawe] mwerutthuni”. Tivonto aahimmye awe wira: “Kihavekela Apwiya [Yehova] imara ttharu wira ekàkiherye ohawa iwo”. Nnaamwi aavekenle vanceene, ohaawa wawe mwerutthuni khiwaamanle. Niireke eyo enooniherya wira Yehova khaawiriyanne mavekelo a Paulo? Nnaari! Yehova aahaakhula mavekelo a Paulo. Ekeekhai wira Yehova khaamalinhe muxankiho wa Paulo, masi aahinvaha ikuru wira owerye ovilela. Yehova aahimmye so: “Owerya waka onnitepexa osuwanyeya mohilipani”. (2 aKor. 12:8, 9) Okhaliheriwaka ni Muluku, Paulo aahiwerya ovikaniha ohakalala ni okhalana murettele wekeekhai!​—aFil. 4:4-7.

6. (a) Woonasa wene, Yehova onrowa waakhula sai mavekelo anyu? (b) Moota xeeni soolepa siri muttimani sinrowa aya wookhaliheryani ophwanya ikuru?

⁶ Niireke mootoko opaka etthu emosaru aapanke awe Paulo? Mootoko omuxonttela Yehova wira owaakiheryeni muxankiho mwaarina anyu? Hata nvekelaka vanceene, muxankiho anyu onnivikaniha wala onootepa, nto munuupuwela wira Yehova khaakhunle mavekelo anyu. Akhala wira eyo enoowiiraneelani, mutthareke ntakiheryo na murummwa Paulo. Ntoko siisaale aakhunle awe mavekelo a Paulo, Yehova onimwaakhula mavekelo anyu! Pooti wira Yehova khonrowa omaliha muxankiho anyu, masi orumeelaka munepa awe wootteela, owo onimoovahani ikuru wira nwerye ovilela muxankiho anyu. (Esal. 61:4, 5) Hata vakhalaka ntoko wira mixankiho sanyu sinnookhulumulani, Yehova khonikhala-khala oonyanyalakani.​—2 aKor. 4:8, 9; aFil. 4:13.

7-8. (a) Mwa enamuna xeeni munepa wootteela ori awe ntoko epheyo? (b) Murummwa Pedru aatthokihenrye sai moota munepa wootteela onivara awe muteko?

⁷ Enamuna xeeni ekina munepa wootteela onnikhaliherya awe? Ntoko siisaale epheyo empurula aya ekalawa wira ephiye nipuro enrowa aya hata ari ene mawimpi mphareya, munepa wootteela pooti onikhaliherya ovikaniha omurumeela Yehova mpakha elapo esya hata nrina ene mixankiho.

⁸ Okhala wira murummwa Pedru aari mulipa-oototha ihopa, owo aanisuwela oratteene weetta mphareya. Ophavelaka otthokiherya saana moota munepa wootteela onnikhaliherya aya, murummwa Pedru aahirumeela nuulumo ninvarihana ni weetta mphareya. Owo aalempe so: “Vekekhai, masu awo khatonko okumihiwa n’utthuna w’atthu: masi atthu ale, yalavunle ni nsina na Muluku, yanettihiwa n’iroho yowarya”.​—2 Ped. 1:21.

9. Murummwa Pedru aaphavela ohimya exeeni vaavo aahimmye awe wira atthu ‘yettihiwa’ ni munepa wootteela?

⁹ Murummwa Pedru aaphavela ohimya exeeni ni nuulumo noowi “yanettihiwa”? Luka, mulipa oolepa eliivuru ya Miteko, aahirumeela moolumo oovirikana a nuulumo nimosaru na eGriki wira ooniherye moota ekalawa ‘enikakhiwa’ aya ni epheyo. (Mit. 27:15) Ntoko ohimmye awe namasoma mmosa a Biibiliya, okathi Pedru aalempe awe  wira anamalepa a Biibiliya ‘yeettihiwa’, aarumenle nuulumo “na weetta mphareya”. Nto Pedru aaphavela ohimya wira ntoko siisaale ekalawa enkakhiwa aya ni epheyo wira ephiye opuro enrowa aya, maprofeta ni atthu yaamulepa Biibiliya yeettihiwa ni munepa wootteela wira amalelihe muteko aya. Musomi mmosaru a Biibiliya ohimmye so: “maprofeta ni alipa oomulepa Biibiliya, yaakhala wira yaathomeya iveela okathi yaamulepa aya Biibiliya”. Tthiri Yehova aahipaka ele aaphavela awe wira epakiwe. Owo aahaavaha “epheyo”, wala munepa wootteela. Nto alipa oomulepa Biibiliya yaahipaka mpantta aya. Awo yaamulepa Biibiliya attharaka moota munepa wootteela waalakiherya aya.

10-11. Itthu xeeni piili ninreerela ahu opaka wira nttottele mureerelo munepa wootteela? Nvahe nlikanyiho.

¹⁰ Olelo-va, Yehova khonirumeela munepa awe wootteela wira atthu amulepeke Biibiliya. Hata vari siiso, Yehova onnirumeela munepa awe wira aalakiheryeke atthu awe. Tthiri Yehova onnipaka mpantta awe. Nto ninrowa ottottela sai mureerelo munepa wootteela wa Muluku? Wira nittottele mureerelo, nihaana opaka mpantta ahu. Ninrowa opaka sai eyo?

¹¹ Nkahaya muupuwele nlikanyiho nna: Wira ottottele mureerelo epheyo, mulipa-oneettiha ekalawa ohaana opaka itthu piili. Yoopacerya, owo ohaana owehiha ekalawa awe opuro enrowa aya epheyo. Akhala wira mulipa-oneettiha ekalawa onneemela opuro ehinoopa epheyo yinceene, ekalawa awe khenrowa okhuma opuro eri aya. Ya nenli, owo ohaana weemexa iveela ni otapuruxa oratteene. Hata eviraka epheyo, ekalawa awe enrowa okhuma akhala wira ootapuruxa saana ni enniphwanya epheyo oratteene eveela ya ekalawa awe. Moolikanasa, nnoovikaniha omurumeela Yehova okathi wa mixankiho akhala wira ninnittottela mureerelo nikhaliheryo na munepa wootteela. Nto wira nittottele mureerelo munepa owo, nihaana opaka itthu piili. Yoopacerya, nihaana okhala opuro munepa wootteela onrowa awe onikhaliherya, nto wira eyo yiiraneye nihaana ovara miteko sinikhaliheriwa ni munepa wa Muluku. Ya nenli, nihaana “othomeya ni otapuruxa” oratteene iveela  sahu, niire so, nihaana wiimananiha ovara miteko sa Muluku. (Esal. 119:32) Akhala wira nnoopaka itthu iyo, munepa wootteela onoonikhaliherya ovikaniha omurumeela Yehova hata nikumanaka mixankiho. Nave onoonikhaliherya ovilela mpakha elapo esya nleiheriwe ahu ni Muluku.

12. Exeeni ninrowa ahu oweha niinaano-va?

¹² Mpakha-va, nihoona inamuna piili munepa wootteela okhanle awe oonikhaliherya. Yoopacerya, munepa wootteela onninivaha ikuru wira onikhaliherye ovikaniha ororomeleya okathi wa mixankiho wala okathi nneehereriwa ahu. Ya nenli, munepa wootteela onninikhaliherya ovikaniha ohooceya weettela ephiro eniphwanyiha okumi woohimala. Vano, nrowe niwehe itthu xexe ninreerela ahu opaka wira nittottele mureerelo munepa wootteela.

13. Moovarihana 2 Timótheyo 3:16, 17, exeeni Nuulumo na Muluku nikhanle aya oopaka, nto hiyo nihaana opaka exeeni?

¹³ Yoopacerya, nihaana osoma Nuulumo na Muluku. (Mmusome 2 Timótheyo 3:16, 17.) Nuulumo na eGriki nitaphuleliwe wira “supuxeriwé ni Muluku” nintaphulela “ovekhuleliwa wala oveereliwa ni Muluku”. Tthiri Muluku aahirumeela munepa awe wootteela wira “aaveerele”, eyo piiyo, ohela mmuupuweloni mwaya etthu anamalepa a Biibiliya yaakhanle aya oolepa. Nto vaavo ninsoma ahu ni wuupuwelela ele ninsoma ahu, sowiixuttiha sa Muluku sinnikela mmuupuweloni ni vamurimani vahu. Muupuwelo owo wa Muluku onninikhaliherya opaka marukunuxo mookumini mwahu wira nimusiveliheke Yehova. (aHéb. 4:12) Musuweleke wira, naaphavelaka okhaliheriwa ni munepa wootteela nihaana omusoma Biibiliya khula nihiku ni wuupuwelela ele ninsoma ahu. Niira siiso, Nuulumo na Muluku nnimweettihaka itthu sotheene ninlavula ahu ni nimpaka ahu.

14. (a) Xeeni ohimyaka wira munepa wootteela onniphwanyaneya mmithukumanoni? (b) Ninrowa wooniherya sai wira ninnirowela mithukumano “neemenxe ene ni otapuruxa iveela sahu”?

¹⁴ Ya nenli, mmukokhoreleke Muluku mmithukumanoni. (Esal. 22:23) Okhala wene, munepa wootteela wa Yehova onniphwanyaneya okathi wa mithukumano. (Wis. 2:29) Xeeni ninhimya ahu eyo? Mwaha woowi, okathi ninthukumana ahu nimukokhorelaka Yehova vamosa ni anna ni arokora, hiyo ninnivekela munepa wootteela, ninniipa isipo sa Omwene sikumihiwe mBiibiliyani ni ninniwiriyana myaha ni malakiheryo ninvahiwa ahu ni anna athanliwe ni munepa wootteela wa Muluku. Nave munepa wootteela onnaakhaliherya anna olokiherya ni olavula saana myaha anithanleliwa aya. Nto wira nittottele mureerelo munepa wa Muluku nihaana olokiherya ni wiirela mpantta mithukumano. Tthiri vaavo nimpaka ahu eyo mmithukumanoni “ninneemexa ni otapuruxa iveela sahu”.

15. Munepa wootteela onnikhaliherya sai naalaleeryaka?

¹⁵ Ya neeraru, mulaleeryeke. Vaavo nimmurumeela ahu Biibiliya wira nilaleerye ni wiixuttiha, ninneemererya okhaliheriwa ni munepa wootteela naavaraka muteko owo. (aRom. 15:18, 19) Masi wira nittottele mureerelo nikhaliheryo na munepa wootteela, nihaana oluttuweliwa olaleerya ni omurumeela saana Biibiliya. Etthu ekhanle oonikhaliherya opaka eyo naalaleeryaka ori orumeela saana malakiheryo a ovaanela aniphwanyaneya Okumi ni Orummwa Ahu wa Ekristau—Ekaderno Enirumeeliwa Omuthukumanoni.

16. Enamuna xeeni yuulupale nikhanle ahu oovahiwa munepa wootteela?

¹⁶ Ya neexexe, munvekeleke Yehova. (Math. 7:7-11; Luka 11:13) Enamuna yuulupale nikhanle ahu oovahiwa munepa wootteela ori onvekela Yehova wira onivahe. Khiivo etthu ekhanle ookhoottiherya mavekelo ahu ophiya wa Yehova. Nave khiivo etthu ekhanle ookhoottiherya munepa wootteela oniphwanya sikhale ixiri sa ekhatteya nnakhala Satana. (Yak. 1:17) Nihaana ovekela mwa enamuna xeeni naaphavelaka ottottela mureerelo vanceene  munepa wootteela? Wira naakhule nikoho nno, nrowe niwehe ntakiheryo nimphwanyaneya Evangelyo ya Luka * paahi. Nlikanyiho nno nnoonikhaliherya wiixutta etthu voohimya sa ovekela.

17. Nlikanyiho na Yesu nri Luka 11:5-9, 13, ninniixuttiha exeeni?

¹⁷ Mmusome Luka 11:5-9, 13. Nlikanyiho na Yesu ninnooniherya moota nikhanle ahu oovekela munepa wootteela. Nlikanyiho nne, mulopwana ole aahiphwanya etthu aaphavela awe mwaha “w’othipelela wawe”. Hata waari ohiyu eriyari, mulopwana ole khoovelenle ovekela nikhaliheryo. (Nwehe enoota yoosoma ya Luka 11:8, Ireferensia sa Okumi ni Orummwa Ahu sa Julyo 2018, epaaxina 5.) Nlikanyiho na Yesu ninniixuttiha exeeni voohimya sa ovekela? Yesu aahimmye so: “Nvekeleke: munovahiwa. Mwavyeke: munophwanya. Mmané mukhora: munohuleliwa”. Nto, etthu xeeni nniixutta ahu? Akhala wira ninniphavela ovahiwa munepa wootteela nihaana othipelela ovekela.

18. Moovarihana ni nlikanyiho na Yesu, exeeni ennikupaliha wira Yehova onoonivaha munepa awe wootteela?

¹⁸ Nlikanyiho na Yesu, ninninikhaliherya woona etthu emmwiiriha Yehova onivaha munepa awe wootteela. Mulopwana a nlikanyiho na Yesu aaphavela owaakhela saana aletto awe. Hata vari siiso, owo khaarina etthu yoowaavaha aletto awe yaawo yaaphiyale ohiyu eriyari, masi aaniphavela waavaha etthu. Yesu aahimmye wira mulopwana ole aahikhaliheriwa ni namwaattamanani awe mwaha woowi aahithipelela oveka iphaawu. Exeeni Yesu aaphavela awe ottittimiherya? Akhala wira apinaatamu oohimalela annaakhaliherya apatthani aya anithipelela, Tiithi ihu a wiirimu Yehova, yoowo ori ooreera murima ni oovaha onimwaakhaliherya aavahaka munepa awe wootteela ale anithipelela onvekela! Nto nihaana okupali wira Yehova onimwaakhula mavekelo ahu okathi nninvekela ahu munepa wootteela.​—Esal. 10:17; 66:19.

19. Exeeni ennikupaliha wira nnoowerya omuxintta Satana?

¹⁹ Satana khonihiya ophavela onihapuxa. Masi nikupaliki ni murima wotheene wira nnoowerya omuxintta. Mwaha wa xeeni? Mwaha woowi, munepa wootteela onninikhaliherya mwa inamuna piili. Enamuna yoopacerya, owo onninivaha ikuru nimphavela ahu wira nivilele mixankiho ni soweeha. Ya nenli, onninikhaliherya ovikaniha omurumeela Yehova nlipelelaka elapo esya muhoolo. Tivonto, mwiimananiheke ottottela mureerelo nikhaliheryo na munepa wootteela.